Read wanga 1 ABARUCHI 2 Bible Online

1 ABARUCHI 2 - wanga bible

1 ABARUCHI 2

¹Olwa Daudi yali nali ahambi okhufwa yalanga omusianiwe Solomoni mana namulachilisia amebaalo kano naboola ari,

²“Ebise bianje biokhufwa biulile. Ume ikholo khandi obe oweitswoni,

³khandi okhole koosi aka OMWAMI Nyasayewo akhulachilisia okhukhola. Olonde amalako nende amalachilisioke koosi akahandikwa mumalako ka Musa, kho mbu hosi hosi ahotsia onyalilwe mubuli eliokhola.

⁴Noba nomuhulila, OMWAMI Nyasaye alalinda nende okhuusia aka yakhusuubisia, olwa yamboolela mbu, abolwibulo lwanje baliruka Isiraeli oluhoono olwa baba nobumanyilisi bwokhulonda amalakoke mubwisikwa nomwoyo nende amapaaro kabwe koosi.

⁵“Okhumeetakhwo, witsulila aka Yoabu omusiani wa Zeruyia yakhola khulwa okhwiira abaseesia babili belihe lia Isiraeli, Abuneri omusiani wa Neri nende Amasa omusiani wa Yetsuri. Witsulila shinga olwa yabeera mubise biomulembe khulwa okhumala eshikwoli khulwa abandu babali nibeera nibali mwihe. Yeera abandu ababula eshikha ne bulano nisie ouchinjile obwonoonibwe obwo, ne nisie ounyoolanga eshinyasio eshio.

⁶Omanyile shiokhoyile okhumukholela. Shiolamulekha yabaho omulamu okhuula olwa afwa mubukofubwe tawe.

⁷“Nebutswa obeele abasiani ba Barizilayi, womushialo shia Giliadi, ne obalinde obulayi shichila baandolela tsimbabasi olwa ndali nindilukhanga okhurula khumusiani wenywe Abusalomu.

⁸Khandi aliho Shimeyi omusiani wa Gera, okhurula mwitookho lia Bahurimu womuluyia lwa Benjamini. Yalaama eshilaamo shiobubi obululu inyanga ya ndatsia khu Mahanayimu, nebutswa olwa yaakaana ninasi khumwalo kwa Yorodani, ndamusuubisia nemwitsuubila muliira elia OMWAMI Nyasaye mbu, shindalamwiira tawe.

⁹Nebutswa olalekha okhumuhelesia eshinyasio tawe. Omanyile shionyala okhukhola, okhuula olole mbu yerwa.”

¹⁰Mana Daudi nafwa, ne nayabilwa mwitookholie lia Yerusalemu.

¹¹Yali naruchile Isiraeli khulwemiyika amakhumi kane, yaruka nali Heburoni emiyika musafu, ne nali Yerusalemu emiyika amakhumi kataru nende chitaru.

¹²Solomoni naba omuruchi olunyuma lwa Daudi samwana, ne oburuchibwe niburalila muno.

¹³Inyanga yindi Adoniya yatsia okhulola Batsisheba nyinamwana omuruchi Solomoni. Batsisheba nareeba Adoniya ari, “Witsile okhucheniya nomulembe noho?” Naye nakalusia ari, “Kali kario.”

¹⁴Mana Adoniya naboola ari, “Endikhwo nelikhuwa elia enzenya okhukhureeba.” Batsisheba namureeba ari, “Nilikhuwa shiina?”

¹⁵Naye namukalusia ari, “Omanyile mbu, nisie owali nikhoyile okhuba omuruchi, khandi mbu, buli mundu mu Isiraeli yapaaranga mbu kalaba kario. Nebutswa akekholeshe nakandi mana omusiani wefwe niyemekhwa okhuba omuruchi, shichila khwali okhwenya okhwa OMWAMI Nyasaye.

¹⁶Ne bulano endi nende likhuwa elala elia enzenya okhukhusaba, nochama olaloba tawe.” Batsisheba namureeba ari, “Nilikhuwa shiina?”

