Read wanga 2 ABARUCHI 14 Bible Online

2 ABARUCHI 14 - wanga bible

2 ABARUCHI 14

¹Mumuyika kwakhabili Yehoashi omusiani wa Yehoahazi nali omuruchi wa Isiraeli, Amazia omusiani wa Yoashi yemekhwa okhuba omuruchi wa Yuda.

²Yemekhwa nali nemiyika amakhumi kabili nachirano mana naruka mu Yerusalemu khulwemiyika amakhumi kabili nashienda. Nyinamwana yalangwa mbu Yehoadini okhurula Yerusalemu.

³Omuruchi uno yakhola amakhuwa amalayi imbeli wa OMWAMI Nyasaye, nebutswa aka yakhola shikaali amalayi shinga aka omuruchi Daudi kuukanyene yakhola tawe. Habula yakhola amakhuwa koosi shinga olwa Yoashi samwana yakhola.

⁴Shiyalikulula abundu habandu benamilanga abanyasaye bandi tawe, nabo abandu batsiililila okhuhaanilaho emisango nende okhusambilaho obubane.

⁵Olwa omuruchi Amazia yali niyakhasimbiila obulayi muburuchibwe yeera abakhongo abali nibeera samwana owali omuruchi.

⁶Nebutswa shiyeera abaana babwe ta shichila yaloonda lilako elia OMWAMI Nyasaye yalachilisia mushitabu shiamalako ka Musa mbu, “Abebuli baleerwa khulwa obubi bwabaana babwe bakhola tawe, nabo abaana baleerwa khulwa obubi bwabebuli babwe bakhola tawe; habula buli mundu alafwa khulwa obwonoonibwe omwene.”

⁷Amazia yeera abandu ba Edomu ebikhumila ekhumi (10,000) mwibanda liomunyu. Khandi yatiila litookho lia Sela mubulwani mana nalikulikha mbu, Yokitseli, elishilangungwa lirio okhuula olwa leelo.

⁸Mana Amazia naruma abarume khumuruchi Yehoashi wa Isiraeli naboola ari, “Itsa khulwane noba noli omusaatsa.”

⁹Nebutswa, omuruchi Yehoashi wa Isiraeli yakalusia omuruchi Amazia ari, “Inyanga yindi omutsuru kwebisisia okwo mubikulu bia Lebanoni kwaboolela omusaala omusiita[2] kwa Lebanoni kuri, ‘Bashila omusiani wanje omukhaanawo.’ Nebutswa, isolo nabulimo omu Lebanoni yetsa niyikwenachila eshitsuru eshia yebisisia eshio hasi.

¹⁰Toto mwene iwe Amazia wahulile Abaedomu, ne bulano oli neinjinia muno. Kho wihotselesie muluyalilwo mana wikhale ingo. Eshichila niwirerera amasila aketsa okhukhumala iwe nende abandu ba Yuda nishiina?”

¹¹Nebutswa Amazia nakhaya okhurecheresia. Kho omuruchi Yehoashi narula nabandube nibatsiayo. Mana ye halala nende abandube nibalwana nende omuruchi Amazia mwihe lia Betsishemeshi mu Yuda.

¹²Abelihe ba Amazia nibahulwa khandi abandube boosi nibelukha nibakalukha nango wabwe.

¹³Omuruchi Yehoashi natiila omuruchi Amazia, natsia niyoola Yerusalemu nalikulula lisiisi lielitookho okhurula mushilibwa shia Efuraimu okhuula khushilibwa shiomukoona; habundu ahambi tsimita ebikhumi bibili (200).

¹⁴Nabukula itsahabu yoosi nende ifetsa ya yanyoolamwo. Khandi nabukula ebimanulwa biomuhekalu nende libishilo liosi liomunzu yoburuchi, mana nakalusia ebindu ebio biosi Samaria. Yabukula khandi abahambe natsia ninabo.

¹⁵Amakhuwa koosi aka omuruchi Yehoashi yakhola halala nende akobululubwe mwihe elia yalwana nende omuruchi Amazia wa Yuda kahandikwa mushitabu shiamakhuwa kakhale kabaruchi Abaisiraeli.

¹⁶Yehoashi yafwa mana nayabilwa mubilindwa biabaruchi mu Samaria. Mana omusianiwe mbu Yeroboamu owakhabili nakalukha mushilenjeshie okhuba omuruchi.

¹⁷Omuruchi Amazia wa Yuda yamenya emiyika ekhumi nachirano olunyuma lwokhufwa khwomuruchi Yehoashi wa Isiraeli.

¹⁸Amakhuwa kandi koosi akomuruchi Amazia yakhola kahandikwa mushitabu shiamakhuwa kakhale kabaruchi ba Yuda.

¹⁹Abandu bandi basanjilana mbu bamwirire mu Yerusalemu, nebutswa yelushila mwitookho lia Lakishi, nabo abasukube abo bamuloondakhwo ebwene eyo mana nibamwiira.

²⁰Omulambokwe kwachingwa netsifarasi nikukalusibwa Yerusalemu, mana nikuyabilwa mubilindwa biabaruchi mwitookho lia Daudi.

²¹Abandu ba Yuda babukula Uzia owali nali nemiyika ekhumi nachisasaba mana nibamwemekha okhuba omuruchi okhukalukha mushilenje shia samwana.

²²Uzia yahula litookho lia Elatsi, ne naliumbakha obuyia olunyuma lwokhufwa khwa samwana.

²³Mumuyika kwekhumi nakharano kwomuburuchi bwa Amazia omusiani wa Yoashi omuruchi wa Yuda, Yeroboamu omusiani wa Yehoashi yemekhwa okhuba omuruchi wa Isiraeli, mana naruka mu Samaria khulwemiyika amakhumi kane namulala (41).

²⁴Omuruchi Yeroboamu yakhola obwonooni imbeli wa OMWAMI Nyasaye, shinga obwa Yeroboamu omusiani wa Nebati owamuranjilila yakhola. Yeroboamu yali niyemilila Abaisiraeli okhukhola obwonooni.

²⁵Yalwana nakalusia olukongo lwali lwa Isiraeli okhurula khunjila ya Hamatsi elubeka lwemasaba okhuula khunyanza yomunyu elubeka lwemulambo. Kano niko aka OMWAMI Nyasaye wa Isiraeli yali niyasuubisia okhubirira mumukhalabaniwe Yona omusiani womulakusi Amitai okhurula Gatsi Heferi.

²⁶OMWAMI Nyasaye yalola amanyakhano amakhongo ka Abaisiraeli bali nibalimwo, ne omundu shiyaliho owokhubakhoonya ta.

²⁷Nebutswa OMWAMI Nyasaye shiyali niyenya okhumulula Abaisiraeli boosi okhurula khushialo ta, kho yabahonia okhubirira mu Yeroboamu omuruchi wakhabili.

²⁸Amakhuwa kandi ka Yeroboamu omuruchi wakhabili yakhola, aka itswoniye nende olwa yakalusia khandi litookho lia Damasiko nende Hamatsi nakalusilia Isiraeli kahandikwa mushitabu shiamakhuwa kakhale kabaruchi ba Isiraeli.

²⁹Yeroboamu yafwa ne nayabilwa mubilindwa biabaruchi, mana omusianiwe mbu Zekaria nakalukha mushilenjeshie okhuba omuruchi.