Read wanga 1 ABARUCHI 22 Bible Online

1 ABARUCHI 22 - wanga bible

1 ABARUCHI 22

¹Omulembe kwaliho hakari welihanga lia Isiraeli nende elia Siria khulwemiyika chibili echialondakhwo,

²nebutswa mumuyika kwakhataru, omuruchi Yehoshafati wa Yuda yatsia okhulola omuruchi Ahabu wa Isiraeli.

³Ahabu nareeba abakhongobe ari, “Shimumanyile mbu litookho lia Ramotsi elili mu Giliadi neliefwe ta? Kho eshichila nikhulalibukula okhurula khumuruchi wa Siria nishiina?”

⁴Ne Ahabu nareeba omuruchi Yehoshafati ari, “Olatsia ninasi okhuseera litookho lia Ramotsi?” Yeshofati namukalusia ari, “Isie ndirecheeshe okhutsia ninawe, nende abelihe banje halala nende abokhutsifarasi lwolaba niwirecheeshe.

⁵Nebutswa lekha khuranjilile khureebe OMWAMI Nyasaye.”

⁶Kho Ahabu nalanga abalakusi hambi ebikhumi bine (400), mana nabareeba ari, “Enzie eseere litookho lia Ramotsi noho ta?” Nabo nibaboola bari, “Tsia oliseere, OMWAMI Nyasaye alakhunyalila okhuhula.”

⁷Nebutswa Yehoshafati nareeba ari, “Shialikhwoho omulakusi undi wakhunyala okhureeba OMWAMI Nyasaye tawe?”

⁸Omuruchi Ahabu nakalusia Yehoshafati ari, “Ashiliho omundu mulala owakhunyala okhureeba OMWAMI Nyasaye okhubirila muye, nebutswa ndamuloba shichila shialakulangakhwo amakhuwa amalayi khwisie ta, habula buli lwosi arumbulanga amabi khwisie. Niye Mikaya omusiani wa Imula.” Yehoshafati namukalusia ari, “Omuruchi shiakhoyile okhuboola ario tawe.”

⁹Kho Ahabu nalanga mulala khubakhongobe beshiina mana namuboolela ari, “Tsia, oreere Mikaya omusiani wa Imula bwangu.”

¹⁰Abaruchi babili abo, nibefwalile ebifwalo biabwe bioburuchi, bali nibekhaale khubifumbi biabwe bioburuchi habundu habaseselanga imele, nabo abalakusi boosi nibarumbulanga obulakusi imbeli wabwe.

¹¹Mulala khubalakusi abo, oulangwa mbu, Zedekia omusiani wa Kenaana yeranya tsinzika okhurula khushibia mana naboolela Ahabu ari, “Kano niko aka OMWAMI Nyasaye aboola ari, ‘Olalwana Abasiria netsinzika tsino, ne olabahula boosi pe.’ ”

¹²Abalakusi bandi boosi balakula amakhuwa malala ako, nibaboola bari, “Seera litookho lia Ramotsi mu Giliadi, ne olalihula, shichila OMWAMI Nyasaye alakhunyalila okhuhula.”

¹³Omukhongo watsia okhulanga Mikaya yaboolela Mikaya ari, “Abalakusi bandi boosi balakuulenje amakhuwa amalayi akobuhuli khumuruchi, kho bwakhaba obulayi niwakhalakula wesi orio.”

¹⁴Nebutswa Mikaya namukalusia ari, “Muliira elia OMWAMI Nyasaye ouliho mwoyo, ekhusuubisia mbu, ndalaboola aka Nyasaye yamboolela!”

¹⁵Olwa yoolaho, omuruchi Ahabu yamureeba ari, “Mikaya, isie nende omuruchi Yehoshafati khunyala okhutsia okhuseera litookho lia Ramotsi noho ta?” Mikaya nakalusia ari, “Tsie muliseere, okhuba OMWAMI Nyasaye alamunyalila okhulihula.”

¹⁶Nebutswa Ahabu nakalusia ari, “Buli lwoboola ninasi muliira elia OMWAMI Nyasaye, oboolenje obwatoto! Ekhukhole okhwitsuba okhuula khanga khumakhuwa ako?”

¹⁷Mikaya namuboolela ari, “Endolanga abelihe lia Isiraeli nibasalaanile khushikulu shiosi shinga amakondi akabula omwayi.” Ne OMWAMI Nyasaye aboola ari, “Abandu bano babula omwimilisi, lekha bakalushe ingo wabwe mumulembe.”

