Read wanga 1 ABARUCHI 21 Bible Online

1 ABARUCHI 21 - wanga bible

1 ABARUCHI 21

¹Kwaliho omukunda kwemitsabibu kwomundu mbu Nabotsi; okwali mwibanda lia Yezerili hambi neyinzu yoburuchi, yomuruchi Ahabu.

²Inyanga yindi Ahabu yaboolela Nabotsi ari, “Lekha embukule omukundakwo kwemitsabibu, shichila kuli ahambi nende inzu yanje yoburuchi, khandi ndenya okhukwikhoonyela khulwa okhurakamwo eliani. Ndalakhuhelesia omukunda kundi omulayi noho niwenya ndalakhurunga omurungo omulayi.”

³Nabotsi namukalusia ari, “Omukunda kwemitsabibu kuno nokwobulaame bwanje okhurula khubakuuka banje. Ne OMWAMI Nyasaye yakaana mbu, shindalakhuhelesia tawe!”

⁴Ahabu niyenyokha natsia ingowe nakhuuniiye hamoni khandi nasinyiishe muno, khulwa amakhuwa ka Nabotsi yali namubooleele. Ahabu niyeyalisia khushitalishie nahenjile khwisisi, khandi naloba okhulia eshiokhulia shiosi shiosi.

⁵Yezebeli, omukhasiwe niyetsa namureeba ari, “Eshichila nobeeleele muno nishiina? Eshichila nolalia ta nishiina?”

⁶Ahabu namukalusia ari, “Khulwa okhuba embooleele Nabotsi mbu, ‘Ungusie omukundakwo kwemitsabibu, noho niwenya ndalakhuhelesia omukunda kundi kwemitsabibu mushilenje shiakwo.’ Nebutswa Nabotsi alobile naboola ari, ‘Shindalakhuhelesia omukunda kwanje kwemitsabibu tawe.’ ”

⁷Yezebeli namuboolela ari, “Shioli niwe omuruchi wa Isiraeli? Buukha orule mushitali olie eshiokhulia! Shiolahenda omwoyo tawe. Ndalakhunyoolela omukunda kwa Nabotsi kwemitsabibu okwo.”

⁸Kho Yezebeli nahandika tsibarwa muliira liomuruchi, ne narakhwo eshibalikho shiomuruchi Ahabu. Naruma tsibarwa etsio khubakhulundu nende abemilisi belitookho lia Yezirili.

⁹Yezebeli yahandika mutsibarwa etsio ari, “Murumbule inyanga yokhwiyima eshiokhulia, ne mukhung'asie halala abandu mana mwikhasie Nabotsi habundu holuyali.

¹⁰Mureereho abandu ababeeyi babili bamwinjilile nibaboola mbu, yanyechile eliira lia Nyasaye nende omuruchi. Mana mumuyile elwanyi welitookho, ne mumulase namachina afwe.”

¹¹Kho abakhulundu nende abemilisi bomwitookho abo, nibakhola shinga olwa Yezebeli yali nababooleele okhubirila mutsibarwa tsia yali nabahandichiile.

¹²Nibarumbula inyanga yokhwiyima eshiokhulia, ne nibakhung'asia abandu boosi halala mana nibekhasia Nabotsi habundu holuyali.

¹³Ababeeyi babili abo nibetsa nibekhala imbeliwe, nibamwinjilila habulafu mbu anyechile Nyasaye nende omuruchi, mana Nabotsi nayilwa elwanyi welitookho, ne nalaswa namachina nafwa.

¹⁴Mana abandu abo nibaruma oburume khu Yezebeli bari, “Nabotsi alasilwe namachina, ne ufwile.”

¹⁵Bwangu bwene olwa Yezebeli yahulilakhwo butswa mbu, Nabotsi alasilwe namachina ne nafwa, yaboolela Ahabu ari, “Rula otsie obukule omukunda kwemitsabibu kwa Nabotsi Omuyezerili, okwa yali niyaloba okhukusia. Shiashiliho omulamu ta, umalile okhufwa.”

¹⁶Olwa Ahabu yahulila mbu, Nabotsi umalile okhufwa, yarula nakholomokha okhubukula omukunda kwemitsabibu kwa Nabotsi.

¹⁷Mana OMWAMI Nyasaye naboolela Eliya, omulakusi okhurula Tishibe ari,

¹⁸“Otsie khumuruchi Ahabu wa Samaria. Olamunyoola nali mumukunda kwemitsabibu okwa Nabotsi, nali ahambi okhukubukula.

¹⁹Omuboolele mbu, isie OMWAMI Nyasaye emureeba endi, ‘Niwakhamala okhwira omundu khandi obukula emianduchie?’ Omuboolele mbu kano niko aka isie OMWAMI Nyasaye emboola mbu, ‘Habundu tsana aha tsimbwa tsikhombeele amalasile ka Nabotsi, niho aha tsilakhombela amalasileko!’ ”

²⁰Olwa Ahabu yalola Eliya yamureeba ari, “Omusuku wanje, leelo omalile okhunyoola?” Eliya nakalusia ari, “He, leelo ekhunyoolile, wihaanile omwene okhukhola obwonooni imbeli ewa OMWAMI Nyasaye.

²¹Kho OMWAMI Nyasaye aboola khwiwe ari, ‘Ndalakhureerera amatinyu. Ndalakhurusiaho nende okhwira buli mundu weshisaatsa mubeinzuyo, abatiiti nende abakhongo.

²²Abeinzuyo balaba shinga abeinzu yomuruchi Yeroboamu, omusiani wa Nebati, khandi shinga abeinzu yomuruchi Baasha omusiani wa Ahiya, shichila mubuusiye liruma lianje khulwa okhukhola Abaisiraeli okhwonoona.’

²³Ne khu Yezebeli omukhasiwo, OMWAMI Nyasaye aboola mbu, tsimbwa tsilalia omubilikwe mwitookho lia Yezerili.

²⁴Omwikhowo yesi oufwiila mwitookho, omubilikwe kulalibwa netsimbwa, ne omundu yesi yesi oufwiila elwanyi welitookho omubilikwe kulalibwa netsingosia.”

²⁵(Shialikhwoho omundu undi yesi mu Isiraeli, owehaana okhukhola obwonooni imbeli ewa OMWAMI Nyasaye shinga Ahabu yakhola, natsuubilwe nomukhasiwe Yezebeli tawe.)

²⁶Yakhola obwonooni obubi obweshisinyo khulwa okhwinamila ebifwanani shinga olwa Abamori bakholanga, aba OMWAMI Nyasaye yali niyarusia mushialo eshio olwa Abaisiraeli bali nibenjilangamwo.

²⁷Olwa Eliya yamala okhuboola, Ahabu yarandula ebifwalobie, niyefwalula mana niyefwala ebifwalo biamakunia. Naloba okhulia eshiokhulia shiosi, niyeyalisia mubifwalo biamakunia, ne natsia nasinyiishe khandi nabeeleele.

²⁸OMWAMI Nyasaye naboolela omulakusi Eliya, ari

²⁹“Omanyilekhwo shinga olwa Ahabu yetuutuyiyie omwene imbeli wanje? Khulwa okhuba yetuutuyiyie, shindalareera amatinyu nashiliho mwoyo tawe. Nebutswa ndalareera amatinyu ako mutsinyanga tsiomusianiwe, nende khubeinzu ya Ahabu.”