Read wanga 1 ABARUCHI 18 Bible Online

1 ABARUCHI 18 - wanga bible

1 ABARUCHI 18

¹Olunyumakhwo, mumuyika kwakhataru kweshimiyu eshio, OMWAMI Nyasaye yaboolela Eliya ari, “Tsia omwene imbeli womuruchi Ahabu, nasi ndalakwisia ifula.”

²Mana Eliya natsia. Ne inzala yali indulu muno mu Samaria munyanga etsio,

³mana omuruchi nalanga Obadia, owali omusinjilili weinzu yomuruchi. Obadia yali omundu wenamilanga OMWAMI Nyasaye nomwoyo kwosi.

⁴Ne olwa Yezebeli yali niyeeranga abalakusi aba OMWAMI Nyasaye, Obadia yabukula abalakusi eshikhumi (100) nabafisa mutsimbinga mumikanda chibili, buli mulala abalakusi amakhumi karano, khandi nabahelesia ebiokhulia nende amaatsi.

⁵Mana Ahabu naboolela Obadia ari, “Chenda khutsie khulambuule eshialo khulole tsisebele tsiamaatsi nende emialo, khumanye nikhuba nikhunyala okhunyoola obunyasi okhuhonokosia tsifarasi nende tsipuri tsiefwe tsileshe okhufwa, kho kachile khuleshe okhwiirakhwo kata mulala khumiruko chiefwe tawe.”

⁶Nibafuchilisiania elubeka lweshialo olwa buli mulula khubo atsia okhulambuula, mana nibakabukhana nibatsia tsimbeka tsiahukhane.

⁷Olwa Obadia yali natsitsanga yetsukhana nabukanile nende Eliya. Obadia namumanya, ne niyenama hasi namureeba ari, “Toto bwene niwe, omwami wanje Eliya?”

⁸Naye namukalusia ari, “Nitoto, nisie Eliya. Tsia oboolele omwamiwo Omuruchi mbu endi hano.”

⁹Obadia namureeba ari, “Nilikhuwa shiina libi eliekholile elichila niura mumasila kokhwiirwa nomuruchi Ahabu?

¹⁰Muliira lia OMWAMI Nyasayewo, ouliho mwoyo ekhwitsuubila mbu, omuruchi yakhukhaabile buli habundu mushialo muno. Buli lwomuruchi welihanga nalebe yaboolanga mbu shioli mwihangalie ta, omuruchi Ahabu yakholanga omuruchi welihanga elo, okhwitsuba mbu shioli mwihanga elo tawe.

¹¹Ne bulano wenya mbu enzie emuboolele mbu oli hano?

¹²Ne nikaba Roho wa OMWAMI Nyasaye alakhuchinga nakhurusia hano nakhuyila habundu ahalamanyishe ta, olwa emba neshiboolela Ahabu mbu oli hano, mana aleshe okhukhunyoola aba alanzira. Yitsulila mbu, enzinamilanga OMWAMI Nyasaye nomwoyo kwosi, okhurula neshili omwana omusiani.

¹³Oshili okhuhulilakhwo mbu, olwa Yezebeli yali niyeeranga abalakusi aba OMWAMI Nyasaye, ndabisa abandi khubo eshikhumi (100) mutsimbinga; buli mumbinga abalakusi amakhumi karano mana nibahelesia eshiokhulia nende amaatsi?

¹⁴Kho wakhalachilisia orie mbu, enzie emboolele omuruchi mbu oli hano? Omuruchi alanzira!”

¹⁵Eliya namukalusia ari, “Nditsuba muliira elia OMWAMI Nyasaye, Omwene mahe, ouliho mwoyo, khandi owekhalabanilanga mbu, ndalehaana khumuruchi inyanga yino.”

¹⁶Kho Obadia natsia okhuboolela omuruchi Ahabu, naye Ahabu natsia okhulola Eliya.

¹⁷Olwa yalola Eliya, yamuboolela ari, “Shioli niwe ounyasinjia Isiraeli?”

¹⁸Eliya namukalusia ari, “Isie shienyasinjia Isiraeli tawe. Iwe nende abeinzu ya papawo ninywe abanyasinjia. Mwalekha okhulonda amalako aka OMWAMI Nyasaye, ne nimulonda akabanyasaye ba Baali.

