Read wanga 1 ABARUCHI 5 Bible Online

1 ABARUCHI 5 - wanga bible

1 ABARUCHI 5

¹Omuruchi Hiramu wa Tiro yaliinji omwitsa womuruchi Solomoni. Ne olwa yahulilakhwo mbu, Solomoni akaluushe mushilenje shia Daudi samwana okhuba omuruchi, yaruma abasumbabe khu Solomoni.

²Omuruchi Solomoni namukalusia Hiramu ari,

³“Omanyile mbu khulwa okhubeela amahe ka buli lwosi, Daudi papawanje yalwananga abasuku bamahanga akamubotokhana. Shiyanyala okhumbakha Ihekalu yokhwinamilamwo OMWAMI Nyasaye ta, okhuula olwa yamunyalila okhuhula abasukube boosi.

⁴Nebutswa bulano OMWAMI Nyasaye wanje yahelesiye obuhulushi nomulembe khutsinzakho tsianje tsiosi. Shiendikhwo nabasuku noho kata amatinyu koosi akanyala okhuuseera tawe.

⁵OMWAMI yasuubisia papa wanje Daudi naboola ari, ‘Omusianiwo, owa ndaahula okhuba omuruchi olunyumalwo niye oulinyumbashila isie Ihekalu.’ Bulano enduutsi mbu, enyumbashe Ihekalu eyo yokhwinamilamwo OMWAMI Nyasaye wanje.

⁶Kho orume abandubo Lebanoni baarikandile emisaala chiemisiita. Abakholi banje balakhoonyana ninabo, ne ndalarunga abakholibo omurungo kwosi okwolenya. Witsulile mbu, abakholi banje shibamanyile okhurikanda emisaala obulayi shinga aboobo tawe.”

⁷Olwa omuruchi Hiramu yahulilakhwo amakhuwa akomuruchi Solomoni yekhoya nasaangaala muno naboola ari, “OMWAMI Nyasaye yetsoomibwe inyanga yino owahelesia Daudi omwana omusiani omuchesi, okhuruka abandube boluyali mushilenjeshie!”

⁸Hiramu namurumila omulome naboola ari, “Embuliile oburumebwo bworumile. Ne ndirecheeshe okhukhola akosabile, ndalakhuhelesia emisaala chiemisiita nende emitarakwe khulwa okhwara tsimbao.

⁹Abakholi banje balakholomosia ebirundu biemisaala echio nibarusia Lebanoni nibareera khunyanza, mana balabiboha halala nibabikholomosia khumaatsi okhuula habundu aha wenya. Habwene yaho abakholi banje balabolola ebirundu ebio, nabo abakholibo nibabibukula. Khulwa iwe okhurunga, ndalenya ohelesie abandu banje ebiokhulia.”

¹⁰Kho Hiramu nahelesia omuruchi Solomoni ebirundu biemisaala chiemisiita nende emitarakwe chiosi echia yenya;

¹¹naye Solomoni namuhelesia tsitani ebikhumila amakhumi kabili (2,000) tsieingano, nende tsilita ebikhumi ebikhumila amakhumi kane tsiamafura kemitseituni. Solomoni yahaananga ebiokhulia ebio buli khumuyika.

¹²OMWAMI Nyasaye nalinda obusuubisie obwo mana nahelesia omuruchi Solomoni obuchesi. Omulembe kwaliho hakari wa Hiramu nende Solomoni, mana nibakaasia Indakano hakari wabwe.

¹³Omuruchi Solomoni nakhola abandu ebikhumila amakhumi kataru okhuba abakholi bokhulunyibwa okhurula mu Abaisiraeli.

¹⁴Mana nakhola Adoniramu okhuba omukhongo wabwe. Nabakabulamwo emikanda chitaru chiabandu ebikhumila ekhumi, ne buli omukanda kwamenyanga emiesi chibili Lebanoni mana benyokha.

¹⁵Solomoni yali khandi nende abakholi ebikhumila amakhumi munane (80,000) mushikulu nibaaraanga amachina, nende abakholi ebikhumila amakhumi musafu (70,000) abokhukachinga.

¹⁶Yabukula abasinjilili ebikhumila bitaru nebikhumi bitaru (3,300) okhuba abakhongo babwe khumilimo echio.

¹⁷Abakholi abo bayaba amachina amakhongo kobukusi akokhuchachia omuse kwa Ihekalu shinga omuruchi yali nalachilisiye.

¹⁸Abakholi ba Solomoni, aba Hiramu nende abo abarula Babuloni bakaasia amachina nende tsimbao khulwa okhumbakha Ihekalu.