Read wanga 2 ABARUCHI 13 Bible Online

2 ABARUCHI 13 - wanga bible

2 ABARUCHI 13

¹Mumuyika kwa amakhumi kabili nachitaru (23) okwa Yoashi omusiani wa Ahazia yali omuruchi wa Yuda, Yehoahazi wa Yehu yemekhwa okhuba omuruchi wa Isiraeli, mana naruka mu Samaria khulwemiyika ekhumi namusafu (17).

²Yesi khandi yakhola obwonooni imbeli wa OMWAMI Nyasaye shinga omuruchi Yeroboamu owamuranjilila, ne nakhola Abaisiraeli okhukhola obwonooni, shiyalekha okhukhola obwonooni tawe.

³Mana OMWAMI Nyasaye natiililwa Abaisiraeli oburuma ne khulwa oluhoono olurambi yabalekha hasi wobunyali bwa Hazaeli omuruchi wa Aramu halala nende omwanawe Benihadadi.

⁴Mana Yehoahazi nasaaya khu OMWAMI Nyasaye, naye OMWAMI Nyasaye nahulila amasaayoke shichila yalola shinga omuruchi wa Siria yali namiinanga obululu Abaisiraeli.

⁵OMWAMI Nyasaye yarumila Abaisiraeli omwimilisi owabahonokosia okhurula mubunyali bwa Abasiria, mana Abaisiraeli nibamenya mumulembe shinga olwa balinji khale.

⁶Nebutswa, shibalekha obwonooni bwomuruchi Yeroboamu yali niyachachia okhukhola tawe, batsiililila butswa okhubukhola. Khandi eshifwanani shiomunyasaye mukhasi Ashera shiatsiililila okhuba mu Samaria.

⁷Yehoahazi shiyali nabelihe bandi abatong'a ta, habula abelihe amakhumi karano bokhutsifarasi, amakaari ekhumi, nende abelihe abokhubilenje ebikhumila eshikhumi (10,000), shichila omuruchi wa Siria yali niyeera abandi boosi, niyabasenachila hasi shinga olufu.

⁸Amakhuwa kandi koosi akomuruchi yakhola nende ebikholebie biobululu kahandikwa mushitabu shiamakhuwa kakhale kabaruchi ba Isiraeli.

⁹Yafwa naye nayabilwa mu Samaria, mana omusianiwe mbu Yehoashi nakalukha mushilenjeshie okhuba omuruchi.

¹⁰Mumuyika kwamakhumi kataru namusafu Yoashi nali omuruchi wa Yuda, Yehoashi omusiani wa Yehoahazi yemekhwa okhuba omuruchi wa Isiraeli, mana naruka mu Samaria khulwemiyika ekhumi nachisasaba.

¹¹Yesi khandi shinga Yeroboamu yakhola obwonooni imbeli wa OMWAMI Nyasaye shinga Yeroboamu omuruchi wamuranjilila yakhola; mana nakhola Abaisiraeli okhutsiililila okhukhola obwonooni.

¹²Amakhuwa kandi koosi akomuruchi Yehoashi yakhola halala nende obulwanibwe bweitswoni muno, kahandikwa mushitabu shiamakhuwa kakhale kabaruchi ba Isiraeli.

¹³Yehoashi omuruchi wa Yuda yafwa, ne nayabilwa mubilindwa biabaruchi mu Samaria, mana omusianiwe mbu Yeroboamu wakhabili nakalukha mushilenjeshie okhuba omuruchi.

¹⁴Omulakusi Elisha yatiilwa nobulwale obutinyu obwamala nibumwira. Nashilwalanga, omuruchi Yehoashi wa Isiraeli yatsia okhumulola; Yehoashi nalila naboola ari, “Papa wanje! Papa wanje omulwani wamaani wa Isiraeli!”

¹⁵Naye Elisha namuboolela ari, “Bukula obuyingo nende ebisele.” Mana Yehoashi nabibukula.

¹⁶Omulakusi Elisha namuboolela mbu, yerecheshe okhulasa. Mana omuruchi oyo nakhola ario. Ne Elisha nara amakhonoke mumakhono komuruchi oyo,

¹⁷Elisha namuboolela ari, “Yikula litirisha elihenjile elubeka lwa Siria.” Omuruchi niyekula. Mana Elisha khandi namuboolela ari, “Khalase tsisele.” Mana nalasa. Elisha naboola ari, “Niwe tsisele etsia OMWAMI Nyasaye, etsiolekhoonyela okhuhula Siria. Nolwane nende Abasiria habundu halangwa mbu Efeki, okhuula olwa nobahule.”

¹⁸Mana Elisha namuboolela ari, “Bukula tsisele tsindi” Omuruchi oyo nabukula. Elisha namuboolela ari, “Tsilase hasi mwiloba.” Omuruchi oyo natsilasa hasi okhuula khataru mana nalekha.

¹⁹Elisha namusinyishila muno, ne namuboolela ari, “Obeele nokhoyile okhutsilasa hasi okhuula kharano noho khasasaba, mana wakhahulile Abasiria nobasasilia elala. Nebutswa bulano olabahula butswa okhuula khataru khonyene.”

²⁰Mana Elisha nafwa, ne nayabilwa. Ne buli khumuyika tsing'anda tsia Abamoabu tsiaseeranga Isiraeli.

²¹Inyanga yindi, Abaisiraeli bandi bali nibayabilanga omulambo, ne bwangu nibalola omukanda kwabaseeri ba Abamoabu, olwa balola omukanda okwo, basukuna omulambo okwo mushilindwa shia Elisha mana nibelukha. Olwa omulambo okwo kwetiisia khumakumba ka Elisha kwalamukha mana omundu oyo nasinjila.

²²Omuruchi Hazaeli wa Siria yasandia Abaisiraeli khulwemiyika chiosi echia Yehoahazi yali omuruchi;

²³Nebutswa, OMWAMI Nyasaye yabakholela aka eshisa khandi nababeela tsimbabasi. Shiyabalekha nibasasibwa ta, habula yabakhoonya khulwa okhubela indakano ya yali niyakhola nende Aburahamu; Isaka, nende Yakobo. Okhuula olwa leelo shiyekombangakhwo okhubasasia tawe.

²⁴Omuruchi Hazaeli wa Siria yafwa mana omusianiwe mbu Benihadadi nakalukha mushilenjeshie okhuba omuruchi.

²⁵Mana omuruchi Yehoashi wa Isiraeli yahula Benihadadi okhuula khataru, kho nabukula khandi amatookho ka Benihadadi yali niyabukula munyanga tsioburuchi bwa Yehoahazi owali samwana Yehoashi.