Read wanga 1 ABARUCHI 8 Bible Online

1 ABARUCHI 8 - wanga bible

1 ABARUCHI 8

¹Mana omuruchi Solomoni nalanga abemilisi boosi abetsimbia nende abebilibwa bia Abaisiraeli okhwitsa ewa yali Yerusalemu okhubukula lisanduku lieindakano eya OMWAMI Nyasaye okhurula mwitookho lia Zayuni, okhulireera mu Ihekalu.

²Mana boosi nibekhung'asia ewomuruchi mutsinyanga tsielisabo liamaatsi, mumwesi kwa Etsanimu, nikwo omwesi kwamusafu.

³Abemilisi ba Isiraeli boosi nibetsa, ne abesaaliisi nibabukula lisanduku lieindakano elo,

⁴nibalireera mu Ihekalu. Abalawi nende abesaaliisi abo khandi nibabukula liheema litakatifu halala nende ebindu biosi ebialimwo nibalireera Muhekalu.

⁵Omuruchi Solomoni nende Abaisiraeli boosi nibekhung'asia imbeli welisanduku lieindakano elo, mana nibakhola omusango nibeera amakondi nende tsing'ombe tsinyinji, etsilanyala okhubalwa tawe.

⁶Mana abesaaliisi nibabukula lisanduku lieindakano eya OMWAMI Nyasaye elo, nibalireera habundu walio hatakatifu muno Muhekalu, nibalira hasi webilonje bietsimbaha bibili ebio.

⁷Tsimbaha tsiabio tsiafunikha lisanduku elo nende emisaala chialichinganga.

⁸Emisaala echio chiali emirambi muno, mbu kata omundu shiyanyalanga okhulola khundulo wachio nali imbeli wa Habundu Hatakatifu Muno tawe, ne emisaala echio chishiliho okhuula olwa leelo.

⁹Eshindu shiosi shishialikhwo mwisanduku elo ta, habula amachina kabili ka Amalako ka Musa yali niyaramwo khushikulu shia Sinai olwa OMWAMI Nyasaye yakaasia Indakano nabandu ba Isiraeli olwa bali nibarulanga Misiri.

¹⁰Olwa abesaaliisi bali nibarulanga habundu Hatakatifu Muno yaho, lileesi lietsa niliitsula muhekalu,

¹¹niliakhanga obulafu obwa OMWAMI Nyasaye, mana nibalanyalilwa okhukalukhamwo okhukhalabana emilimo chiabwe tawe.

¹²Mana Solomoni nasaaya OMWAMI Nyasaye naboola ari, “Iwe OMWAMI Nyasaye, waraho eliuba mwikulu, ne niwaahula okhumenya mumaleesi nende mushiilima.

¹³Bulano ekhumbashiile Ihekalu indayi, habundu aha olamenyanga inziayo.”

¹⁴Olwa Abaisiraeli boosi bali nibashikhung'anileho, omuruchi Solomoni yashiukhana nabahenga mana nabasabila ikhabi khu OMWAMI Nyasaye,

¹⁵naboola ari, “OMWAMI Nyasaye, Nyasaye wa Isiraeli yetsoomibwe! Yalindile obusuubisie bwa yasuubisia papa wanje Daudi naboola ari,

¹⁶‘Okhurula khunyanga ya ndarusia abandu banje Misiri, eshili okhwahulakhwo litookho liosi liosi mushialo shia Isiraeli eliokhumbakhamwo Ihekalu yabandu okhunzinamilamwo tawe. Nebutswa ndakhwaahula iwe Daudi okhuba omuruchi wabandu banje.’

¹⁷“Papa wanje Daudi yekomba mumwoyokwe okhumbakha Ihekalu yokhwinamilamwo OMWAMI Nyasaye wa Isiraeli.

