Read wanga 2 ABARUCHI 11 Bible Online

2 ABARUCHI 11 - wanga bible

2 ABARUCHI 11

¹Olwa Atsalia nyinamwana Ahazia yalola mbu, omwanawe omusiani ufwiile, yalachilisia mbu abeinzu yoburuchi boosi beerwe.

²Nebutswa Yehosheba, omukhaana womuruchi Yehoramu khandi owali omukhaana wabwe Ahazia, yabukula mabiswi Yoashi omusiani wa Ahazia, ne namurusia mubaana bomuruchi abali nibenyanga okhwiirwa. Yamubisa halala nomulesiwe munzu yokhwiyalisiamwo muhekalu khulwa okhumubisa okhurula khu Atsalia. Kho ye shiyayeerwa tawe.

³Khulwemiyika chisasaba Yehosheba yamenya nomuraaka oyo namulisinjia nende okhumulinda obulayi muhekalu olwa Atsalia yaruka shinga omuruchi mukhasi.

⁴Nebutswa mumuyika kwomusafu omwisaaliisi Yehoyada yaruma mbu abelihe abakhongo basinjilile abalindi bomuruchi, nabo abalindanga inzu yoburuchi balaangwe. Mana nababoolela mbu betse muhekalu, ewa yabakhola okhwitsuba khu ka yali natsia okhukhola. Yabamanyia Yoashi omwana womuruchi Ahazia,

⁵mana nabalachilisia naboola ari, “Olwa mutsia khubulindi bwenywe khunyanga ya Isabato, eshitonye shiakhataru khwinywe shilinde inzu yoburuchi,

⁶eshitonye shindi shiakhataru shilinde khushilibwa shia Suri, nashio eshiakhataru shindi shibe hashilibwa shili inyuma wabalindi, abalindanga Ihekalu.

⁷Emikanda chibili chiabalindi bahuluukhanga khunyanga yeisabato basinjile nibalindile Ihekalu khulwa okhulinda omuruchi.

⁸Mulinde omuruchi Yoashi netsinganga tsienywe, ne mubetsenje ninaye hosi aha atsia. Omundu yesi ousita hambi khwinywe mumwire.”

⁹Abakhongo abo nibakhola aka omwisaaliisi Yehoyada yabalaka. Buli mulala nabukula abandube, abo abali nibatsitsanga khubulindi bwabwe khusabato nende abo abali abokhuhuluukha khusabato, boosi nibetsa khu Yehoyada.

¹⁰Mana nahelesia abakhongo babalindi abo amafumo nende ebikhumba ebialinji biomuruchi Daudi, ne nibiabiikhwa muhekalu eya OMWAMI Nyasaye.

¹¹Kho abalindi abo buli mulala khubo natilile lifumo mumukhonokwe baranda mutsinyaali nibabotokhana omuruchi ahambi nende khushimalilo shiemisango, nibabotokhana elubeka lwemulambo nende olwemasaba weihekalu eyo.

¹²Mana Yehoyada nareera Yoashi omusiani womuruchi elwanyi namufwala olusimbi khumurwekwe, ne namuhelesia amalako kokhulinda obwami. Kho Yoashi natsushililwakhwo amafura, ne niyemekhwa okhuba omuruchi. Abandu nibakhupa amakhofi nibaboola nomwoyo omukhongo bari, “Omuruchi amenyeho inziayo!”

¹³Olwa Atsalia omuruchi mukhasi yahulila abalindi nibakhupanga obuyoka, yatsia bwangu ewa abandu bali muhekalu eya OMWAMI Nyasaye.

¹⁴Atsalia yahenga ne nalola omuruchi omuyiakha nasinjiile ahambi nende isilo mubwinjililo bwe Ihekalu, shinga olwa eshiima shialinji. Omuruchi tsana yali nabotokhanwe nende abakhongo babalindi nende abokhukhupa tsitarumbeta. Ne abandu boosi bali nibaayulanga nibasaangaalile nibakhupanga tsitarumbeta. Mana Atsalia narandula tsingubotsie muburuma niyaayula naboola ari, “Buno nobukhobani! Buno nobukhobani!”

¹⁵Naye omwisaaliisi Yehoyada shiyayenya mbu Atsalia yererwe muhekalu ta, kho nalaka abakhongo babalindi abo ari, “Murusie hakari wetsinyaali tsiabelihe, ne mwire omundu yesi outeema okhumuhonokoosia.”

¹⁶Kho nibamutiila nibamuyila mulwanyi lwoburuchi, nende habundu halangwa mbu “Hashilibwa shia Tsifarasi,” mana nibamwiiriraho.

¹⁷Mana omwisaaliisi Yehoyada nakhola indakano hakari aha OMWAMI Nyasaye nende omuruchi nende abandu, mbu, abandu abo balabetsanga aba OMWAMI Nyasaye. Khandi nakhola indakano hakari homuruchi nende abandu.

¹⁸Abandu boosi beshialo eshio nibatsia nibenjila muhekalu yomunyasaye Baali nibachikwisia hasi, nibalikulula ebimalilo biemisango bialimwo, nende ebifwanani, khandi nibeera Matani, omwisaaliisi wa Baali imbeli webimalilo biemisango. Mana Yehoyada naraho abalindi abokhulinda Ihekalu.

¹⁹Mana ye omwene halala nende abakhongo babalindi, nende abalindi beinzu yomuruchi nende abalindi bomuruchi nibakooba omuruchi okhurula muhekalu okhuula munzuye yoburuchi, ne abandu boosi nibabalondakhwo. Yoashi yalonda khunjila yeshilibwa shiabalindi, mana nabukula obwikhalobwe khushifumbi shioburuchi.

²⁰Abandu boosi basaangaala muno, nalio litookho liosi niliba nomulembe shichila Atsalia yali niyerirwe nolukanga munzu yoburuchi.

²¹Yoashi yachaaka okhuruka eshialo shia Yuda nali nemiyika musafu.