¹⁷Naye nakalusia ari, “Chama oreebe omuruchi Solomoni mbu yafuchilile embukule Abishagi, owokhurula Shunemu abe omukhasi wanje.”

¹⁸Batsisheba namukalusia ari, “Nobulayi, ndalatsia ekhureebele khumuruchi.”

¹⁹Kho Batsisheba natsia okhureeba omuruchi. Omuruchi nasinjila okhushiesia nyinamwana khandi namwinamila. Ne omuruchi niyekhala khushifumbishie shioburuchi khandi nalanga eshindi shireerwe eshia nyinamwana yekhalakhwo elubeka lwomukhono omusaatsa.

²⁰Batsisheba naboola ari, “Endi nende likhuwa lituutu lienzenya okhukhusaba mbu ukholele. Shiolaloba tawe.” Naye nakalusia ari, “Mama, saba, shiendoba ta.”

²¹Batsisheba naboola ari, “Chama omusaini wenywe Adoniya abukule Abishagi, omukhasi Omushunamu okhuba omukhasiwe.”

²²Omuruchi nareeba nyinamwana ari, “Eshichila niwenya mbu, efuchilile Abishagi abe omukhasiwe nishiina? Onyala haundi kata okhusaba mbu emuhelesiekhwo oburuchi aruche noho. Kata kario ye nomukhulundu khwisie khandi omwisaaliisi Abiatsari nende Yoabu bali elubekalwe!”

²³Mana omuruchi Solomoni niyetsuba muliira elia OMWAMI Nyasaye naboola ari, “Nyasaye akhoya yakhupa ndafwa nemba nindaleera Adoniya khulwa okhusaba kano ta!

²⁴Nyasaye yaralisiye muno khuburuchi bwa papa wanje Daudi. Yoosiye obusuubisiebwe mana niyambelesia isie nende abolwibulo lwanje lihanga. Nditsuba muliira elia OMWAMI Nyasaye ouliho mwoyo mbu, Adoniya alafwa inyanga yino!”

²⁵Kho omuruchi Solomoni nalachilisia Beneyia omusiani wa Yehoyiada mbu atsie yeere Adoniya.

²⁶Omuruchi Solomoni naboolela Abiatsari ari, “Rula otsie mushialo shienywe shia Anatsotsi. Iwe okhoyile okhwirwa, nebutswa shindalakhwira bulano ta, shichila iwe wali omusinjilili wa Lisanduku lia Indakano eya OMWAMI Nyasaye, olwa wali noli nende papa wanje Daudi, ne khandi wasanjilana ninaye mumatinyuke.”

²⁷Solomoni naleshesia Abiatsari obwisaaliisi. Kho nakhola likhuwa elia OMWAMI Nyasaye yali niyaboola nali Shilo okhulondokhana khumwisaaliisi Eli nende abolwibulolwe okhuusibwa.

²⁸Yoabu nahulila akali nikekholeeshe. (Ye yali niyonga Adoniya omukhono, ne shiyayonga Abusalomu tawe.) Kho Yoabu niyelukha natsia tsimbilo mwiheema elia OMWAMI Nyasaye, mana natiila khutsikona tsine tsieshimalilo shiemisango.

²⁹Olwa Solomoni yamanya mbu, Yoabu yali niyeluushe natsiile mwiheema, ne yali nasinjiile natiilile khushimalilo shiemisango, yaruma abandu okhureeba eshichila Yoabu niyelukha natsia khushimalilo shiemisango. Yoabu namukalusia mbu, yeluushe natsia khwiheema elia OMWAMI Nyasaye shichila ariire omuruchi Solomoni. Kho omuruchi Solomoni naruma Beneyia okhutsia okhwira Yoabu.

³⁰Beneyia natsia mwiheema litakatifu naboolela Yoabu ari, “Omuruchi alachile mbu, orule mwiheema.” Yoabu nakalusia, ari, “Tawe. Ndalafwila butswa hano.” Beneyia nakalukha khumuruchi namuboolela aka Yoabu yali naboolile.