¹⁹Bulano lachilisia abandu okhurula mushialo shia Isiraeli shiosi betse babukaane ninasi khushikulu shia Karimeli. Mana oreere abalakusi ebikhumi bine namakhumi karano (450) abomunyasaye Baali nende abalakusi ebikhumi bine (400) abomunyasaye mukhasi Ashera, aba omukhaye Yezebeli alisiinjia.”

²⁰Mana Ahabu nalanga Abaisiraeli boosi nende abalakusi abomunyasaye Baali okhukhung'ana khushikulu shia Karimeli.

²¹Eliya natsia khubandu nabareeba ari, “Mulabukula oluhoono shiina okhwahula hakari aka mukhoyile okhukhola? OMWAMI Nyasaye naba nali Nyasaye wenywe, mumwinamile, ne omunyasaye Baali naba nali Nyasaye wenywe, mumwinamile.” Nebutswa abandu shibamukalusiakhwo likhuwa liosi liosi tawe.

²²Eliya nababoolela ari, “Nisie sienyene outoonyile khubalakusi aba OMWAMI Nyasaye, omunyasaye Baali ali nabalakusi ebikhumi bine nende amakhumi karano (450).

²³Mureere hano tsisirusi tsibili, mana abalakusi aba Baali babukule abeene ndala, bachisinze, ne bachitonyemwo ebitonye mana bare ebitonye ebio khutsikhwi nebutswa balahafikhwo omulilo tawe. Siesi ndalabukula eyindi eyo, echisinze, echitonyemwo ebitonye mana ebire khutsikhwi etsio. Nebutswa shindalahafiakhwo omulilo tawe.

²⁴Mana abalakusi ba Baali basaaye khumunyasaye wabwe, nasi siesi esaaye khu OMWAMI Nyasaye, ne ouhulila amasaayo kefwe mana areere omulilo, oyo niye Nyasaye!” Mana abandu boosi nibaboola bari, “Akoboolile namalayi.”

²⁵Eliya naboolela abalakusi ba Baali bari, “Yaahule ndala khutsisurusi tsino, mana inywe muranjilile, muchikaasie khulwa okhuba ninywe abanji. Musaaye omunyasaye wenywe, nebutswa mulahafiekhwo omulilo tawe.”

²⁶Nibabukula isirusi ya bali nibareererwe, nibachikaasia mana nibasaaya Baali okhurula mumabwibwi okhuula mushiteere hakari. Basaaya nomwoyo omukhongo nibaboola bari, “Omunyasaye Baali khurecheresie!” Ne nibatsiililila okhushina nibabotokhana eshimalilo shiemisango eshia bali nibakaasiye. Nebutswa omunyasaye wabwe oyo shiyahulila amasaayo kabwe tawe.

²⁷Ahambi khusa yakhasasaba mushiteere, Eliya nachaaka okhubatseshelela naboola ari, “Saaye nomwoyo omukhongo! Ye nomunyasaye! Haundi tsindoolo tsimuyilile noho ahuluukhanga, noho utsiile oluchendo! Haundi wiyalisiye ne, okhuula mumubuusie!”

²⁸Kho abalakusi abo nibasaaya nomwoyo omukhongo nibekhalaka emibili chiabwe nemibano nende amafumo shinga olwa eshiima shiabwe shialinji, okhuula amatsayi nikachaaka okhuratsa.

²⁹Batsiililila okhukhola oluyoka nende okhwikholokhosia shinga abalalu okhuula khungoloobe, khubise biokhukhola omusango. Nebutswa abulaho owabakalusia kata okhubarecheresia tawe.

³⁰Mana Eliya naboolela abandu ari, “Site hambi hano.” Mana boosi nibakhung'ana aha yali. Niyombakha obuyia eshimalilo shiemisango eshia OMWAMI Nyasaye eshiali nishiakwisibwa hasi.

³¹Nabukula amachina ekhumi nakabili, elala khulwa buli oluyia, khutsimbia ekhumi natsibili tsia Abaisiraeli, etsiakulikhwa ameera kabasiani ekhumi nababili ba Yakobo, owa OMWAMI Nyasaye yakulikha mbu, Isiraeli.

