Read wanga 1 ABARUCHI 17 Bible Online

1 ABARUCHI 17 - wanga bible

1 ABARUCHI 17

¹Omulakusi Eliya okhurula Tishibe mushialo shia Giliadi yaboolela omuruchi Ahabu ari, “Muliira elia OMWAMI Nyasaye, Nyasaye wa Isiraeli ouliho mwoyo, owekhalabanilanga, ekhuboolelanga mbu, shikhulabakhwoho nelime noho ifula khulwemiyika chibili noho chitaru chitsanga tawe, okhuula olwa ndililaka mbu bibeho.”

²Mana OMWAMI Nyasaye naboolela Eliya ari,

³“Rula hano, otsie ebukwe mana wibise hambi nomwalo kwa Keritsi okuli ebukwe womwalo kwa Yorodani.

⁴Olanywetsanga amaatsi komwalo okwo, nasi endachilisiiye amakhokho okhukhureerera ebiokhulia ebweneyo.”

⁵Kho Eliya nakhola shinga olwa OMWAMI Nyasaye yali namulachilisiiye. Natsia hambi nomwalo kwa Keritsi.

⁶Amakhokho kamureereranga omukaate nende inyama mumabwibwi nende khungoloobe, mana anywa amaatsi komwalo okwo.

⁷Olunyuma lwetsinyanga tsindiiti omwalo okwo kwakhama amaatsi okhuba ifula shiyali niyikwitsanga mushialo eshio tawe.

⁸Mana OMWAMI Nyasaye naboolela Eliya ari,

⁹“Rula otsie mwitaala lia Zarefatsi ahambi nende Sidoni, omenyeyo. Endachilisiiye omukhasi omulekhwa oumenyangayo okhukhuhelesia ebiokhulia.”

¹⁰Kho Eliya natsia Zarefatsi, ne olwa yoola mushilibwa shielitaala elo, yalola omukhasi omulekhwa nareenyanga tsikhwi. Eliya namuboolela ari, “Chama umbekhwo amaatsi kokhunywa.”

¹¹Ne lwomukhasi oyo yali natsitsanga okhureera amaatsi, Eliya yamulanjilisia naboola ari, “Nochama undeererekhwo omukaate endie.”

¹²Omukhasi oyo namukalusia ari, “Muliira elia OMWAMI Nyasaye, Nyasayewo, ouliho mwoyo, nditsuba mbu shiendikhwo nomukaate kwosi kwosi tawe. Eshiendi butswa ninashio nobusie obuhela ifusi nende orufura rutiiti mushimuka. Nditsile hano okhureenya tsikhwi mana enzie endeeshe eshiokhulia shitiiti eshia endi ninashio khulwa isie nende omwana wanje omusiani. Eshio nishio eshilaba eshiokhulia shiefwe shiokhumalilikha mana khutonye khurio inzala okhuula olwa khufwa.”

¹³Eliya namuboolela ari, “Shiolahenda omwoyo tawe. Tsia ingo, oteeshe eshiokhuliashio. Nebutswa oranjilile okhuteekha omukaate mutiiti okhurula khubia oli ninabio ebio, mana undeerere. Ne bulano okaasia eshiokhuliashio nende shiomusianiwo.

¹⁴Okhuba kano niko aka OMWAMI Nyasaye, Nyasaye wa Isiraeli aboola mbu, ‘Obusie shibulahwa munyungu kata amafura mushimuka ta, okhuula inyanga eya isie OMWAMI Nyasaye ndilikwisia ifula khushialo.’ ”

¹⁵Omukhasi oyo natsia nakhola shinga olwa Eliya yali namuboolele. Kho ebiokhulia nibibaho buli nyanga ebia Eliya, omukhasi oyo halala nomwanawe omusiani oyo.

¹⁶Obusie shibwahwakhwo munyungu eyo kata amafura okhuhwa mushimuka ta, shinga olwa OMWAMI Nyasaye yali niyasuubisia okhubirila mu Eliya.

¹⁷Olunyuma lwetsinyanga tsinditi, omusiani womukhasi oyo yalwala, ne naba obubi muno namala nafwa.

¹⁸Omukhasi omulekhwa oyo nareeba Eliya ari, “Omundu wa Nyasaye, eshichila nokhola kano khwisie nishiina? Witsile hano okhwitsulisia Nyasaye obwonooni bwanje nochila omusiani wanje nafwa?”

¹⁹Eliya namuboolela ari, “Mbelesia omwana oyo.” Eliya nabukula omwana oyo okhurula mumakhono komukhasi oyo, ne namuyila hekulu mushikoro shia yali namenyangamwo, namwalisia khushitali.

²⁰Mana Eliya nasaaya nomwoyo omukhongo naboola ari, “OMWAMI Nyasaye, Nyasaye wanje, eshichila nokhola likhuwa libi lino khumukhasi omulekhwa uno nishiina? Yayakholeele aketsimbabasi khandi niyaninda obulayi, ne bulano wiira omusianiwe!”

²¹Mana Eliya niyelambisia omwene khumubili kwomusiani oyo okhuula khataru nasaaya naboola ari, “OMWAMI Nyasaye, Nyasaye wanje, lamusia omwana uno!”

²²OMWAMI Nyasaye nahulila amasaayo ka Eliya, ne omusiani oyo nachaaka okhuheela khandi ne nalamukha.

²³Eliya nabukula omwana oyo, namurusia mushikoro eshio namuyila hasi munzu. Nahelesia omukhasi oyo omwana oyo, namuboolela ari, “Lola, omusianiwo ngwoyu nomulamu!”

²⁴Omukhasi oyo nakalusia naboola ari, “Bulano ndakhamanya mbu, toto oli omundu wa Nyasaye, khandi mbu, OMWAMI Nyasaye toto bwene aboolanga okhubirila mwiwe!”