Read wanga 1 ABARUCHI 20 Bible Online

1 ABARUCHI 20 - wanga bible

1 ABARUCHI 20

¹Omuruchi Benihadadi wa Siria yakhung'asia halala abelihebe, khandi nakhoonywa nende abaruchi bandi amakhumi kataru nababili nibali nende tsisishili tsiabwe nende amakaari kabwe. Yachaka okhutsia nabotokhana litookho lia Samaria mana naliseera.

²Yaruma abarume mwitookho khumuruchi Ahabu wa Isiraeli okhuboola ari, “Omuruchi Benihadadi aboolanga mbu

³omuleshele ifetsayo nende itsahabuyo, abakhasibo nende abaanabo bamaani.”

⁴Ahabu naboola ari, “Boolele omwami wanje omuruchi Benihadadi mbu, efuchiliile, anyala okhumbukula kata isie nende buli shindu shiendi ninashio.”

⁵Olunyumakhwo, abarume abo nibakalukha khu Ahabu noburume bundi okhurula khumuruchi Benihadadi naboola bari, “Ndakhurumila likhuwa mbu, umbelesie ifetsayo nende itsahabuyo, abakhasibo nende abaanabo.

⁶Bulano khandi ndalaruma abakhongo banje, betse bakhabilisie munzuyo yoburuchi nende mutsinzu tsiabakhongobo, nibabukula buli shindu shiabalola mbu neshiobukusi obukhongo. Balabayo mutsuli khubise shinga bino.”

⁷Omuruchi Ahabu nalanga halala abemilisi boosi beshialo eshio, mana nababoolela ari, “Lolekhwo shinga omundu uno yenyanga okhukhusasia. Yarumila oburume niyenyanga abakhasi banje nende abaana banje, ifetsa nende itsahabu yanje, nasi nefuchilila okhumuhelesia.”

⁸Abemilisi nende abandu abo boosi nibaboolela Ahabu bari, “Shiolahulilakhwo amakhuwake kata okhufuchilila aka yenyanga tawe.”

⁹Kho Ahabu naboolela abarume ba Benihadadi ari, “Muboolele omwami wanje omuruchi muri, ‘Omukhalabaniwo alakhola koosi akawenya olwambeli, nebutswa akakhabili shianyala okhufuchilila tawe.’ ” Abarume abo nibakalukhayo mana nibaboolela Benihadadi amakalusio ako.

¹⁰Benihadadi naruma oburume bundi khandi khu Ahabu ari, “Ndalareera abasaatsa abanji abahela okhusasia litookholio lino nende okhuchinga olufu lwalio mubikalo biabwe. Abanyasaye bakhoya bakhupa ndafwa, nindilakhola ako tawe!”

¹¹Omuruchi Ahabu nakalusia ari, “Muboolele omuruchi Benihadadi mbu, omulwani omululu yeyitsialanga olunyuma lwelihe.”

¹²Omuruchi Benihadadi yaboolelwa oburume obwo, olwa ye nende abaruchi bandi abamukhoonyanga bali nibanywetsanga idivai mumaheema kabwe. Nalachilisia abelihebe mbu, berecheshe okhuseera litookho, kho nibatsia niberechekha nobuyingo okhuseera.

¹³Ebise ebio, omulakusi natsia khumuruchi Ahabu namuboolela ari, “OMWAMI Nyasaye aboola ari, ‘Shiolaria shichila mbu, abelihebe nabanji tawe! Ndalakhunyalila okhubahula inyanga yino, ne olamanya mbu, nisie OMWAMI Nyasaye.’ ”

¹⁴Ahabu nareeba ari, “Niwiina oulemilila lihe nibatsia okhuseera?” Omulakusi oyo nakalusia ari, “OMWAMI Nyasaye aboola mbu, abelihe abaraaka abemililungwa nabakafuna, nibo abalaseera.” Omuruchi nareeba mbu, niwiina oulachachia abelihe obokhulwana beene. Omulakusi oyo namukalusia ari, “Niwe oulachachia.”

