Read wanga 1 ABARUCHI 7 Bible Online

1 ABARUCHI 7 - wanga bible

1 ABARUCHI 7

¹Solomoni yeyumbashila inzuye yoburuchi khulwemiyika ekhumi nachitaru.

²Inzu eyo yombashilwa emisaala chiemisiita chia Lebanoni, yali noburambi tsimita amakhumi kane nende tsine, obubambalifu tsimita amakhumi kabili, nabwo oburambi okhutsia ikulu tsimita ekhumi nende tsiraru neinusu. Yali nende tsinyaali tsietsisiilo tsiemisaala echiemisiita tsitaru. Buli olunyaali lwalinji nende tsisiilo ekhumi nende tsirano; nende tsinyanzo tsiemisiita hekulu wetsisiilo,

³yakusia tsimbao tsiemisiita nafimba hekulu wetsinyanzo okhuula khubikoro biamabikho ebiali nibiekhala khutsisiilo.

⁴Buli lisiisi khukabili, liali nende amatirisha tsinyaali tsitaru.

⁵Emiliango nende amatirisha biosi biakaasibwa tsimbeka tsine tsiosi nitsihelana. Tsinyaali tsitaru tsiamatirisha buli khwisiisi tsiahengana.

⁶Eshirookoola shietsisiilo shiali shioburambi obuhela tsimita amakhumi kabili, nabwo obubambalifu bwali obuhela tsimita ekhumi natsitaru.

⁷Yakaasia Eshisika eshia Oburuchi eshialangungwa khandi mbu Eshisika shiobuyaasi netsimbao tsiemisiita okhuchaachila khubwelu okhuula khutsinyanzo.

⁸Tsinzu tsia Solomoni mwene yamenyangamwo etsiali mulwanyi lundi inyuma wa Eshisika shia Obuyaasi tsiali tsiombakhwa butswa shinga etsindi. Yombashila khandi etsifwana tsirio omukhasiwe ouli omukhaana womuruchi wa Misiri.

⁹Tsinzu etsio tsiosi halala nende olwanyi olukhongo tsiombashilwa amachina akabatswa obulayi akobukusi obukhongo okhurula hasi okhuula ikulu. Amachina ako kali nikabatsilwa aha bakayabanga nibakarasia mubichelo bihelana nikatetwa nomusumeno elwanyi nende mukari.

¹⁰Omuse kwali kwamachina amakhongo amasiro akabatsilwa aha kayabungwa. Akandi kachelwa oburambi tsimita tsitaru nende inusu nako akandi tsimita tsine.

¹¹Khwikulu khwako, barakhwo amachina kandi amasiro akabatswa obulayi nikahelana nende khandi tsimbao tsiemisiita

¹²Bali nibombakha amachina amabatse tsinyali tsitaru nende tsimbao tsiemisiita olunyaali lulala okhubotokhana olwanyi olukhongo lwomuruchi; khandi nibombakha bario olwanyi olwo mukari nende hamuliango weinzu eya OMWAMI Nyasaye.

¹³Omuruchi Solomoni naruma okhulanga Huramu, owamenyanga mwitookho lia Tiro; yali omwiranyi owali niyamanya nobumanyilisi obunji emilimo chibwiroanyi bwomukasa.

¹⁴Papa wuwe owali niyamala okhufwa, yali okhurula Tiro naye yesi yalinji omwiranyi womukasa namachesi amanji. Mama wuwe yali omukhasi omulekhwa owomuluyia lwa Nafutali. Huramu yali nobuchesi khandi nobumanyilisi obunji khukobwiranyi. Yafuchilila amakhuwa komuruchi Solomoni mbu asinjilile emilimo chiosi chiobwirianyi bwomukasa.

¹⁵Yasinjisia tsisiilo tsibili etsiakasibwa khumukasa, oburambi bwa buli ndala bwali tsimita munane, nabwo obukhomefu tsimita tsirano nende tsisentimita amakhumi kataru; mana natsisinjisia hamuliango we Ihekalu.

¹⁶Yakaasia khandi tsikofia etsiomukasa tsibili, buli ndala oburambi bwali obuhela tsimiita tsibili nende tsisentimita amakhumi kabili natsirano, natsira khwikulu khwetsisiilo etsio.

¹⁷Mana khwikulu khwa buli ikofia eyali khusiilo barakhwo tsikhanda tsiebimuli tsibili etsiabaswa shinga omunyololo.

