Read wanga 1 ABARUCHI 15 Bible Online

1 ABARUCHI 15 - wanga bible

1 ABARUCHI 15

¹Mumuyika kwekhumi namunane kwoburuchi bwa Yeroboamu omusiani wa Nebati, Abiya yakholwa okhuba omuruchi wa Yuda.

²Mana naruka mu Isiraeli khulwemiyika chitaru. Eliira lia nyinamwana liali Maaka, omukhaana wa Abusalomu.

³Abiya yakhola obwonooni bulala shinga obwa samwana, khandi shiyali omuhulili khu OMWAMI Nyasayewe shinga olwa Daudi kuukanyene yali tawe.

⁴Nebutswa khulwa okhubela Daudi, OMWAMI Nyasaye yahelesia Abiya omwana omusiani okhuruka mu Yerusalemu olunyumalwe khandi okhukhola litookho elo okhuba eliamaani muno.

⁵OMWAMI Nyasaye yakhola kano shichila Daudi yali niyakhola akokhuchamisia OMWAMI Nyasaye khandi shiyalobakhwo okhuhulila kata elala khumalakoke tawe, okhuyiniakhwo butswa amakhuwa ka Uria Omuhiti oyo.

⁶Lihe eliali niliachaka hakari wa Rehoboamu nende Yeroboamu liatsiililila mutsinyanga tsiobulamu bwa Abiya tsiosi.

⁷Ne amakhuwa koosi aka Abiya yakhola, kahandikwa mushitabu shia, “Amakhuwa akobulamu bwakhale bwabaruchi ba Yuda.”

⁸Abiya yafwa mana nayabilwa mwitookho, naye omusianiwe mbu, Asa nakalukha mushilnjeshie okhuba omuruchi.

⁹Mumuyika kwamakhumi kabili kwoburuchi bwa Yeroboamu, omuruchi wa Isiraeli, Asa yakholwa okhuba omuruchi wa Yuda,

¹⁰mana naruka mu Yerusalemu khulwemiyika amakhumi kane nende mulala. Nyakukhulunyene yalangwa mbu, Maaka omukhaana wa Abishalomu.

¹¹Asa yakholi akobulunjishi imbeli ewa OMWAMI Nyasaye shinga Daudi kuukanyene yakholanga.

¹²Yaloonda okhurula mwihanga liosi abatamba abasaatsa nende abakhasi abakhalabananga habundu hokhwinamila abanyasaye khandi nayinia ebifwanani biosi biabaruchi bashie bamuranjilila bali nibakaasia.

¹³Yarusia Maaka nyakukhulunyene khubukhongo shinga nyina omuruchi, shichila yali niyakaasia eshifwanani shieshisinyo shiomunyasaye mukhasi owolwibulo oulangwa mbu, Ashera. Asa narema nende okhutonya eshifwanani shiomunyasaye eshio mubitonye, mana nashisambila mwibanda lia Kidironi.

¹⁴Asa kata niyalasasia buli habundu hokhwinamila ebifwanani ta, yatsiililila okhuba omwisiikwa khu OMWAMI Nyasaye, mubulamubwe bwosi.

¹⁵Yara muhekalu ebindu biosi ebia samwana yali niyaahulila Nyasaye khandi nende ebindu bia yali niyakaasia okhurula khutsahabu nende ifetsa.

¹⁶Omuruchi Asa wa Yuda nende omuruchi Baasha wa Isiraeli, buli lwosi balwananga mubulamu bwabwe bwosi, olwa bali nibashili abaruchi.

¹⁷Omuruchi Baasha naseera Yuda, ne nachaaka okhumbakha olukoba mwitookho lia Rama okhwikalila abandu okhubira okhwinjilamwo nende okhutsia elwanyi wa Yuda.

¹⁸Kho omuruchi Asa nabukula itsahabu yosi nende ifetsa yosi eyali niyalekhwa muhekalu nende munzumwe omwene; mana naruma balala khubakhongobe Damasiko okhuyilila omuruchi Benihadadi wa Siria omwana wa Tabirimoni khandi omwitsukhulu wa Hezironi; noburume buno naboola ari,

¹⁹“Lekha khube abeetsa shinga olwa bapapa befwe balinji. Itsahabu nende ifetsa yino neshihaanwa shianje khwiwe. Bulano funaka obulalabwo nende omuruchi Baasha wa Isiraeli, kho mbu anyale okhurusia abelihebe mushialo shianje.”