¹⁵Kho omuruchi nalanga abelihe abaraaka abali hasi wobwimilisi bwabakafuna abeseesia belihe boosi ebikhumi bibili nende amakhumi kataru nababili (232). Mana nalanga abelihe ba Isiraeli ebikhumila musafu (7,000).

¹⁶Lihe elo liachaaka mushiteere hakari, olwa Benihadadi nende abaruchi abo amakhumi kataru nende babili bali nibanywetsanga idivai mumaheema kabwe.

¹⁷Abelihe abaraka baranjilila okhuseera. Abarunilisi bomuruchi Benihadadi yali narumile okhuhenjelesia, betsa nibamuboolela mbu omukanda kwabelihe kwali nikwitsanga okhurula Samaria.

¹⁸Nabalachilisia ari, “Mubatiile kata nibaba nibetsanga okhulwana noho okhukhaaba omulembe.”

¹⁹Abelihe abaraka abo nibemilila okhuseera, ne nibalondwakhwo nabelihe ba Isiraeli,

²⁰ne buli mundu yeeranga omundu wa aba nalwananga ninaye. Abasiria nibelukha, nibatafibungwa obululu nende Abaisiraeli, nebutswa Benihadadi yelushila khufarasiye, halala nende abelihebe abokhutsifarasi.

²¹Omuruchi Ahabu narula natsia habundu helihe liali, natiila tsisishili nende amakaari mana niyeera Abasiria abanji.

²²Mana omulakusi nakalukha khu Ahabu ne namuboolela ari, “Kalukha ingowo, mana orecheshe abelihebo, ne orecheshe akolakhola mubuchesichesi, shichila omuruchi wa Siria alakhuseera khandi mutsinyanga tsieshirumbi.”

²³Abakhongo bomuruchi Benihadadi bamuboolela bari, “Abanyasaye ba Abaisiraeli, nabanyasaye bomubikulu, niko akachilile Abaisiraeli nibakhuhula. Nebutswa toto khulabahula nikhuba nikhubalwana mumuhololokhwe.

²⁴Bulano orusie abakhongo amakhumi kataru nababili khubwimilisi bwabwe bwelihe mana mubwiyangu bwabwe oreho abelihe bomushikuri.

²⁵Mana orecheshe abelihe abanji bahelana nende abelukha okhurula khwiwe, nende tsisishili namakaari. Khulalwana Abaisiraeli mumuhololokhwe, ne khulabahula olwene luno.” Omuruchi Benihadadi nafuchilila amakhuwa kabwe mana nalonda amebaalo kabwe.

²⁶Mutsinyanga tsieshirumbi tsiomuyika kwalondakhwo, yarechekha abelihebe mana narula natsia ninabo khwitookho lia Afeki okhuseera Abaisiraeli.

²⁷Abaisiraeli balangwa mana nibarechekhwa nebimanulwa. Barula nibatsia nibakhupa ikambi mumikanda chibili nibahengane nende Abasiria. Abaisiraeli balolekha shinga orutuuli rubili rwetsimbusi, khu Abasiria abali abanji nibasalaanile eshialo shiosi.

²⁸Omulakusi oyo natsia khumuruchi Ahabu, ne namuboolela ari, “Kano niko aka OMWAMI Nyasaye aboola ari, ‘Khulwa okhuba Abasiria baboolanga mbu, endi omunyasaye wokhubikulu, oulali owa mumuhololokhwe ta, ndalakhunyalila okhuhula abelihe babwe abanji abo, mana iwe nende abandubo mulamanya mbu, nisie OMWAMI Nyasaye.’ ”

²⁹Abasiria nende Abaisiraeli bamenya mutsikambi tsiabwe etsiali nitsiahengana khulwa tsinyanga musafu. Ne nibachaka okhulwana khunyanga yumusafu, mana Abaisiraeli nibeera Abasiria ebikhumi eshikhumila (100,000).

³⁰Abehonolokha belukha nibatsia mwitookho lia Afeki, ewa lisiisi lielitookho elo liakwa khubandi khubo ebikhumila amakhumi kabili namusafu (27,000). Omuruchi Benihadadi yesi yelukha niyenjila mwitookho mana niyebisa munzu mushikoro shiomukari bwene.