¹⁸Nebutswa OMWAMI Nyasaye yaboolela papa wanje Daudi ari, ‘Khulwa okhuba wekomba mumwoyokwo khunzimbashila Ihekalu yokhunzinamilamwo, elo liali lipaaro lilayi.

¹⁹Nebutswa shiali niwe oulanzumbashila Ihekalu eyo tawe. Omwanawo omusiani niye oulombakha Ihekalu yokhunzinamilamwo.’

²⁰“OMWAMI Nyasaye alindile obusuubisiebwe bwa yasuubisia. Ndakaluushe mushilenje shia papa wanje okhuba omuruchi wa Isiraeli khandi ndumbaashe Ihekalu yokhwinamilamwo OMWAMI Nyasaye wa Isiraeli.

²¹Khandi engasiiye habundu Muhekalu ahokhura lisanduku lieindakano elilimwo amachina kabili kamalako keindakano eya OMWAMI Nyasaye yakaasia nende abakuuka befwe olwa yabarusia Misiri.”

²²Mana Solomoni nasinjila imbeli weshimalilo shiemisango Abaisiraeli boosi nibamulolanga, nachinguula amakhonoke mwikulu,

²³naboola ari, “OMWAMI Nyasaye, Nyasaye wa Isiraeli, abulaho Nyasaye shinga iwe mwikulu ikulu noho mushialo hasi tawe! Olindanga indakanoyo yobuheeli khubakhalabanibo abatsiililila okhumenya mubwisikwa nomwoyo kwosi.

²⁴Olindile obusuubisie bwa wasuubisia papa wanje Daudi. Inyanga yino wuusiiye buli likhuwa liawasuubisia.

²⁵Ne bulano, OMWAMI Nyasaye, ekhusaba mbu, nochama olinde khandi obusuubisie bwa wasuubisia papa wanje olwa wamuboolela mbu, buli lwosi alabetsangaho mulala khuboluyialwe okhuruka Abaisiraeli, nikaba mbu, balaba abahulili shinga Daudi yali.

²⁶Kho bulano OMWAMI Nyasaye wa Isiraeli, chama buli shindu shia wasuubisia papa wanje Daudi, omukhalabaniwo.

²⁷“Nebutswa, toto iwe Nyasaye, onyala okhumenya khushialo? Kata likulu liosi shilili likhongo elikhuhela iwe ta, kho Ihekalu yino eya enzumbashe yino yakhakhuhela yirie?

²⁸OMWAMI Nyasaye wanje, isie endi omukhalabaniwo. Oulile okhuhaba khwanje okhwa ekhuhabila inyanga yino.

²⁹Olindenje Ihekalu yino eshiteere nende eshilo, niho habundu aha waahula mbu abandu bakhwinamilenjeho. Urecheresinjie olwa ndinjila Muhekalu muno nekhusaaya.

³⁰Orecheresinjie okhusaba khwanje nende okhwa abandubo, olwa bashiukhana nibahenga khu Ihekalu yino nibasaaya. Noli munzumwo mwikulu okhurecheresinjie nende okhukhubeela obwonooni bwefwe.

³¹“Olwa omundu aba niyenjililwa mbu akholeele owashie libi liosi, mana nareerwa khushimaliloshio shiemisango muhekalu muno okhwitsuba eshitsubo, mbu shialikhwo neshikha ta,

³²OMWAMI Nyasaye, orecheresie noli mwikulu mana oyaasie abakhalabanibo. Ohelesie oweshikha eshinyasio shiakwanile okhunyoola, naye oulali neshikha ta, omubeele.

³³“Olwa abandubo ba Isiraeli bahulwa nabasuku babwe khulwa okhubeela bakhwonoonele, ne olwa baba nibakhukalushila nibenjila Muhekalu yino, nibetuutuyia nibakhusaba obulesheli,

³⁴obahulile noli mwikulu. Obeele abandubo obwonooni bwabwe mana obakalusie mushialo eshia wahelesia abakuuka babwe.

