Read wanga 2 ABARUCHI 10 Bible Online

2 ABARUCHI 10 - wanga bible

2 ABARUCHI 10

¹Baliho abasiani amakhumi musafu aba Ahabu abali nibamenya mwitookho lia Samaria. Kho Yehu yahandika tsibarwa, ne natsiruma Samaria khubakhulundu belitookho, khubakhongo balio, khandi khubandu bakhusia abaana ba Ahabu. Ibarwa tsana yaboola yiri,

²“Mubwangu bwa munyoolelamwo ibarwa yino, khulwa okhuba ninywe abalindanga nende abaana aba Omwami wenywe, khandi muli namakaari netsifarasi, namatookho ketsingoba nende ebimanulwa bielihe,

³mwahule mubaana bomwami wenywe, oyo ouhelile okhuba omuruchi, mana mumwemeshe okhuba omuruchi; mana mulwane khulwa okhuterera inzu yomwami wenywe.”

⁴Nebutswa abemilisi ba Samaria abo batiilwa noburi muno, ne nibareebana bari, “Nikaba, abaruchi babili Yoramu nende Ahazia bakhaywa okhumwikalila, kho nefwe nikhunyale khurie okhumwikalila?”

⁵Mana omusinjilili weinzu yomuruchi nende omusinjilili welitookho, halala nende abakhongo nende abo abakhusia abaana bomuruchi nibarumila Yehu oburume bari, “Ifwe khuli abakhalabanibo, ne khulakhola koosi aka okhulachilisia. Habula shikhulemekha omundu yesi okhuba omuruchi tawe. Okhole koosi aka oluutsi mbu namalayi.”

⁶Mana Yehu nabahandichila ibarwa yakhabili niyiboola yiri, “Nimuba nimuli khulubeka lwanje, khandi nimuba nimufuchiliile okhuloonda amalako kanje, bukule emirwe echia abaana ba Ahabu omuruchi wenywe, mundeerere hano Yezerili mukamba khu shise shinga shino.” Ne abolwibulo lwa Ahabu abandu amakhumi musafu bali nibali mumakhono kabakhulundu abakhongo aba Samaria ababakhusinjia.

⁷Kho olwa banyoola ibarwa ya Yehu eyo, abakhulundu ba Samaria abo beera abaana ba Ahabu abandu amakhumi musafu, nibara emirwe chiabwe mubimwelo, ne nibayilila Yehu nali Yezerili.

⁸Olwa Yehu yaboolelwa mbu emirwe chiabandu bolwibulo lwa Ahabu chireerirwe, yalaka mbu chibunjikhwe mubituuli bibili mubwinjililo bwelitookho okhuula mumabwibwi inyanga yaloondakhwo.

⁹Olwa bwashia inyanga yaloondakhwo Yehu yarula natsia habwinjililo bwelitookho naboolela abandu baliho ari, “Nisie owasanjilana nabashianje okhwira omuruchi Yoramu. Ne inywe mubula eshikha khulwa okhufwakhwe. Nebutswa owirire bano boosi niwiina?

¹⁰Kano kamanyinjia mbu koosi aka OMWAMI Nyasaye yaboola khubaana ba Ahabu kakhekholeshe. OMWAMI Nyasaye yosiiye aka yasuubisia okhubirira mu omulakusiwe Eliya.”

¹¹Nilwo olwa Yehu yeera abekho bandi ba Ahabu abamenyanga mu Yezerili, halala nabakhongo ba Ahabu nende abalinabe, nabesaaliisibe, ne shiyasikalakhwo kata mulala tawe.

¹²Yehu yarula Yezerili natsia Samaria. Ne olwa yali nali khunjila habundu halaangwa mbu “Ikambi ya abaayi,”

¹³yabukaana nabekho bomuruchi Ahazia wa Yuda, mana nabareeba ari, “Ninywe beena?” Nabo nibamukalusia bari, “Khuli abekho bomuruchi Ahazia. Khutsitsanga Yezerili okhushesia omukhaye Yezebeli nende abomunzu yoburuchi.”

¹⁴Yehu nalaka abandube ari, “Batiile nibashili mwoyo.” Mana nibabatiila nibashili mwoyo nibabeerera khwiyabo lia Betsi-Ekedi. Boosi bali abandu amakhumi kane nababili. Ne shiyasikalakhwo omundu yesi khubo kata mulala tawe.

¹⁵Mana Yehu narula khandi, ne olwa yali khunjila yabukaana nende Yonadabu omusiani wa Rekabu. Yehu yamushesia ne namureeba ari, “Ofuchilisania halala ninasi shinga olwa efuchilisania ninawe?” Yonadabu namukalusia ari, “Kali kario.” Yehu naboola ari, “Nikaba kali kario, khambelesiekhwo omukhonokwo.” Naye namuhelesia, mana Yehu nakhoonyelela Yonadabu okhwinjila nende okhwikala mwikaarilie.

¹⁶Naboola ari, “Yitsa khutsie ninawe olole okhwihaana khwanje khu OMWAMI Nyasaye.” Mana Yonadabu natsiila halala nende Yehu mwikaarilie.