³¹Abakhongo ba Benihadadi nibatsia khuye nibamuboolela bari, “Khuhuliile mbu, abaruchi ba Isiraeli nabetsimbabasi. Okhufuchilile khutsie khumuruchi wa Isiraeli nikhwifwalile amakunia mubishienje biefwe nende emikoye mumakosi kefwe, haundi anyala okhukhubeela tsimbabasi, ne nalekha okhukhwira iwe.”

³²Kho nibeboha amakunia mubishienje biabwe nende emikoye mumakosi kabwe mana nibatsia khumuruchi Ahabu nibamuboolela bari, “Benihadadi omukhalabaniwo akhusaaya mbu nochama olamwiira tawe.” Ahabu nabareeba ari, “Ashiliho mwoyo? Nobulayi! Ali shinga omusiani wefwe khwisie!”

³³Abakhongo ba Benihadadi bali nibakhabanga injila yokhumanyilisia komuruchi Ahabu yali napaaranga mumwoyokwe, ne olwa Ahabu yarumbulakhwo butswa mbu, “Omusiani wefwe,” bamukalusia bwangu bari, “Oboola habwene! Iwe nende Benihadadi muli abasiani bomundu mulala.” Ahabu nababoolela ari, “Tsie mumureere.” Olwa Benihadadi yetsa, Ahabu yamuninia mwikaarilie.

³⁴Benihadadi naboolela Ahabu ari, “Ndalakhukalusilia amataala koosi aka papa wanje yanuula papawo; mana wikaasilie omwene habundu hokhukholela inganga mu Damasiko shinga butswa olwa papa wanje yali niyakhola mu Samaria.” Ahabu namukalusia ari, “Ndalakhulekhuula otsie shichila khufuchilisaniye khumakhuwa kano.” Nakhola indakano ninaye, mana Benihadadi nakalukha ingowe.

³⁵Omundu undi mulala khubalakusi yaboolela owashie nalachilisiibwe nende OMWAMI Nyasaye ari, “Khupa!” Nebutswa omundu oyo naloba okhumukhupa.

³⁶Omundu oyo naboolela owashie oyo ari, “Khulwa okhuba okhayile okhuhulila lilako elia OMWAMI Nyasaye, italanyi yilakhwiira bwangu bwene olwa undekha.” Ne bwangu bwene olwa yamulekha, italanyi yetsa ne niyimwiira.

³⁷Omulakusi tsana oyo natsia khumusaatsa undi, namuboolela ari, “Khupa!” Mana omusaatsa oyo namukhupa. Yamukhupa ingumi obutinyu muno namusaalisia.

³⁸Omulakusi oyo naboha obwenibwe neshitambaya khulwa okhwikalukhasia, kho omundu aleshe okhumumanya, mana natsia ne nasinjila khumuhanda, nalindanga omuruchi wa Isiraeli okhubira.

³⁹Ne lwomuruchi yali nabirangaho, omulakusi oyo yalanjilisia naboola ari, “Omwami, ndabeele nelwananga mwihe, lwomusikari yareerire omusuku owahambwa, ne niyamboolela ari, ‘Oliinde omundu uno, niyetsukhana yelukha, oba olarunga nobulamubwo, noho nomurungo kweifetsa ebikhumila bitaru (3,000).’

⁴⁰Nebutswa endiyiishe nemilimo chindi, ne omusuku oyo niyelukha.” Omuruchi nakalusia ari, “Omwene orumbule eshinyasioshio; ne okhuula orunje omurungo okwo.”

⁴¹Omulakusi oyo narusia eshitambaya eshio mubwenibwe, ne omuruchi namumanyilisia bwangu, okhuba mulala khubalakusi.

⁴²Omulakusi oyo naboolela omuruchi ari, “Kano niko aka OMWAMI Nyasaye aboola, ‘Khulwa okhubeela oleshile omundu oyo niyelukha owa ndabeele nendachilisiye mbu yeerwe, bulano olafwa mushilenjeshie, nabo abelihebo baleerwa mushilenje shiabelihebe.’ ”

⁴³Omuruchi Ahabu nakalukha ingowe Samaria nariire khandi nabeeleele.