¹⁸Khandi yakaasia amakomamanga nakara mutsinyaali tsibili etsiabotokhana tsikofia etsio etsiali khutsisiilo hekulu.

¹⁹Tsikofia etsio tsiali khutsisiilo hekulu imbeli habwinjililo tsiali nitsiang'oolwakhwo ebimuli bia akamatanye oburambi bwatsio okhutsia ikulu bwali imita ndala nende tsisentimita amakhumi munane.

²⁰Tsikofia etsio tsiali khwikulu khwa tsisiilo etsio tsibili nende khandi khwikulu khwetsingara tsiali hambi netsikhanda tsana etsio. Chialiho emikomamanga ebikhumi bibili echianzwa mutsinyaali tsibili okhubotokhana buli ikofia.

²¹Huramu yasinjisia tsisiilo tsiomukasa tsibili hamuliango wa Ihekalu. Eyali elubeka lwemulambo yachikulikha eliira mbu, Yakini nayo eyali elubeka lwemasaba yachikulikha mbu Boazi.

²²Khwikulu khwetsisiilo etsio khwarebwakhwo tsikofia etsiang'olwakho ebimuli biamatanye. Mana emilimo chiokhumbakha tsisiilo nichihwa.

²³Huramu yeranya litanji liamaatsi lifumundule okhurula khumukasa. Oburambi bwalio okhutsia hasi mukari bwali tsimita tsibili nende tsisentimita amakhumi kabili (2.2 m), obubambalifu hakari bwali tsimita tsine nende tsisentimita amakhumi kane, ne okhubotokhana khululika lwosi lwali tsimita ekhumi nende tsibili nende tsisentimita amakhumi kabili.

²⁴Ne okhubotokhana liosi elwanyi walio, khululika liali netsinyaali tsibili tsiebimuka ebiomukasa, ebiali nibialimasibwa halala nelitangi liosi.

²⁵Litanji elio liali niliekhala khumikongo chiebilonje bietsisurusi etsiemikasa ekhumi natsibili, buli ndala niyihenjile elwanyi. Tsitaru tsiahenga emasaba, tsitaru tsihenga emulambo, tsitaru tsihenga mumbo, ne tsitaru tsindi nitsihenga ebukwe.

²⁶Obukhomefu bwa khundulo welitanji elo bwali tsimililita amakhumi musafu natsirano. Olulika lwalio lwali shinga lweshikombe nende olwa eshimuli eshielitanye. Litanji elio liali elinyala okhuchinga amaatsi tsilita ebikhumila bine (4,000).

²⁷Hiramu khandi niyeranya amakaari ekhumi akomukasa. Buli elala liali noburambi buhela imita ndala nende tsisentimita amakhumi munane (1.8), obubambalifu bwali imita ndala nende tsisentimita amakhumi munane, ne okhutsia ikulu bwali imita ndala nende tsisentimita amakhumi kataru.

²⁸Amakaari ako kakasibwa khutsimbao tsihelana tsimbeka tsine tsiosi etsiarebwa mutsifuremu

²⁹nitsirerwekhwo ebifwanani bia tsitalanyi, tsisurusi nende abakerubi. Ne khutsifuremu etsio, hasi nende hekulu watsio, hasi wetsitalanyi, tsisurusi khwalikhwo nebindu ebieleela shinga ebimuli.

³⁰Buli likaari liali nende amakurutumu kane akomukasa nende tsinanga tsine tsiomukasa etsia kanyala okhubotokhanilakhwo. Mutsikona tsine mwalimwo ebichibi bine biomukasa khulwa okhurenjekhakhwo eshikaye. Ebichibi ebio biali nibiang'oolwakhwo ebimuli ebilayi.

³¹Khwikulu khweshichibi eshio khwalikhwo nende ifuremu yakasibwa shinga ingara khulwa eshikaye eshio. Okhurula khwikulu okhwa likaari okhutsia ikulu ifuremu eyo yali tsisentimita amakhumi kane nende tsirano ne okhutsia hasi mukari tsiali tsisentimita ekhumi namunane. Khwali khandi nende tsipicha khumunwa kwalio etsia ebibatse ebitonye biabotokhana tsimbeka tsiosi tsine ebihelana; shibiabotokhana shinga ingara tawe.

³²Amakurutumu kali tsisentimita amakhumi kasasaba nende tsisasaba okhutsia ikulu; ne kali hasi ebitonye ebiabotokhanwa netsimbao etsio. Tsinyanzo tsiamakurutumu okhubotokhanilakhwo biongasibwa halala nelikaari.

