Read wanga 2 ABARUCHI 15 Bible Online

2 ABARUCHI 15 - wanga bible

2 ABARUCHI 15

¹Mumuyika kwamakhumi kabili namusafu (27) Yeroboamu wakhabili nali omuruchi wa Isiraeli, Uzia omusiani wa Amazia yemekhwa okhuba omuruchi wa Yuda.

²Yali nali nemiyika ekhumi nachisasaba olwa yemekhwa okhuba omuruchi. Ne yaruka mu Yerusalemu khulwemiyika amakhumi karano nachibili. Nyinamwana yalangwa mbu Yekolia okhurula Yerusalemu.

³Uzia yakhola amakhuwa amalayi imbeli wa OMWAMI Nyasaye shinga olwa Amazia samwana yakhola.

⁴Nebutswa habundu hokhwinamila abanyasaye bandi shihasasibwa tawe, kho abandu batsiililila okhuhaanilaho emisango nende okhusambilaho obubane.

⁵OMWAMI Nyasaye yareerera omuruchi Uzia obulwale bwobuchele obwamutiila okhuula olwa yafwa. Yamenya yenyene munzuye, nalakholakhwo omulimo kwosi tawe. Omusianiwe mbu Yonatsani yasinjilila inzuye yoburuchi khandi naruka abandu ba Isiraeli.

⁶Amakhuwa kandi koosi aka Uzia yakhola kahandikwa mushitabu shiamakhuwa kakhale kabaruchi ba Yuda.

⁷Uzia yafwa mana nayabilwa mubilindwa biabaruchi mwitookho lia Daudi. Mana omusianiwe mbu Yotsamu nakalukha mushilenjeshie okhuba omuruchi.

⁸Mumuyika kwamakhumi kataru namunane (38) Uzia nali omuruchi wa Yuda, Zekaria omusiani womuruchi Yeroboamu wakhabili yemekhwa okhuba omuruchi wa Isiraeli. Mana naruka mu Samaria khulwemiesi chisasaba.

⁹Shinga abaruchi bandi abamuranjilila, yesi yonoonela OMWAMI Nyasaye. Shiyalekha okhukhola obwonooni bwa Yeroboamu omusiani wa Nebati yakhola khulwa okhwimilila Abaisiraeli okhukhola obwonooni tawe.

¹⁰Shalumu omusiani wa Yabeshi yasanjilana nende abashie okhumukhoba Zekaria, yamuseera imbeli wabandu ne namwirira Ibuleamu, mana nakalukha mushilenjeshie shinga omuruchi.

¹¹Amakhuwa kandi koosi aka omuruchi Zekaria yakhola kahandikwa mushitabu shiamakhuwa kakhale kabaruchi ba Isiraeli.

¹²Kho obusuubisie obwa OMWAMI Nyasaye yali niyasuubisia omuruchi Yehu mbu, “Abolwibulolwo okhuula khubolwibulo lwakhane bakhabe abaruchi ba Isiraeli.” Kho obusuubisie obwo nibusiibwa. Nikamala nikaba kario.

¹³Mumuyika kwamakhumi kataru nashienda (39) Uzia nali omuruchi wa Yuda, Shalumu omusiani wa Yabeshi yemekhwa okhuba omuruchi wa Isiraeli. Mana naruka mu Samaria khulwomwesi mulala.

¹⁴Mana Menahemu omusiani wa Gadi narula Etiraza natsia Samaria. Naseera omuruchi Shalumu ne namwira, mana nakalukha mushilenjeshie okhuba omuruchi.

¹⁵Amakhuwa kandi koosi aka omuruchi Shalumu yakhola halala nende akobukhobanibwe kahandikwa mushitabu shiamakhuwa kakhale kabaruchi ba Isiraeli.

¹⁶Olwa Menahemu yali khunjila narulanga Tiriza yasasia litookho lia Tifusa nende abali nibamenyamwo boosi, nende amataala karondokhane ninalio shichila abandu bomwitookho elo shibayehaana abeene khuye tawe. Yarandula kata khandi tsinda tsiabakhasi boosi abali tsinda khulwa okhwira abaana balimwo.

¹⁷Mumuyika kwamakhumi kataru na shienda (39) Uzia nali omuruchi wa Yuda, Menahemu omusiani wa Gadi yemekhwa okhuba omuruchi wa Isiraeli. Mana naruka mu Samaria khulwemiyika ekhumi.

¹⁸Yoonoonela OMWAMI Nyasaye, ne muburuchibwe bwosi shiyalekha okhukhola obwonooni bwomuruchi Yeroboamu omusiani wa Nebati yakhola khulwa okhwimilila Abaisiraeli okhwonoona tawe.

