Read wanga 1 ABARUCHI 4 Bible Online

1 ABARUCHI 4 - wanga bible

1 ABARUCHI 4

¹Solomoni yali omuruchi welihanga lia Isiraeli liosi.

²Ne abemilisibe abakhongo bali bano, omwisaaliisi yali Azaria omusiani wa Zadoki.

³Abahandichi aha yakhalachilanga emise bali Elihorefu nende Ahiya abasiani ba Shisha. Omusinjilili wamahandiko yali Yehoshafati omusiani wa Ahiludi.

⁴Omuseesia wabelihe yali Benayia omusiani wa Yehoyiada. Abesaaliisi bali Zadoki nende Abiatsari.

⁵Omwimilisi omukhongo wabakhongo bandi yali Azaria omusiani wa Natsani. Omuchetsiyi womuruchi yali omwisaaliisi Zabudi omusiani wa Natsani.

⁶Omwimilisi omukhongo wabomunzu yomuruchi yali Ahisha. Owasinjililanga emilimo chiokhulunyibwa yali Adoniramu omusiani wa Abuda.

⁷Solomoni yaahula abasaatsa ekhumi nababili okhuba abasinjilili bamahanga kandi ka Isiraeli. Abasinjilili abo bali abokhureeranga ebiokhulia okhurula mumahanga ako khumuruchi nende abeinzuye. Buli omusinjilili yalinji nende omwesikwe kwokhureera ebiokhulia lulala khumuyika.

⁸Bano nibo abali abasinjilili abo nende amahanga kabwe. Benihuri yasinjilila eshialo shieshikulu shia Efuraimu.

⁹Bendekari yasinjililanga amatookho, ka Makazi, Shalibimu, Betsi Shemeshi, Eloni nende Betsi Hanani.

¹⁰Benhesedi yasinjililanga amatookho ka Arubotsi nende Soko nende lihanga lia Hefari liosi.

¹¹Benabinadabu owateshia Tafatsi, omukhaana wa Solomoni yasinjililanga lihanga lia Dori liosi.

¹²Baana omusiani wa Ahiludi yasinjililanga amatookho ka Taanaki, Megido nende eshialo shiosi eshili hambi Betsi Shani, hambi nelitaala lia Zaretsani elili emasaba welitookho lia Yezerili okhuula khwitookho lia Abeli Mehola nende elia Yokimeamu.

¹³Bengeba yasinjililanga amatookho ka Ramotsi akali mushialo shia Giliadi nende amataala kali mu Giliadi akoluyia lwa Yairi owolwibulo lwa Manase nende eshialo shia Arigobu eshili Bashani, amataala amakhongo amakhumi kasasaba nikabotokhasibwa olukoba nende emiyiinjilo chiemikasa khubilibwa.

¹⁴Ahinadabu omusiani wa Ido yasinjililanga eshialo shia Mahanaimu.

¹⁵Ahimaazi owali niyateshia Basematsi omukhaana wa Solomoni undi yasinjililanga eshialo shia Nafutali.

¹⁶Baana omusiani wa Hushai yasinjililanga eshialo shia Asheri nende litaala lia Bealotsi.

¹⁷Yehoshafati omusiani wa Parwa, yasinjililanga eshialo shia Isakari.

¹⁸Shimeyi omusiani wa Ela yasinjililanga eshialo shia Benjamini.

¹⁹Geberi omusiani wa Uri yasinjililanga eshialo shia Giliadi, eshiarukungwa nomuruchi Sihoni wa Abamori nende omuruchi Ogu wa Beshani. Okhumeeta khu ekhumi nababili abo, yaliho omusinjilili mulala omukhongo khuboosi.

²⁰Abandu ba Yuda nende aba Isiraeli bali abanji shinga omuyeshe kwomunyanza. Balia nende okhunywa nibekura khandi nibasangaala boosi.

²¹Lihanga liomuruchi Solomoni lialinji okhuchaachila khumwalo kwa Yufurate okhuula Filisitia nende okhuula khulwakho lwa Misiri. Amahanga kano karunganga obushuru khumuruchi khandi abandu ba amahanga ako balinji abasumbabe mubulamu bwabwe bwosi.

²²Ebiokhulia bia Solomoni yekhoonyelanga buli khunyanga bialinji ebimwelo amakhumi kataru biobusie obunyushe nende ebimwelo amakhumi kasasaba biobusie obuhandale.

²³Tsing'ombe tsianera ekhumi nende etsindi amakhumi kabili tsiayanga mulwayilo, amakondi eshikhumi nende tsimbongo, ebitsusu, tsikongoni nende tsingokho.

²⁴Solomoni yarukanga eshialo shiosi eshili mumbo womwalo kwa Yufurate okhurula khwitookho lia Tifusa elili khumwalo okwo okhuula mumbo welitookho lia Gaza. Abaruchi boosi abali mumbo womwalo kwa Yufurate bali mubunyalibwe, ne yalinji nomulembe nende amahanga kandi koosi akamubotokhana.

²⁵Olwa yali nashiliho mwoyo, abandu ba Yuda nende Isiraeli bamenyanga nomulembe; buli mundu nomukundakwe kwemitseituni nende kwemikhuyu.

²⁶Solomoni yali netsisishili ebikhumila amakhumi kane (40,000) khulwa amakaarike, nabo abandu bachendela khusishili ebikhumila ekhumi nabibili (12,000)

²⁷Abasinjililibe ekhumi nababili abo, buli mundu khumwesi yareeranga ebiokhulia biomuruchi Solomoni yenyanga khulwa ye mwene nende khulwa abo boosi abali nibamenya ninaye munzu. Bareeranga buli shindu shienyekhanga.

²⁸Buli omusinjilili yareeranga omukabokwe kwa ishayiri nende olububa lwetsisishili ewa bienyekhanga khulwa tsisishili nende tsisolo tsiokhwilushilakhwo.

²⁹Nyasaye yahelesia Solomoni obuchesi, obumanyi nende obumanyilisi obunji shinga omuyeshe kwomunyanza.

³⁰Solomoni naba omuchesi okhushilakhwo abachesi bebukwe nende aba Misiri.

³¹Yali omuchesi okhushila abandu boosi. Yali omuchesi okhushila Etsana Omuezirahi nende Hemani, Kalikoli nende Darida abasiani ba Maholi mana oluyalilwe nilutswana mumahanga kandi koosi aka yali niyamenya hambi ninako.

³²Yakaasia tsinjelo ebikhumi bitaru (3,000) nende tsinyimbo eshikhumila shilala nende tsirano (1,005)

³³Yenoosia emisaala eminji okhurula khumisiita echili Lebanoni okhuula khumabinu akamelanga khulukoba, khandi yenoosia tsisolo, amanyonyi, nende ebilonje bimoolanga nende tsinyeni.

³⁴Abandu betsimbia tsiosi abahulilakhwo akobuchesibwe betsa okhuhulila obuchesi bwa Solomoni.