³³Amakurutumu ako kali shinga amakurutumu ke likaari lia tsisishili. Tsinyanzo tsiako, tsirimu netsisenyenge, nende tsihabu biosi biali nibieranywa khumukasa.

³⁴Bialiho ebichibi bine hasi buli mukoona aha buli likaari; ebiongasibwa halala nelikaari elo.

³⁵Omukoye okuhela tsisentimita amakhumi kabili nende tsibili kwabohwa nikubotokhasibwa khwikulu khwa buli likaari. Ebitiili biakwo nende ebitonye bietsimbao biongasibwa halala nende likaari.

³⁶Ebitiili nende ebitonye ebietsimbao ebio biabatswa nibing'olwakhwo ebifwanani ebilayi ebiebilonje bietsimbaha, tsitalanyi, amashindu halala nende ebimuli hosi hosi aha obwiyangu bwalinji okhubotokhana biosi.

³⁷Nolwa amakaari ako keranywa kario. Koosi kali nashilala, obukhongo buhelana nende okhukasibwa khulala.

³⁸Huramu niyeranya khandi ebikaye ekhumi ebiomukasa; buli likaari shilala. Buli eshikaye shiali obubambalifu buhela imita ndala nende tsisentimita amakhumi munane (18), ne shiali eshinyala okhuchinga amaatsi tsilita ebikhumi munane (800).

³⁹Yara amakaari karano elubeka lwemulambo nako karano kandi elubeka lwemasaba ewe Ihekalu. Ne nara litangi elubeka lwemulambo nohenjile ebukwe mukona omwa Ihekalu.

⁴⁰Huramu khandi yeranya tsinyungu, amabakiyo nebikaye. Mana Huramu namala okhwiranya buli shindu shiomuruchi Solomoni yamulachilisia khulwa Ihekalu eya OMWAMI Nyasaye.

⁴¹Ebilondakhwo bino nibio ebia Huramu yalachilisibwa okhwiranya; tsisiilo tsibili, tsikofia tsifumunde etsiali khumirwe chietsisiilo; tsikhanda tsibili tsiokhufunikha tsikofia tsana etsiali khumurwe chietsisiilo;

⁴²amakomamanga ebikhumi bine (400) akokhutsikhanda tsibili; tsinyaali tsibili etsiamakomamanga khu buli olukhanda, khulwa okhufumba tsikofia tsibili tsifumunde etsiali khutsisiilo

⁴³amakaari ekhumi ebikaye ekhumi ebiali khumakaari ako;

⁴⁴litanji elio, tsisurusi ekhumi natsibili etsia litanji elo liekhalakho.

⁴⁵Tsinyungu, emiikho, ebikaye nende ebindu bindi ebio biosi ebiali Muhekalu eya OMWAMI Nyasaye, ebia Huramu yeranyila omuruchi Solomoni biosi biali ebiomukasa okwarutwa.

⁴⁶Omuruchi yeranya ebindu ebio biosi hamuhololokhwe kwa Yorodani, mwiloba lielitoyi hakari wa Sukotsi nende Zaretsani.

⁴⁷Omuruchi Solomoni shiyachela ebindu ebio ta, shichila biali ebinji muno, kho obusiro bwabio shibwamanyikha tawe.

⁴⁸Solomoni khandi yakaasia ebindu bia Muhekalu okhurula khutsahabu. Biali eshimalilo eshemisango, imesa yokhurakhwo omukaate okhuhaanilwa Nyasaye

⁴⁹ebichibi ekhumi ebietsitaha ebiasinjila imbeli wa habundu Hatakatifu Muno, ebichibi birano biali khulubeka lwemulambo nabio ebindi khulubeka lwemasaba, ebimuli, tsitaha, namahana

⁵⁰ebikombe, namahana kokhusimilia tsitaha, ebikaye, ebichiko, ebikaye ebiomulilo, ebieitsahabu inzeleleshe, obupata bweitsahabu inzeleleshe obwemiliango chia Habundu Hatakatifu Muno nende echielwanyi weihekalu. Ebindu bino biosi biali nibiakasibwa khutsahabu.

⁵¹Olwa omuruchi yamala emilimo chiosi echiokhumbakha Ihekalu, yaramwo ebisika ebiamabiikho ka Daudi samwana yali niyahaanila OMWAMI Nyasaye; kali ifetsa, itsahabu nende ebindu bindi.