Read wanga 1 ABARUCHI 16 Bible Online

1 ABARUCHI 16 - wanga bible

1 ABARUCHI 16

¹OMWAMI Nyasaye naboolela omulakusi Yehu omusiani wa Hanani, mbu aboolele Baasha ari,

²“Iwe shiwali eshindu imbeli wanje ta, nebutswa ndakhukhola okhuba omuruchi wa abandu banje Isiraeli. Ne bulano wonoonile shinga Yeroboamu khandi okholile abandu banje okhwonoona. Obwonooni bwabwe bubuusiye liruma lianje.

³Kho ndalakhuyiniaho nende abeinzuyo shinga olwa ndayiniaho Yeroboamu.

⁴Abandu beinzuyo abafwila mwitookho balalibwa netsimbwa, nabo boosi abafwila elwanyi welitookho balalibwa netsingosia.”

⁵Amakhuwa koosi aka Baasha yakhola, akamahe kayalwana kahandikwa mushitabu shiakobulamu bwakhale bwabaruchi ba Isiraeli.

⁶Baasha yafwa mana nayabilwa mwitookho lia Tiriza. Mana Ela omusianiwe nakalukha nushilenjeshie okhuba omuruchi.

⁷Oburume bwokhurula khu OMWAMI Nyasaye obwokhufukula Baasha nende abeinzuye bwarumbulwa nomulakusi Yehu khulwa okhubela obwonooni bwa Baasha yali niyakholela OMWAMI Nyasaye. Yabuusia liruma elia OMWAMI Nyasaye shichila yeera abeinzu ya Yeroboamu boosi. Shikali khulwa ako konyene ta, habula yonoona butswa shinga lwomuruchi Yeroboamu yonoona imbeli ewa OMWAMI Nyasaye.

⁸Mumuyika kwamakhumi kabili nakhasasaba kwoburuchi bwa Asa, omuruchi wa Yuda, Ela omusiani wa Baasha yaahulwa okhuba omuruchi wa Isiraeli, mana naruka nali Tiriza khulwemiyika chibili.

⁹Mulala khubakhongobe mbu, Zimuri owasinjililanga inusu yamakaari komuruchi kelihe, yamukholela induli. Inyanga yindi, Ela yali mwitookho lia Tiriza nanywetsanga idivai munzu mwa Ariza, owali omusinjilili weinzu yomuruchi.

¹⁰Zimuri yenjila munzu omwo, ne niyeera Ela mana nabukula obwiyangubwe naba omuruchi. Kano kekholekha mumuyika kwamakhumi kabili namusafu kwoburuchi bwa Asa omuruchi wa Yuda.

¹¹Bwangu bwene olwa Zimuri yali niyakhaba omuruchi, yeera abeinzu ya Baasha boosi. Shiyalekhakhwo kata mulala ta. Yeera buli omwikho nende omwitsawe abeshisaatsa.

¹²Kho Zimuri yeera abeinzu ya Baasha boosi okhulondana nende aka OMWAMI Nyasaye yali naboolile okhubirila mumulakusi Yehu.

¹³Baasha nende omusianiwe Ela bali nibabuusiye liruma elia OMWAMI Nyasaye, Nyasaye wa Isiraeli, khulwa okhwinamila ebifwanani nende khandi okhuchila Isiraeli niyonoona.

¹⁴Amakhuwa kandi aka omuruchi Ela yakhola kahandikwa mushitabu shiamakhuwa kobulamu bwahale bwabaruchi ba Isiraeli.

¹⁵Mumuyika kwa amakhumi kabili namusafu kwomuburuchi bwa Asa omuruchi wa Yuda, Zimuri nali mu Tiriza yaruka Isiraeli khulwa tsinyanga musafu. Abelihe ba Abaisiraeli bali nibabotokhananga litookho lia Gibetsoni elili mu Filisitia,

¹⁶ne olwa bahulila mbu, omuruchi Zimuri yali nakholeele omuruchi induli, ne namwiirire, ebise ebio habwene nahabwene, boosi barumbula omusesia wabwe Omuri, owali naliho okhuba omuruchi wa Isiraeli.

¹⁷Mana Omuri nende abelihe boosi ba Abaisiraeli nibarula mu Gibetsoni nibatsia okhubotokhana litookho lia Tiriza.