³⁵“Abandubo nibakhakhwonoonela nawe nobahelesia eshinyasio khulwa okhulekha okhubakwisilia ifula, ne nibeekelukhasia nibahenga Ihekalu yino, mana nibasaba muliiralio khandi nibalekha okhwonoona,

³⁶obahulile noli mwikulu nende okhubabeela obwonooni bwabwe. Abandu ba Isiraeli nabakhalabanibo, kho obechesie okhumenya mubulunjishi. Obakwisilie ifula khumikunda chiabwe chia wabasuubisia okhubahelesia okhuba echiabwe inziayo.

³⁷“Olwa inzala noho olumbe, noho eshimiyu noho tsisiche tsiokhusasia ebiokhulia, noho abasuku bokhubaseera, noho olumbe noho obulwale biitsa mubo,

³⁸ohulile okhusaaya khwabwe. Omundu yesi yesi khubandu ba Isiraelibo bano, naba nomwoyo kweshibeela nachinguula amakhonoke nahenga khu Ihekalu yino nasaya,

³⁹ohulile okhusayakhwe. Obahulile noli mushimenyoshio mwikulu, obaleshele obwonooni bwabwe khandi obahabine. Niwe wenyene oumanyile akali mumwoyo kwa buli mundu. Okholele buli mundu shinga olwa akwanile okhukholelwa,

⁴⁰kho mbu abandubo bakhuhelesie oluyali mubulamu bwabwe bwosi olwa bamenya mushialo shia wahelesia bakuuka babwe.

⁴¹“Omundu omucheni ourula mushialo shiehale oulali mulala khubandubo ba Isiraeli ta, niyetsa okhusaaya khulwa okhubeela eliiralio,

⁴²okhuba abandu bamahanga kandi balahulila oluyalilwo, khulwa amaaniko nende obunyalibwo, omundu oyo olwa yetsa okhusaaya mu Ihekalu yino,

⁴³ekhusaaya nochama omuhulile noli mwikulu, khandi omuhelesie koosi akaba nasabile; mana buli mundu khushialo alakhwinamila iwe shinga butswa abandubo Abaisiraeli, khandi balamanya mbu, ndombakha Ihekalu yino okhukhuhelesia iwe oluyali.

⁴⁴“Olwa oba nolaka abandubo mbu batsie okhulwana abasuku babwe, nabo nibakhusaba, hosi aha baliba, nibahenjile litookho lia waahule nende Ihekalu yino yekhumbashiile,

⁴⁵ohulile amasaayo kabwe. Obahulile noli mwikulu mana obanyalile okhuhula.

⁴⁶“Olwa abandubo boosi bakhwonoonela, kata nalabaho omulunjishi kata mulala ta, ne nobasinyishila nokhola abasuku babwe okhubakho nende okhubahula okhuba ababohe mushialo shindi, kata eshialo eshio nishiba shiehale,

⁴⁷ohulile amasaayo kabwe. Nibali mushialo eshio nibakhekalukhasia mana nibakhusaaya nibeyama obwonooni nende obumayanu bwabwe, OMWAMI Nyasaye ohulile okhuhaba khwabwe.

⁴⁸Nibaba nibekalukhasia mubwatoto khandi mubwisikwa nibali mushialo eshio mana nibakhusaba nibahenjile eshialo shino eshia wahelesia abakuuka befwe, nende litookho eliawaahula nende Ihekalu yino eyekhumbashiile yino,

⁴⁹chama ohulile okhuhaba khwabwe. Obahulile noli mushimenyoshio mwikulu khandi obalolele tsimbabasi.

⁵⁰Obabeele obwonooni bwabwe bwosi nende obukhayi bwabwe, khandi okhole abasuku babwe balolosie tsimbabasi khubo.

⁵¹Nabandubo beene khandi obulaamebwo, abawarusia mushialo shia Misiri okhurula mumulilo omululu.

