Read wanga 1 ABARUCHI 3 Bible Online

1 ABARUCHI 3 - wanga bible

1 ABARUCHI 3

¹Omuruchi Solomoni nakaasia obwitsa nende omuruchi wa Misiri khulwa okhuteshia omukhaanawe. Solomoni nareera omukhaana oyo okhumenya mwitookho lia Daudi, okhuula olwa yali namalile okhumbakha inzuye, Ihekalu eya OMWAMI Nyasaye nende olukoba okhubotokhana Yerusalemu.

²Abandu bali nibashihaanilanga emisango chiabwe khushimalilo shiosi shiosi shichila bali nibashili okhumbashila OMWAMI Nyasaye Ihekalu.

³Solomoni yaheela OMWAMI Nyasaye, ne nalonda amebaalo ka Daudi samwana, nebutswa yesi yasinza tsisolo nasamba obubane khubimalilo biemisango biahukhane.

⁴Inyanga yindi Solomoni natsia Gibeoni okhumala emisango shichila ebweneyo niyo weshimalilo shiemisango eshikhongo khandi eshioluyali shalinji. Yali niyahaana khale emisango emisambe echihela eshikhumila khushimalilo shiemisango eshio.

⁵Eshilo shiene eshio OMWAMI Nyasaye namuloleshela mwilooro namureeba ari, “Nishiina eshia wenya ekhuhelesie?”

⁶Solomoni nakalusia ari, “Walolosiyenje obuheeli oburalilu khu Daudi papa wanje shichila yali omwisiikwa khwiwe khandi omulunjishi, ne mumwoyokwe yali omukololofu. Watsiililiile okhulolosia obuheeli obwo khuye, ne wamuhelesiye omwana omusiani ourukanga bulano.

⁷OMWAMI Nyasaye, Wunyalile isie okhuba omuruchi okhukalukha mushilenje shia papa wanje, kata olwa eshili omwana khandi shiemanyile okhuruka abandu tawe.

⁸Endi hano hakari mubandu ba waahula okhuba abobo, abali abanji muno abalanyala okhubalwa ta.

⁹Kho umbelesie obuchesi bwekhoyile okhuba ninabwo okhuruka abandubo munjila ya habwene nende okhumanyilisia okhwahukhasia amalayi nende amabi. Nolakhola orio ta, kho ndakhanyala endie okhuruka abandubo abanji bano?”

¹⁰OMWAMI Nyasaye nachamisibwa shichila mbu, Solomoni yali nasabile obuchesi.

¹¹OMWAMI Nyasaye namuboolela ari, “Khulwa okhuba osabile obuchesi bwokhuruka habwene, ne nolasaba okhumenyaho oluhoono noho obuyinda kata abasukubo okhufwa ta,

¹²ndalakhuhelesia akosabile. Ndalakhuhelesia obuchesi obunji nende obumanyilisi okhushila bwomundu undi yesi ashili okhubakhwo ninabwo ta, khandi bwomundu undi yesi shialibakhwo ninabwo tawe.

¹³Ndalakhuhelesia khandi akolasabile ta. Mubulamubwo bwosi olaba omuyinda khandi owoluyali okhushilakhwo lwomuruchi undi yesi.

¹⁴Ne noba niumbulila nolonda amebaalo kanje nende amalako kanje shinga papawo Daudi yakhola, ndalakhukhola omenyeho oluhoono olurambi.”

¹⁵Mana Solomoni nabuukha okhurula mundoolo, ne namanya mbu, OMWAMI Nyasaye aboolilenje ninaye mumalooro. Mana natsia Yerusalemu, nasinjila imbeli welisanduku lieindakano eya OMWAMI Nyasaye, ne nahaanila OMWAMI Nyasaye emisango emisambe nende echiokhureera omulembe. Olunyuma lwa ako nakaasilia abakhongobe boosi lisabo nibalia.

¹⁶Inyanga yindi abakhasi abatamba babili betsa nibasinjila imbeli womuruchi Solomoni.

¹⁷Mulala khubo naboolela omuruchi ari, “Omwami wanje, isie nende omukhasi uno khumenyanga munzu ndala, ne ndayeebule omwana omusiani nikhuli ninaye munzu.

¹⁸Olunyuma lwetsinyanga tsibili nindibuule omwana wanje, yesi khandi niyebula omwana omusiani. Omundu undi yesi shiabelekhwoho tawe.

¹⁹Inyanga yindi fwesi nikhwiyalisiye, tsindoolo nitsikhuyilile, yakalukhana nakona nafinya omwanawe mana omwanawe oyo nafwa.

²⁰Ne olwa tsindoolo tsiali nitsishimbilile isie, yabuukha nabukula omwana wanje okhurula khushitali shianje. Nabukula omwana wanje niyalisia khushitalishie, ne nabukula owuwe owali nafwile niyalisia khushitali shianje.

²¹Nibushiele mutsuli olwa ndabuukha nenzia okhuliisia omwana wanje, ndanyoola nafwiile. Ndamuhenga obulayi bwene, ne nendola mbu, shiali omwana wanje tawe.”

²²Omukhasi undi oyo nakalusia naboola ari, “Tawe! Omwana ouliho mwoyo nowanje, ne owafwa nowuwo.” Omukhasi owaranjilila nakalusia ari, “Tawe! Omwana wafwa nowuwo, naye ouliho mwoyo nowanje!” Mana nibayingana imbeli womuruchi.

²³Mana omuruchi naboola ari, “Buli mulala khwinywe aboolanga mbu, omwana ouliho mwoyo nowuwe, ne owafwa nowa owashie.”

²⁴Mana narumana mbu, bareere olukanga, ne olwa lwareerwa

²⁵naboola ari, “Khalaka omwana ouliho mwoyo uno ebitonye bibili mana ohelesie buli mulala eshitonyeshie.”

²⁶Nyinamwana mwene nali nobuheeli obunji mumwoyokwe khumwanawe yaboolela omuruchi ari, “Omwami wanje, nochama shioleera omwana uno tawe! Muhelesie butswa omukhasi uno!” Nebutswa omukhasi undi oyo nakaana naboola ari, “Shiolahelesiakhwo mulala khwifwe ta, mukhalachemwo butswa ebitonye bibili.”

²⁷Mana Solomoni naboola ari, “Shioleera omwana oyo tawe! Helesia omukhasi ouranjilile okhuboola niye nyinamwana mwene.”

²⁸Olwa Abaisiraeli bahulilakhwo shinga Solomoni yali nakhalache omuse okwo, boosi bamuhelesia oluyali olukhongo muno, shichila bamanya mbu, Nyasaye yali namuhelesiye obuchesi bwokhuyaasinjia emise habwene.