¹⁸Omuruchi Ahabu naboolela Yehoshafati ari, “Shiekhubooleele mbu shialakulangakhwo likhuwa liosi liosi lilayi khwisie ta, habula buli lwosi amabi konyene?”

¹⁹Mikaya natsiililila okhuboola ari, “Bulano recheresia aka OMWAMI Nyasaye aboola! Enduutsi OMWAMI Nyasaye niyekhaale khushifumbishie shioburuchi mwikulu, ne abamalaikabe nibasinjiile halubekalwe.

²⁰OMWAMI Nyasaye nareeba ari, ‘Niwiina oulakaatia Ahabu kho mbu atsie yerirwe Ramotsi?’ Abandi khubamalaikabe nibaboola amakhuwa malala, nabo abandi nibaboola akahukhane

²¹Okhuula roho nasita imbeli niyetsa khu OMWAMI Nyasaye naboola ari, ‘Ndalamukaatia.’

²²OMWAMI Nyasaye nareeba ari, ‘Olamukaatia orie?’ Roho oyo namukalusia ari, ‘Ndalatsia mana ekhole abalakusi ba Ahabu boosi okhulakula obubeeyi.’ OMWAMI Nyasaye naboola ari, ‘Tsia, mana omukaatie. Olanyalilwa.’ ”

²³Mikaya namalilisia okhuboola ari, “Kano niko akekholeeshe. OMWAMI Nyasaye akholile abalakusibo bano okhukhubeeya. Nebutswa ye omwene alachile mbu, olanyoola amatinyu!”

²⁴Mana omulakusi Zedekia natsia khumulakusi Mikaya, ne namupaama olukhofi mubweni, namureeba ari, “Roho owa OMWAMI Nyasaye yayetsile nyanga shiina, nakhuboolela amakhuwa ako?”

²⁵Mikaya nakalusia ari, “Olamanya ako lwotsia okhwifisa mushikoro shieinyuma.”

²⁶Omuruchi Ahabu nalachilisia mulala khubakhongobe ari, “Tiile Mikaya mumuyile khu Amoni, omukafuna welitookho nende khu Yoashi, omusiani womuruchi.

²⁷Obaboolele mbu, bamure mumbohe, nibamuliisia omukaate nende amaatsi okhuula olwa engalukha mumulembe.”

²⁸Mikaya namuboolela ari, “Noba nokalukha mumulembe, kho OMWAMI Nyasaye shiabooleele mwisie tawe!” Khandi nameeta okhuboolela abandu ari, “Murecheresie akemboolile!”

²⁹Mana omuruchi Ahabu wa Isiraeli nende omuruchi Yehoshafati wa Yuda, nibatsia okhuseera litookho lia Ramotsi elili Giliadi.

³⁰Ahabu naboolela Yehoshafati ari, “Olwa khutsia mwihe, ndalekalukhasia okhufwana khwanje, endeshe okhumanyikha tawe, nebutswa iwe wifwale ebifwalobio bioburuchi.” Kho omuruchi Ahabu natsia mwihe niyekalukhasiye okhufwanakhwe.

³¹Omuruchi wa Siria yali nalachile abaseesiabe amakhumi kataru nababili (32) abamakaari ketsifarasi mbu, balakhupakhwo omundu undi yesi ta, habula omuruchi wa Isiraeli.

³²Olwa abaseesia bamakaari ketsifarasi balola Yehoshafati, bapaara mbu, niye omuruchi wa Isiraeli, ne nibakalukha okhumuseera. Nebutswa Yehoshafati yayula obutinyu,

³³mana abaseesia abo nibalola mbu shiali ye omuruchi wa Isiraeli ta, ne nibalekha okhumuseera.

³⁴Nebutswa mulala khubelihe lia Abasiria yetsukhana nalasile obuyingobwe nibufumira omuruchi Ahabu mubulimaanilo bwebimanulwabie bieshibia nende biokhwiteetsa eshilifu. Ahabu niyayula obutinyu naboolela owali niyelusinjia likaarilie ari, “Esalisiibwe! Shiukhana, urusie mwihe!”

³⁵Obulwani bwatsiilila inyanga yosi, naye Ahabu natoonyile naleteleelwe mwikaarilie nahengane nende Abasiria. Yaraatsa amalasile amanji, mana niketsula mwikaarilie, ne nafwa khungoloobe inyanga eyo.