¹⁷Olwa yoola Samaria, Yehu yeera abekho ba Ahabu abali nibasikala boosi; shiyalekhakhwo kata mulala tawe. Kano niko aka OMWAMI Nyasaye yali niyaboolela Eliya mbu kakhekholeshe.

¹⁸Yehu yalanga abandu ba Samaria halala mana nababoolela ari, “Omuruchi Ahabu yenamilanga omunyasaye Baali hatuutu butswa, nebutswa isie ndalamwinamila nomwoyo kwosi.

¹⁹Kho lanje abalakusi ba Baali boosi nende abamwinamilanga boosi nende abesaaliisibe boosi. Omundu yesi alachweyakhwo tawe. Enzia okhukholela omunyasaye Baali omusango omukhongo, ne omundu yesi ouchweya okhwitsa aleerwa.” Nebutswa, Yehu yali nabakaatinjia butswa kho mbu yeere boosi abenamilanga Baali.

²⁰Mana Yehu nalaka ari, “Mwahulile Baali inyanga yokhumwinamila.” Mana nibaahula inyanga eyo.

²¹Ne Yehu naruma likhuwa mu Isiraeli yoosi. Abandu boosi abenamilanga Baali nibetsa, abulakhwo owachweya okhwitsa tawe. Mana boosi nibenjila mu ihekalu ya Baali, nibetsulamwo yoosi.

²²Mana Yehu nalachilisia omwisaaliisi owasinjililanga tsingubo tsindakatifu ari, “Rusie tsingubo tsiosi tsiabenamilanga Baali.” Naye natsirusia nabahelesia.

²³Mana Yehu nende Yehonadabu omusiani wa Rekabu nibenjila muhekalu ya Baali ne naboolela abenamilanga Baali ari, “Khabilisie obulayi mulole mbu omundu yesi owinamilanga OMWAMI Nyasaye shiali muno ta, habula abo abenamilanga omunyasaye Baali bonyene.”

²⁴Mana Yehu nende Yonadabu nibenjilamwo okhuhaanila omunyasaye Baali emisango nende emisango emisambe. Ne Yehu yali narecheshe abandu amakhumi munane nabalachile obutinyu ari, “Okhuula mwiire abandu bano boosi, omundu yesi oulekha mulala khubandu bano aba eretsanga mumakhono kenywe bano okhuhonokokha, alakosia obulamubwe.”

²⁵Ne olwa Yehu yali niyakhamala okhumala emisango echio, yaboolela abalindi nende abakhongo belihe ari, “Yinjilemwo mubeere boosi, mulalekhakhwo omundu yesi okhwihonokokha tawe.” Mana abalindi abo nibenjilamwo netsinganga tsiabwe nibabeera boosi, ne nibarusia elwanyi emibili chiabwe. Khandi nibatsia nibenjila mushikoro shiomukari shiomuhekalu ya Baali eyo,

²⁶nibarusiamwo isilo indakatifu yali niyilimwo nibachisamba.

²⁷Balikulula bario isilo indakatifu nende ihekalu ya Baali, ne nibachikhola okhuba icho eyishiliho okhuula olwa leelo.

²⁸Kho, nolwa Yehu yarusiaho obwinamili bwomunyasaye Baali okhurula mu Isiraeli.

²⁹Nebutswa Yehu shiyalekha okhukhola obwonooni bwa Yeroboamu omusiani wa Nebati obwokhwinjisia Abaisiraeli mubwonooni bwokhwinamila ebimosi bieitsahabu ebiali mu Betseli nende mu Dani tawe.

³⁰Mana OMWAMI Nyasaye naboolela Yehu ari, “Okholeele abolwibulo lwa Ahabu koosi aka ndenya mbu obakholele. Kho ekhusuubisia mbu abaanabo okhuula khubolwibulo lwakhane bakhabe abaruchi mu Isiraeli.”

³¹Nebutswa Yehu shiyaloonda Lilako elia OMWAMI Nyasaye wa Isiraeli nomwoyo kwosi tawe. Shiyalekha okhukhola obwonooni bwa Yeroboamu, bwokhwinjisia Abaisiraeli mukhukhola obwonooni tawe.

³²Mutsinyanga etsio, OMWAMI Nyasaye yachaaka okhutiitiyia lihanga lia Isiraeli. Omuruchi Hazaeli wa Siria yahula lihanga liosi elia Isiraeli,

³³elili ebukwe womwalo kwa Yorodani, okhurula emulambo khwitookho lia Aroeri elili khumwalo kwa Arinoni nokhubukulilamwo eshialo shia Giliadi okhuula khu shia Bashani. Shino nishio ehialo eshia aboluyia lwa Gadi, Rubeni nende inusu yoluyia lwa Manase bali nibamenyamwo.

³⁴Ne amakhuwa kandi koosi aka Yehu halala nende akobululubwe kahandikwa mushitabu shiamakhuwa ketsinyanga tsiakhale tsiabaruchi ba Isiraeli.

³⁵Yafwa ne nayabilwa mu Samaria, ne omwanawe omusiani mbu Yehoahazi nakalukha mushilenjeshie shinga omuruchi.

³⁶Yehu yali naruchile mu Samaria shinga omuruchi wa Isiraeli khulwemiyika amakhumi kabili namunane (28).