Read wanga 1 ABARUCHI 9 Bible Online

1 ABARUCHI 9 - wanga bible

1 ABARUCHI 9

¹Olwa Solomoni yali namalile okhumbakha Ihekalu ya OMWAMI Nyasaye nende inzu yomuruchi khandi namalile okhumbakha biosi ebia yenya,

²OMWAMI Nyasaye yamuloleshela olwakhabili shinga olwa yali niyamuloleshela Gibeoni.

³OMWAMI Nyasaye namuboolela ari, “Embuliile okhusabakhwo nende okhuhabakhwo. Ndaahuule Ihekalu yino eya unyumbashiile okhuba habundu ha nditsa okhwinamilungwa buli lwosi. Ndalachilinda nende okhuchiterera buli lwosi.

⁴Noba niukhalabanila nomwoyo kwosi nende oluyali shinga olwa papawo Daudi yalinji, khandi nohulila amalako kanje nende koosi aka ndakhulachilisia,

⁵ndalalinda obusuubisie bwa ndasuubisia papawo Daudi mbu, lihanga lia Isiraeli buli lwosi lilarukwa nende abolwibulolwo.

⁶Nebutswa iwe nende abolwibulolwo nibalekha okhumbulila, nibaloba okhuhulila amalako nende amalachilisio kemuhelesiye, ne nimwinamila abanyasaye bandi,

⁷ndalarusia abandu banje ba Isiraeli okhurula mushialo shiebahelesiye. Khandi ndalaloba Ihekalu yino eya ndaahuule okhuba habundu ha ndalenamilungwa. Abandu boosi buli habundu balanyeka nende okhufwola lihanga lia Isiraeli.

⁸Ihekalu yino yakhakwisibwe niyiba eshibunjikho shiamachinjini, ne buli mundu oulabiraho alesundukha nahuchisibwa. Balareeba bari, ‘Eshichila nishiina OMWAMI Nyasaye nakholela eshialo shino nende Ihekalu yino ario?’

⁹Nabo abandu balakalusia bari, ‘Nikhulwa okhuba baloba OMWAMI Nyasaye wabwe owarusia abakuuka babwe Misiri, ne nibahelesia abanyasaye bandi oluyali nende okhubenamala. Niko akachila OMWAMI Nyasaye nareera amanyakhano kano khubo.’ ”

¹⁰Olunyuma lwemiyika amakhumi kabili, Solomoni yamala okhumbakha Ihekalu ya OMWAMI Nyasaye nende inzu yomuruchi.

¹¹Omuruchi wa Tiro mbu Hiramu yali niyahelesia Solomoni emisaala chiemisiita, emitarakwe nende itsahabu ebia yenya khulwa okhumbakha. Namalile okhumbakha, omuruchi Solomoni yakaba Hiramu amatookho amakhumi kabili akali mushialo shia Galilaya

¹²Hiramu natsia okhukalola, nebutswa nalakachama ta.

¹³Nareeba Solomoni ari, “Owashianje, kho kano niko amataala ka ungabile?” Ne nakalanga eliira mbu, “Aka Kabuli,” ne eliira elo lishiliho okhuula olwa leelo.

¹⁴Hiramu yali niyarumila Solomoni itsahabu yishila tsikilo eshikhumi shilala namakhumi kabili (120,000) [2]

¹⁵Omuruchi Solomoni yalunyia abandu okhumbakha Ihekalu ya OMWAMI Nyasaye nende inzu yomuruchi, khandi yakhola abandu okhumenya elubeka lwebukwe welitookho elo nende okhumbakha amasiisi akelitookho elo. Khandi yalunyia abandu okhumbakha amatookho ka Hazori, Megido nende Gezari.

¹⁶Omuruchi wa Misiri yali niyaseera Gezari, nalibukuule, niyerire abandu bamenyangamwo nende okhulisamba nomulilo. Mana nahelesia omukhaanawe litookho elo okhuba eshihaanwa shieshiselelo olwa yateshela Solomoni.

¹⁷Kho Solomoni niyombakha obuyia amatookho ka Gezari; Betsi Horoni Liemwalo,

¹⁸Baalatsi nende Tumari mushitsiimi mushialo shia Yuda;

¹⁹halala nende amatookho kokhubikhamwo ebimanulwa, amatookho ketsifarasi nende amakaari nende buli shindu shiosi eshia yenya okhumbakha Yerusalemu, Lebanoni nende habundu undi hosi mushialo shioburuchibwe.

²⁰Abandu boosi abatong'a khuboluyia lwa Abamori, Abahiti, Abaperisi, Abahiwi nende Abayebusi abalaali Abaisiraeli ta,

²¹halala nende abolwibulo lwabwe aba Abaisiraeli bakhaywa okhubereera elala, Solomoni yabalunyia okhuba abasumbabe okhumukholela emilimo; ne bashikhalabananga bario okhuula olwa leelo.

²²Solomoni shiyakholakhwo Abaisiraeli okhuba abasumbabe tawe. Yabakhola okhuba abelihebe, abakhongobe, abaseesia babelihebe, abemilisi bamakaari kelihe nende abokhuchendela khutsifarasi.

²³Baliho abemilisi abakhongo bahela ebikhumi birano namakhumi karano abasinjililanga abakholi bemilimo abalunyibwa namaani okhumbashila Solomoni tsinzu tsindi tsinyinji.

²⁴Olunyuma lwomukhaana womuruchi wa Misiri okhurula mwitookho lia Daudi, natsia munzu yomuruchi Solomoni yali niyamumbashila, Solomoni yombakha litookho lia Milo.

²⁵Khataru buli khumuyika Solomoni yahaananga emisango emisambe nende echiokhureera omulembe khushimalilo shia yali niyakaasilia OMWAMI Nyasaye. Yasambilangakhwo khandi obubane khu OMWAMI Nyasaye. Mana namalilisia okhumbakha Ihekalu.

²⁶Omuruchi Solomoni khandi nakaasia tsimeli tsinyinji Ezionigeberi elili hambi nende Elatsi mushialo shia Edomu khulukuku lwa Inyanza inzakhanyu.

²⁷Mana omuruchi Hiramu naruma abandu bamanya okhukhola emilimo mutsimeeli obulayi bwene mbu, bakhalabane emilimo halala nende abandu ba Solomoni.

²⁸Nibafuka amaaro ako okhuula mushialo shia Ofiri mana nibareerera Solomoni itsahabu tsikilo ebikhumila ekhumi nabine (14,000).