³⁶Olwa eliuba liali niliyelanga, omundu undi okhurula mubelihe lia Isiraeli yaboola nomwoyo omukhongo ari, “Buli mundu akalushe mushialoshie nende mwitookholie!”

³⁷Kho omuruchi Ahabu nafwa, ne nibamureera Samaria nibamuyabilayo.

³⁸Boosia likaarilie elo mwiyabo lia Samaria ewa abakhasi abatamba beyosia mumalasileke, natsio tsimbwa nitsikakhomba shinga butswa OMWAMI Nyasaye yali niyamala okhulachilisia.

³⁹Amakhuwa kandi koosi aka omuruchi Ahabu yakhola, halala nende obwinoosi shinga olwa inzuye yoburuchi yali niyasiaywa nameno keinzofu, nende amatookho koosi aka yombakha kahandikwa mushitabu shiamakhuwa kakhale kobulamu bwabaruchi ba Isiraeli.

⁴⁰Ahabu nafwa mana Ahazi omusianiwe nakalukha mushilenjeshie okhuba omuruchi.

⁴¹Yehoshafati omusiani wa Asa yachaaka okhuruka Yuda mumuyika kwakhane kwoburuchi bwomuruchi Ahabu wa Isiraeli.

⁴²Yehoshafati yali nemiyika amakhumi kataru nachirano olwa yachaaka okhuruka, ne yaruka khulwemiyika amakhumi kabili nachirano mu Yerusalemu. Eliira lia nyinamwana liali Azuba, omukhaana wa Shiluhi.

⁴³Yehoshafati yakhola akobulunjishi imbeli ewa OMWAMI Nyasaye, shinga olwa Asa, samwana owamuranjilila okhuruka yakhola. Nebutswa shiyasasia habundu hokhwinamila ebifwanani tawe, nabo abandu nibatsiililila okhuhaanilaho emisango nende okhusambilaho obubane.

⁴⁴Omuruchi Yehoshafati yali nomulembe hakariwe nende omuruchi wa Isiraeli.

⁴⁵Amakhuwa kandi koosi akomuruchi Yehoshafati yakhola, amakhuwake keitswoni nende amaheke, kahandikwa mushitabu shiamakhuwa kakhale kobulamu bwabaruchi ba Yuda.

⁴⁶Yarusiaho abasaatsa nende abakhasi abatamba, boosi abakhalabananga khubimalilo biemisango biebifwanani, aba Asa samwana yali niyalekhaho mutsinyangatsie.

⁴⁷Eshialo shia Edomu shishiali nomuruchi mutsinyanga etsio tawe. Shiarukungwa nende omukhoonyeleli womuruchi, owa omuruchi wa Yuda yali niyaahula.

⁴⁸Omuruchi Yehoshafati yakaasia tsimeeli tsiokhunyanza okhutsia okhwenda itsahabu mushialo shia Ofiri; nebutswa tsiamala tsifunishile Ezionigeberi, nitsilatsia ta.

⁴⁹Mana Ahazia, omusiani wa Ahabu naboolela Yehoshafati ari, “Chama abakhalabani banje batsiile halala nabakhalabanibo mutsimeelitsio.” Nebutswa Yehoshafati yakaana.

⁵⁰Yehoshafati nafwa, ne nayabilwa mumbinga tsioburuchi mwitookho lia Daudi, naye omusianiwe mbu, Yehoramu nakalukha mushilenjeshie okhuba omuruchi.

⁵¹Ahazia omusiani wa Ahabu yachaaka okhuruka Isiraeli mu Samaria, mumuyika kwekhumi namusafu kwoburuchi bwomuruchi Yehoshafati, omuruchi wa Yuda. Ahazia yaruka Isiraeli khulwemiyika chibili.

⁵²Yakhola obwonooni imbeli wa OMWAMI Nyasaye, shichila yakhola amakhuwa amabi aka Ahabu samwana nende Yezebeli nyinamwana nende akomuruchi Yeroboamu omusiani wa Nebati bakhola, nibachila Abaisiraeli nibonoona.

⁵³Yenamila khandi nakhalabanila omunyasaye Baali, mana nabuusia liruma lia OMWAMI Nyasaye, Nyasaye wa Isiraeli, shinga samwana owamuranjilila okhuruka yakhola.