¹⁹Mana Tigilatsi Pileseri omuruchi wa Siria naseera Isiraeli, ne omuruchi Menahemu namuhelesia tsikilo ebikhumila amakhumi kataru natsine (34,000) tsieifetsa kho mbu akhoonye Menahemu okhutsiilila okhuruka eshialo eshio.

²⁰Menahemu yabukula amapesa ako okhurula khubandu abayinda ba Isiraeli khulwa okhulunyia buli mundu okhuhaana ebitonye amakhumi karano bieifetsa. Mana Tigilatsi Pileseri nakalukha mushialoshie.

²¹Amakhuwa kandi koosi aka Menahemu yakhola kahandikwa mushitabu shia amakhuwa kakhale kabaruchi ba Isiraeli.

²²Menahemu yafwa mana nayabilwa, naye omusianiwe mbu Pekahia nakalukha mushilenjeshie okhuba omuruchi.

²³Mumuyika kwamakhumi karano (50) Azalia nali omuruchi wa Yuda, Pekahia omusiani wa Menahemu yemekhwa okhuba omuruchi wa Isiraeli, mana naruka Samaria khulwemiyika chibili.

²⁴Pekahia yakhola obwonooni imbeli wa OMWAMI Nyasaye, ne shiyalekha okhukhola obwonooni bwomuruchi Yeroboamu omusiani wa Nebati yakhola khulwa okhwimilila Abaisiraeli okhukhola obwonooni tawe.

²⁵Mulala khubakhongo belihe mbu Peka omusiani wa Ramalia yakaasia shinga olwa yakhamwira. Yabukula abandu amakhumi karano abokhurula Giliadi nibatsia ninaye ne nibera Pekahia nali mulukoba lwomukari lwelitookho mu Samaria, mana Peka nakalukha mushilenjeshie okhuba omuruchi.

²⁶Amakhuwa kandi koosi aka Pekahia yakhola kahandikwa mushitabu shiamakhuwa kakhale kabaruchi ba Isiraeli.

²⁷Mumuyika kwamakhumi karano nachibili (52) Uzia nali omuruchi wa Yuda, Peka omusiani wa Remalia yemekhwa okhuba omuruchi wa Isiraeli, mana naruka mu Samaria khulwemiyika amakhumi kabili (20).

²⁸Yesi khandi yakhola amabi imbeli wa OMWAMI Nyasaye nakhola obwonooni bwomuruchi Yeroboamu omusiani wa Nebali yakhola owemilila Abaisiraeli okhukhola obwonooni.

²⁹Olwa Peka yali narukanga nilwo olwa Tigilatsi Pileseri omuruchi wa Siria yabukula amatookho ka Iyoni, Abeli Betsi Maaka, Yanoa, Kedeshi nende Hazori, halala nemikunda chia Giliadi, Galilaya, nende Nafutali, mana nayila abandu abo Asiria nibali abahambe.

³⁰Mumuyika kwamakhumi kabili (20) Yotsamu omusiani wa Uzia nali omuruchi wa Yuda, Hoshea omusiani wa Ela yakaasia shinga olwa yakhera omuruchi Peka. Yamwira ne nakalukha mushilenjeshie okhuba omuruchi.

³¹Amakhuwa kandi koosi akomuruchi Peka yakhola kahandikwa mushitabu shiamakhuwa kakhale kabaruchi ba Isiraeli.

³²Mumuyika kwakhabili kwomuburuchi obwa Peka omusiani wa Remalia omuruchi wa Isiraeli, Yotsamu omusiani wa Uzia yachaaka okhuruka eshialo shia Yuda.

³³Yali nali nemiyika amakhumi kabili nachirano olwa yemekhwa, mana naruka mu Yerusalemu khulwemiyika ekhumi nachisasaba. Nyinamwana yalangwa mbu, Yerusha omukhaana wa Zadoki.

³⁴Yotsamu yakhola amakhuwa amalayi imbeli wa OMWAMI Nyasaye shinga olwa Uzia samwana yali niyakhola.

³⁵Nebutswa, habundu hokhwinamila abanyasaye bandi, shihalikululwa tawe. Abandu batsiililila okhuhaanilayo emisango nende okhusambilayo obubane. Yotsamu niye owombakha eshilibwa shielubeka lwemasaba lwa Ihekalu.

³⁶Amakhuwa kandi koosi aka Yotsamu yakhola kahandikwa mushitabu shiamakhuwa kakhale kabaruchi ba Yuda.

³⁷Mutsinyanga etsio, OMWAMI Nyasaye yaruma olwambeli omuruchi Rezini wa Siria nende omuruchi Peka wa Isiraeli okhuseera eshialo shia Yuda.

³⁸Yotsamu yafwa ne nayabilwa mubilindwa biabaruchi mwitookho lia Daudi. Mana omusianiwe mbu Ahazi nakalukha mushilenjeshie okhuba omuruchi.