³¹Solomoni naboolela Beneyia ari, “Khola shinga olwa Yoabu aboolile. Omwiire mana omuyabile. Kho isie noho omundu yesi womulwibulo lwa Daudi aleshe okhubakhwo neshikha khulwa aka Yoabu yakhola olwa yeera abandu ababula eshikha tawe.

³²OMWAMI Nyasaye alahelesia Yoabu eshinyasio khulwa eshitsayi shiayaraatsia papa wanje Daudi nalamanyile tawe. Yoabu yeera abasaatsa babili abali abalunjishi okhumushila ye mwene. Yali Abuneri omuseesia welihe lia Abaisiraeli nende Amasa omuseesia wabelihe lia Yuda.

³³Eshinyasio shieshikha shiamatsayi ako shilaba khu Yoabu nende khubolwibulolwe inziayo. Nebutswa OMWAMI Nyasaye alahelesinjia abolwibulo lwa Daudi abekhalanga khushifumbishie shioburuchi obuhuli buli lwosi.”

³⁴Mana Benayia natsia mwiheema litakatifu, ne niyeera Yoabu, ne namuyabila mumukundakwe mushitsiimi.

³⁵Omuruchi nakhola Benayia omusiani wa Yehoyiada okhuba omuseesia wabelihe nabukula obwiyangu bwa Yoabu, naye omwisaaliisi Zadoki nakalukha mubwiyangu bwomwisaaliisi Abiatsari.

³⁶Mana omuruchi Solomoni nalanga Shimeyi ne namuboolela ari, “Wiyumbashile inzu hano Yerusalemu, omenyemwo nebutswa olarulaho watsiakhwo habundu undi hosi hosi tawe.

³⁷Inyanga yorulaho, ne niwambukha libanda lia Kidironi, omanye mbu toto olafwa. Eshikha shieshitsayishio shiba shilaba khwiwe omwene.”

³⁸Shimeyi nakalusia omuruchi ari, “Akoboolile namalayi. Omusumbawo alakhola shinga omwami wanje ouli omuruchi aboolile.” Mana Shimeyi namenya mwitookho lia Yerusalemu emiyika eminji muno.

³⁹Nebutswa olunyuma lwemiyika chitaru abasumba babili ba Shimeyi belukha nibatsia khumuruchi welitookho lia Gatsi oulangwa mbu Akishi omusiani wa Maaka.

⁴⁰Shimeyi yatsia niyekhala khusishiliye natsia khumuruchi Akishi mu Gatsi okhukhaaba abasumbabe abo. Yabanyoola mana nabakalusia ingowe.

⁴¹Olwa omuruchi Solomoni yamanya mbu Shimeyi yali narulile Yerusalemu, ne natsile khwitookho lia Gatsi khandi nacheleele,

⁴²yalanga Shimeyi namureeba ari, “Shindakhukhola okhwitsuba muliira elia OMWAMI Nyasaye mbu, shiolarulakhwo Yerusalemu ta? Khandi ndakhuchetsiyia mbu niwitsukhana wakholakhwo orio, okhuula wirwe. Shiwafuchilila mana nosuubisia mbu olambulila?

⁴³Eshichilile bulano nofunaka obusuubisie obwo mana nokhaya okhulonda lilako lianje nishiina?”

⁴⁴Omanyile obulayi bwene mumwoyokwo amabi koosi akawakholela papa wanje. OMWAMI Nyasaye alakhuhelesia eshinyasio khulwa amakhuwa ako.

⁴⁵Nebutswa alahelesia ikhabi khandi alakhola lihanga lia Daudi okhuba nomulembe inziayo.

⁴⁶Mana omuruchi nalachilisia Benayia okhwira Shimeyi. Natsia namukhupa namwiira. Omuruchi Solomoni bulano nabukula oburuchi bwosi.