¹⁸Ne olwa Zimuri yalola mbu litookho libukuulwe, yenjila mushisika shiomukari eshiomunzu yomuruchi mana nahafia inzu yosi omulilo, ne nafwilamwo.

¹⁹Kano kekholekha khulwa okhubela obwonoonibwe bwa yonoonela OMWAMI Nyasaye. Yasinyisia OMWAMI Nyasaye khulwa obwonoonibwe omwene nende khandi okhuchila Abaisiraeli nibonoona, shinga Yeroboamu owamuranjilila yakhola.

²⁰Amakhuwa kandi koosi akomuruchi Zimuri yakhola kahandikwa mushitabu shia Amakhuwa akobulamu bwabaruchi ba Isiraeli.

²¹Abandu ba Isiraeli bakabukhanamwo emikanda chibili, abandi benya Tibuni omusiani wa Ginatsi okhuba omuruchi, nabo abandi benya Omuri okhuba omuruchi.

²²Mukhumalilikha abenya Omuri okhuba omuruchi bahula. Tibuni nafwa mana Omuri naba omuruchi.

²³Kho mumuyika kwamakhumi kataru nende mulala kwoburuchi bwomuruchi Asa wa Yuda, Omuri yakholwa okhuba omuruchi wa Isiraeli, mana naruka khulwemiyika ekhumi nachibili. Emiyika chisasaba chiambeli yaruka nali mu Tiriza.

²⁴Mana nakula eshikulu shia Samaria khulwa ifetsa ebikhumila bisasaba (6,000) okhurula khumundu mbu, Shemeri. Omuri niyombakha lisiisi khushikulu eshio, niyombakhaho litaala, ne nalikulikha mbu, Samaria, eliira liali liamwene eshikulu eshio olwambeli.

²⁵Omuri yonoonela OMWAMI Nyasaye okhushila abaruchi bandi boosi.

²⁶Yabuusia liruma elia OMWAMI Nyasaye, Nyasaye wa Isiraeli khulwa obwonoonibwe nende khulwa okhuchila abandu nibonoona khulwa okhwinamila ebifwanani, shinga Yeroboamu omusiani wa Nebati, owamuranjilila okhuruka yakhola.

²⁷Amakhuwa kandi koosi akomuruchi Omuri yakhola kahandikwa mushitabu shia Amakhuwa kobulamu bwabaruchi ba Isiraeli.

²⁸Omuri yafwa ne nayabilwa mu Samaria mana Ahabu omusianiwe nakalukha mushilenjeshie okhuba omuruchi.

²⁹Mumuyika kwamakhumi kataru namunane okwoburuchi bwa Asa, omuruchi wa Yuda, Ahabu omusiani wa Omuri yaahulwa okhuba omuruchi wa Isiraeli, mana naruka nali mu Samaria khulwemiyika amakhumi kabili nachibili.

³⁰Yonoonela OMWAMI Nyasaye okhushila omuruchi undi yesi owamuranjilila.

³¹Okhumeeta khubwonooni bwomuruchi Yeroboamu yakhola, omuruchi Ahabu yonoona khulwa okhuteshia Yezebeli, omukhaana womuruchi Etsibaali wa Sidoni khandi niyenamila omunyasaye Baali.

³²Yombashila Baali ihekalu mu Samaria, nakaasia eshimalilo shiemisango mana nashira muhekalu.

³³Yasinjisia khandi eshifwanani shiomunyasaye mukhasi Ashera. Yabuusia liruma elia OMWAMI Nyasaye wa Isiraeli okhushila abaruchi bandi boosi aba Abaisiraeli abamuranjilila okhuruka.

³⁴Mutsinyanga tsioburuchibwe, Hiyeli okhurula Betseli yombakha obuyia litookho lia Yeriko. Ne olwa Hiyeli yali niyombakhanga omuse kwelisisi lielitaala elo, omusianiwe omukhulundu oulangwa mbu, Abiramu yafwa. Ne olwa yali namalisinjia okhumbakha ebilibwa, omusianiwe omushe oulangwa mbu, Segubu nafwa. Kano kekholekha butswa shinga olwa OMWAMI Nyasaye yali niyaboola khale okhubirila mu Yoshwa omwana wa Nuni.