Read wanga 2 ABARUCHI 1 Bible Online

2 ABARUCHI 1 - wanga bible

2 ABARUCHI 1

¹Olunyuma lwokhufwa khwomuruchi Ahabu wa Isiraeli, eshialo shia Moabu shiakholela Isiraeli induli.

²Omuruchi Ahazia wa Isiraeli yakwiila mwitirisha lieshisika shieinzuye Samaria, ne nasaalila obutinyu. Kho naruma abarume okhutsia okhureeba Baalizebubu, omunyasaye welitookho lia Abafilisiti lia Ekironi, khulwa okhumanya naba nahona noho nafwa.

³Nebutswa omumalaika owa OMWAMI Nyasaye yalachilisia Eliya owali omulakusi okhurula Tishibe mbu atsie yakaanile abarume bomuruchi Ahazia mana abareebe ari, “Mbushiina mutsitsanga okhureeba okhurula khu Baalizebubu omunyasaye wa Ekironi? Mupaaranga mbu, Nyasaye abula mu Isiraeli noho?

⁴Tsie muboolele omuruchi mbu, OMWAMI Nyasaye aboola ari, ‘Shiolahona okhurula mukhusalilakhwo ta, habula olafwa!’ ” Mana Eliya nakhola shinga olwa OMWAMI Nyasaye yali namulachilisiye;

⁵Ne olwa abarume abo bakalukha khumuruchi yabareeba ari, “Mukalushe mbushi?”

⁶Nabo nibamukalusia bari, “Khwakaanile nomusaatsa wundi mana nakhuboolela mbu, khukalushe khukhuboolele mbu, OMWAMI Nyasaye aboola ari, ‘Mbushiina mutsitsanga okhureeba okhurula khu Baalizebubu omunyasaye wa Ekironi? Mupaaranga mbu Nyasaye abula mu Isiraeli noho?’ Shiolahona okhurula mukhusaalilakhwo ta, nebutswa olafwa!”

⁷Omuruchi nabareeba ari, “Omusaatsa tsana abeele oufwana arie?”

⁸Nabo nibamukalusia bari, “Abeele nafwalile eshifwalo shieliseelo, ne niyeboyile nomushipi kweliseelo mushishienje.” Omuruchi naboola ari, “Oyo ni Eliya wa Tishibe.”

⁹Mana naruma omukhongowe welihe nende abandu amakhumi karano khu Eliya. Omukhongo welihe oyo nanyoola Eliya niyekhaale khubutenje bweshikulu mana namuboolela ari, “Iwe omundu wa Nyasaye, omuruchi akhulaka mbu, wishe hasi otsie ewa ali.”

¹⁰Naye Eliya namukalusia ari, “Nemba nendi omundu wa Nyasaye, lekha omulilo kurule mwikulu kukhusambe iwe nende abelihebo!” Mana omulilo nikurula mwikulu nikusamba nikwiira omukhongo welihe oyo nende abandube amakhumi karano abo.

¹¹Mana khandi omuruchi naruma omukhongowe wundi welihe nende abandu amakhumi karano khu Eliya. Omukhongo welihe oyo naboolela Eliya ari, “Iwe omundu wa Nyasaye, omuruchi akhulaka wishe hasi bwangu otsie ewa ali!”

¹²Eliya namukalusia ari, “Nemba nendi omundu wa Nyasaye, lekha omulilo kurule mwikulu kukhusambe iwe nende abandubo amakhumi karano abo, mwesi mufwe!” Mana omulilo kwa Nyasaye nikwitsa nikwiira omukhongo wundi welihe oyo nende abandube abo.

¹³Mana khandi omuruchi naruma omukhongo welihe nabandu amakhumi karano olwa khataru khu Eliya. Omukhongo oyo natikulukha ewa Eliya yali, nasikama hasi mana namusaaya ari, “Iwe omundu wa Nyasaye, umbeele tsimbabasi, isie nende abandu banje, mana okhuleshele obulamu bwefwe!

¹⁴Abakhongo belihe bambeli babili nende abandu babwe basambilwe nomulilo okhurula mwikulu, nebutswa ifwe okhubeele tsimbabasi.”

¹⁵Mana omumalaika owa OMWAMI Nyasaye naboolela Eliya ari, “Kholomokha hasi ninaye, olamuria tawe.” Kho Eliya natsia nomukhongo oyo khumuruchi.

¹⁶Mana Eliya namuboolela ari, “Kano niko aka OMWAMI Nyasaye aboola, ‘Shichila orumile abarumebo okhutsia okhureeba khu Baalizebubu, omunyasaye wa Ekironi, shinga Nyasaye abula mu Isiraeli owokhureebakhwo, khulwa okhubeela kano shiolahona okhurula mukhusaalilakhwo ta, habula olafwa!’ ”

¹⁷Mana Ahazia nafwa shinga olwa OMWAMI Nyasaye yali naboolile okhubirila mu Eliya. Khulwa okhubeela Ahazia shiyalikhwo nomwana omusiani ta, kho omusiani wabwe mbu, Yoramu yakalukha mushilenjeshie okhuba omuruchi mumuyika kwakhabili kwoburuchi bwa Yehoramu omusiani wa Yehoshafati omuruchi wa Yuda.

¹⁸Amakhuwa kandi akomuruchi Ahazia yakhola kahandikwa mushitabu shiamakhuwa kakhale akobulamu bwabaruchi ba Isiraeli.