Read wanga 1 ABARUCHI 19 Bible Online

1 ABARUCHI 19 - wanga bible

1 ABARUCHI 19

¹Omuruchi Ahabu naboolela Yezebeli, omukhayewe, amakhuwa koosi aka Eliya yali nakholile nende khandi shinga olwa yali namuluule abalakusi nolukanga, abalakusi ba Baali boosi.

²Yezebeli narumila Eliya oburume buno naboola ari, “Abanyasaye bakhoya baakhupa ndafwa, nikaba mbu, okhuula khubise shinga bino mukamba, shindalaba nekhukholeele aka okholile khubalakusi abo tawe.”

³Eliya natiilwa noburi, mana niyelukha khulwa okhwihonokosia. Yabukula omukhalabaniwe mana nibatsia Berisheba mu Yuda. Eliya nalekha omukhalabaniwe habundu yaho,

⁴ne nachenda eshiteere shiosi mushitsiimi. Yasinjila mana niyekhala hasi mushinikha shiomusaala mana niyekomba okhufwa. Nasaaya naboola ari “Kano kambelile OMWAMI Nyasaye, nochama bukula obulamu bwanje. Nobulayi kata nindakhafwiile!”

⁵Yeyalisia hasi womusaala okwo mana tsindoolo nitsimuyila. Bwangu bwene omumalaika niyetsa namutiilakhwo, namuboolela ari, “Buukha, olie eshiokhulia.”

⁶Eliya yahenga, ne nalola omukaate nende eshimuka shiamaatsi nibili hamurwe. Yalia omukaate okwo khandi nanywa amaatsi, ne niyeyalisia hasi.

⁷Omumalaika oyo nakalukha khandi namubuusia olukhola khabili, naboola ari, “Buukha olie, oluchendo lwakhaba olutinyu khwiwe.”

⁸Eliya nabuukha, nalia khandi nanywa, mana ebiokhulia ebio nibimumeeta amaani, nanyalilwa okhuchenda tsinyanga amakhumi kane, natsitsanga khushikulu eshitakatifu shia Sinai.

⁹Habwene yaho yenjila mumbinga okhwiyalisia. Bwangu bwene OMWAMI Nyasaye namureeba ari, “Eliya, nishiina shiokholanga hano?”

¹⁰Naye nakalusia ari, “OMWAMI Nyasaye owobunyali, ekhukhalabanilanga iwe wenyene buli lwosi. Nebutswa Abaisiraeli bafunaache indakano yabwe ninawe, basaasiye nibakwisia ebimalilo biemisangobio, khandi beerire abalakusibo boosi. Nisie sienyene, outoonyile, ne khandi bakhabanga okhunzira!”

¹¹OMWAMI Nyasaye namuboolela ari, “Rula elwanyi osinjile imbeli wanje khubutenje bweshikulu.” Mana OMWAMI Nyasaye nabiraho, ne naruma imbumbuyeka niyaarasia ebikulu nende okhwaraka tsinyanda. Nebutswa OMWAMI Nyasaye shiyali mumbumbuyeka eyo tawe. Imbumbuyeka eyo niyilekha okhuhutsa, mana eshialo nishirenga. Nebutswa OMWAMI Nyasaye shiyali mukhurenga okhwo tawe.

¹²Olunyuma lweshialo okhurenga, omulilo kwaakha, nebutswa OMWAMI Nyasaye shiyali mumulilo okwo tawe. Olunyuma lwomulilo okwo, omwoyo kwahulilikha nikuboola kaala.

¹³Olwa Eliya yahulila omwoyo okwo, yafuunikha obwenibwe neikanzuye mana narula natsia nasinjila hamuliango weimbinga eyo. Omwoyo okwo nikumureeba kuri, “Eliya, nishiina shiokholanga hano?”

¹⁴Eliya namukalusia ari, “OMWAMI Nyasaye wobunyali, ekhukhalabanilanga iwe wenyene buli lwosi. Nebutswa Abaisiraeli bafunaache indakano yabwe ninawe, basasiye nibakwisia ebimalilo biemisango, khandi beerire abalakusibo boosi. Nisie sienyene outoonyile, ne khandi bakhabanga okhunzira!”

¹⁵OMWAMI Nyasaye namuboolela ari, “Kalushila khunjila ya wayetseelekhwo, ne otsie mushitsiimi shia Damasiko. Olwa wulayo, winjile mwitookho elo, mana otsushilile Hazaeli amafura nomwahula okhuba omuruchi wa Siria.

¹⁶Otsushilile Yehu omwana wa Nimushi amafura nomwahula okhuba omuruchi wa Isiraeli, khandi otsushilile Elisha omusiani wa Shefati okhurula Abeli Mehola amafura, kho mbu akalushe mushilenjeshio okhuba omulakusi.

¹⁷Hazaeli alachaka okhwira abandu benamilanga Baali. Yehu aleera abandu abehonokokha okhurula khu Hazaeli; naye Elisha aleera abehonokokha okhurula khu Yehu.

¹⁸Nebutswa abandu ebikhumila musafu (7,000) abamenyile mu Isiraeli shibaleerwa tawe, boosi abali abaahule khwisie khandi abalayenamilakhwo Baali kata okhutsunzuuna eshifwananishie tawe.”

¹⁹Eliya narulaho natsia, ne nanyoola Elisha nalimanga netsing'ombe tsiheyi tsibili khwichoki. Baliho abasaatsa bandi ekhumi nababili imbeliwe, buli mulala nalimanga netsiheyi tsibili khwichoki. Eliya natsia ewa bali mana nafuuba eshiifwaloshie khu Elisha.

²⁰Elisha nalekha tsing'ombetsie, ne namulondakhwo tsimbilo naboola ari, “Chama enzie efumbeelele papa nende mama nebaseebula, mana ndiitse khutsie ninawe.” Eliya namukalusia ari, “Nobulayi, tsia. Shiekhwikalila tawe!”

²¹Mana Elisha nakalukha khutsing'ombe tsia yali nalimilanga, natsisinza, nateekha inyama yatsio niyekhoonyelanga lichoki elo shinga tsikhwi. Yahelesia abandu abo inyama eyo ne nibalia. Mana natsia nalonda khu Eliya, naba omukhoonyeleliwe.