²⁰Omuruchi Benihadadi nafuchilila amakhuwa ka Asa, mana naruma abakhongobe abelihe nende abelihe okhuseera amatookho ka Isiraeli. Babukula amatookho ka Iyoni, Dani, Abeli Betsi Maaka, eshialo eshiali hambi neinyanza ya Galilaya nende olukongo lwa Nafutali lwosi.

²¹Olwa omuruchi Baasha yahulilakhwo amakhuwa ako, yalekha okhumbakha litookho elia Rama narulaho natsia Tiriza.

²²Mana omuruchi Asa naruma lilako khubandu boosi bomushialo shia Yuda shiosi, naboola mbu buli mundu okhuula akhoonye okhuchinga nende okhurusia mwitookho lia Rama amachina nende tsimbao tsiomuruchi Baasha yekhoonyelanga okhumbakha. Omuruchi Asa yekhoonyela ebindu ebio khulwa okhumbakha amatookho ka Mizipa nende Geba elili mutsingongo tsia Benjamini.

²³Amakhuwa koosi akomuruchi Asa yakhola, amakhuwake akokhuma ikholo nende amataala akayombakha amasiisi, koosi kahandikwa mushitabu shia, “Amakhuwa akobulamu bwakhale bwabaruchi ba Yuda.” Nebutswa namalile okhukofula yetsa nalema khulwa obulwale bwebilenje.

²⁴Asa yafwa mana nayabilwa mung'ani tsioburuchi mwitookho lia Daudi, naye Yehoshafati omusianiwe nakalukha nushilenjeshie okhuba omuruchi.

²⁵Mumuyika kwakhabili kwoburuchi bwa Asa omuruchi wa Yuda, omusiani womuruchi Yeroboamu oulangwa mbu, Nadabu yaahulwa okhuba omuruchi wa Isiraeli, mana naruka khulwemiyika chibili.

²⁶Yonoona imbeli ewa OMWAMI Nyasaye, ne nachila Isiraeli niyonoona, shinga Yeroboamu samwana owamuranjilila yakhola.

²⁷Baasha, omusiani wa Ahiya womuluyia lwa Isakari, yatuta okhwira Nadabu, mana namwiira olwa Nadabu nende abelihebe bali nibabotokhananga litookho lia Gibetsoni mushialo shia Filisiti.

²⁸Amakhuwa kano kekholekha mumuyika kwakhataru kwoburuchi bwa Asa omuruchi wa Yuda. Mana Baasha nakalukha mushilenjeshie naba omuruchi wa Isiraeli.

²⁹Baasha yachaaka okhwira abeinzu ya Yeroboamu. Abeinzu ya Yeroboamu boosi beerwa shinga butswa OMWAMI Nyasaye yali niyaboola okhubirila mumukhalabaniwe omulakusi Ahiya okhurula Shilo. Abulaho kata mulala owehonokokha tawe.

³⁰Kano kekholekha khulwa okhubela Yeroboamu yabuusia liruma elia OMWAMI Nyasaye wa Isiraeli, khulwa obwonooni bwa yakhola khandi nachila abandu ba Isiraeli nibonoona.

³¹Amakhuwa koosi aka Nadabu yakhola, kahandikwa mushitabu shiamakhuwa kobulamu bwakhale bwabaruchi ba Isiraeli.

³²Omuruchi Asa wa Yuda nende omuruchi Baasha wa Isiraeli balwananga buli lwosi olwa bali nibashirukanga.

³³Mumuyika kwakhataru kwoburuchi bwa Asa wa Yuda, Baasha omusiani wa Ahiya yaahulwa okhuba omuruchi wa Isiraeli, mana naruka nali Tiriza khulwemiyika amakhumi kabili nachine.

³⁴Yonoona imbeli ewa OMWAMI Nyasaye, ne nachila lihanga lia Isiraeli nilionoona, shinga Yeroboamu owamuranjilila yakhola.