³²Yombashila OMWAMI Nyasaye eshimalilo shiemisango niyekhoonyelanga amachina ako. Nayaba omutaro omukhongo okhushibotokhana, kwali okunyala okhutsukhwamwo amaatsi kahela tsilita ekhumi natsine.

³³Mana nara tsikhwi khushimalilo shiemisango eshio, nateta isurusi eyo mubitonye mana nabira khushimalilo shiemisango eshio. Naboola ari, “Yitsusie tsisiongo tsine amaatsi, mana mutsushe khushihaanwa shiomusango eshio nende khutsikhwi etsio.” Nabo nibakhola bario.

³⁴Khandi nababoolela ari, “Tsushekhwo khandi amaatsi kandi kario.” Khandi nibatsukhakhwo bario olwakhabili. Nababoolela khandi ari, “Kalushile okhutsukhakhwo khandi.” Kho nibatsukhakhwo khandi bario olwakhataru.

³⁵Amaatsi nikakholomokha okhurula khushimalilo shiemisango eshio nikatsia mumutaro okwo, niketsulamwo.

³⁶Khubise biokhukhola omusango kweshiteere, omulakusi Eliya yasita khushimalilo shiemisango eshio mana nasaaya naboola ari, “Iwe OMWAMI Nyasaye, Nyasaye wa Aburahamu, Isaka nende Yakobo, lolesia bulano mbu, niwe Nyasaye wa Isiraeli khandi mbu, isie endi omukhalabaniwo khandi ekholile kano koosi khulwa amalachilisioko.

³⁷Urecheresie bulano OMWAMI Nyasaye, urecheresie kho abandu bano bamanye mbu, iwe OMWAMI Nyasaye, niwe Nyasaye, khandi mbu obakalusinjia khwiwe omwene.”

³⁸OMWAMI Nyasaye nareera omulilo nikusamba eshihaanwa eshio, tsikhwi nende amachina, khandi nikusamba liloba mana nikukhamia amaatsi akali mumutaro koosi.

³⁹Olwa abandu abo balola amakhuwa ako, bakwa hasi mana nibayula nomwoyo omukhongo nibaboola bari, “OMWAMI Nyasaye, niye Nyasaye, OMWAMI Nyasaye yenyene niye Nyasaye!”

⁴⁰Eliya nalachilisia abandu ari, “Tiile abalakusi bomunyasaye Baali bano boosi, shimulaleshekhwo omundu yesi yesi okhwilukha tawe!” Abandi nibabatiila boosi, mana Eliya nabayila mwibanda liomumwalo kwa Kishoni, ne nabeera boosi.

⁴¹Mana Eliya naboolela omuruchi Ahabu ari, “Bulano tsia olie. Embulilanga okhuhoola khweifula.”

⁴²Olwa Ahabu yali natsitsanga okhulia, omulakusi Eliya yatsia khushikulu shia Karimeli, niyenama hasi, omurwekwe nikuula hakari wamasikamoke.

⁴³Eliya naboolela omukhalabaniwe ari, “Tsia ohenje elubeka lweinyanza. Omukhalabani oyo natsia nahengayo.” Nachelela naboolela Eliya ari, “Shiendutsikhwo eshindu tawe.” Eliya namuboolela akhandi musafu okhutsia okhuhengayo.

⁴⁴Olukhola musafu, omukhalabani oyo yachelela naboolela Eliya ari, “Enduutsi akhaleesi khatiiti akholachelaasia nomukhono kwomundu ta, nikharulanga munyanza.” Eliya nalachilisia omukhalabaniwe oyo ari, “Tsia oboolele omuruchi Ahabu yenjile mwikaarilie, akalushe ingowe ifula niyishili okhumwikalila okhutsia.”

⁴⁵Mushise shitiiti, likulu liali limalile okhufunikhwa namaleesi amakhongo. Omuyeka nikuchaaka okhuhutsa mana ifula inyinji niyichaaka okhukwa. Omuruchi niyenjila mwikaarilie niyenyokha okhutsia Yezerili.

⁴⁶Obunyali bwa OMWAMI Nyasaye, nibwitsa khu Eliya, niyeboha obutinyu ebifwalobie mushishienje mana niyelukha khunjila imbeli wa Ahabu okhuula Yezerili.