⁵²“OMWAMI Nyasaye omwene mahe, chama buli lwosi oliinde abandubo Abaisiraeli nende omuruchi wabwe, khandi ohulile okhusaaya khwabwe olwa baba nibakhuhabila.

⁵³Khulwa okhuba iwe OMWAMI OMWAMI Nyasaye wabaahula okhurula mubandu bandi boosi okhuba abandubo omwene, shinga olwa wababoolela okhubirira mumukhalabaniwo Musa olwa warusia abakuuka befwe okhurula Misiri.”

⁵⁴Olwa Solomoni yali niyakhamala okhusaba khu OMWAMI Nyasaye, yasinjila imbeli weshimalilo shiemisango aha yali nasikaame nakaliishe amakhonoke ikulu.

⁵⁵Nasabila abandu bali nibasinjiileho boosi tsikhabi okhurula khu Nyasaye nomwoyo omukhongo, naboola ari,

⁵⁶“OMWAMI Nyasaye owahelesiye abandube omulembe shinga olwa yabasuubisia mbu yakhabahelesie yetsoomibwe. Yoosiye obusuubisiebwe bwosi obwa yasuubisia okhubirila mumukhalabaniwe Musa.

⁵⁷OMWAMI Nyasaye wefwe akhoya yakhulinda shinga olwa yalindanga bakuuka befwe; alakhulekhakhwo kata okhukhwibala tawe.

⁵⁸Akhukhole khube abahulili khuye kho mbu khumenye buli lwosi shinga elwa yenya khumenye khandi khulonde amalakoke koosi nende amalachilisio ka yahelesia bakuuka befwe.

⁵⁹OMWAMI Nyasaye wefwe akhoya yetsulila buli lwosi amasaayo nende amakhuwa kano akemusaayile. Akhoya buli lwosi yabeela tsimbabasi abandu ba Isiraeli nende omuruchi wabwe okhulondana nende akabenya buli nyanga.

⁶⁰Nako amahanga koosi kokhushialo, kalamanya mbu OMWAMI Nyasaye niye yenyene Nyasaye. Nyasaye undi shialiho tawe.

⁶¹Inywe abandube, mukhoya buli lwosi mwaba abesiikwa khu OMWAMI Nyasaye wefwe, nimulonda amalakoke nende amalachilisioke koosi, shinga olwa mukholile inyanga yino.”

⁶²Mana omuruchi nende Abaisiraeli boosi nibahaana emisango khu OMWAMI Nyasaye.

⁶³Solomoni nahaana khulwemisango chiokhureera omulembe tsing'ombe ebikhumila eshikhumi namakhumi kabili (22,000) nende amakondi netsimbusi ebikhumila eshikhumi namakhumi kabili (120,000). Mana omuruchi nende Abaisiraeli boosi nibaahula Ihekalu okhuba eya OMWAMI Nyasaye.

⁶⁴Khunyanga tsana eyo, omuruchi yaahula eshitonye shiahakari eshiolwanyi olwali imbeli wihekalu. Nahaanilaho omusango kusambilwa elala, emisango chiimele nende amasinya ketsisolo tsiemisango nende echiokhureera omulembe. Yahaanilaho khulwa okhubela eshimalilo shiemisango shieranywa khumukasa shiali eshitiiti muno, eshilanyala okhuhaanilwakhwo emisango echio chiosi tawe.

⁶⁵Solomoni halala nende Abaisiraeli boosi nibakhola lisabo liamatili khulwa tsinyanga musafu nibali muhekalu. Omukanda omukhongo kwabandu kwaliho okhurula khubwinjililo bwa Hamatsi elubeka lwemasaba nende khulwakho lwa Misiri elubeka lwemulambo.

⁶⁶Solomoni naseebula abandu khunyanga yamunane. Boosi nibamwitsoomia, nibenyokha shichila OMWAMI Nyasaye yali nahelesiye omukhalabaniwe Daudi nende abandube Abaisiraeli tsikhabi.