Read wanga 2 ABARUCHI 18 Bible Online

2 ABARUCHI 18 - wanga bible

2 ABARUCHI 18

¹Mumuyika kwakhataru Hoshea omusiani wa Ela nali omuruchi wa Isiraeli, Hezekia omusiani wa Ahazi yemekhwa okhuba omuruchi wa Yuda.

²Yali nali nemiyika amakhumi kabili nachirano olwa yemekhwa, mana naruka mu Yerusalemu khulwemiyika amakhumi kabili nende shienda. Nyinamwana yalangwa Abiya omukhaana wa Zakaria.

³Omuruchi Hezekia yakhola amakhuwa amalayi imbeli wa OMWAMI Nyasaye shinga butswa olwa Omuruchi Daudi kuukanyene yali niyakhola.

⁴Yasasia habundu ha abamahanga benamilanga abanyasaye babwe, nalikulula tsisiilo tsiamachina, nende okhutundubula eshifwanani shiomunyasaye weshikhasi Ashera. Yafunaka mubitonye inzokha yomukasa ya Musa yali niyeranya eyalangungwa mbu Nehushitani. Okhuula khubise ebio Abaisiraeli bachisambilanga obubane khulwa okhuchihelesia oluyali.

⁵Hezekia yesikanga mu OMWAMI Nyasaye wa Isiraeli. Shiyaliho omuruchi undi yesi yesi mubaruchi ba Yuda owali shinga ye, kata mubamuranjilila kata mu abetsa olunyumalwe tawe.

⁶Yali omwisiikwa khu OMWAMI Nyasaye, ne shiyalekhakhwo okhulonda amalakoke tawe. Yalinda amalako koosi aka OMWAMI Nyasaye yahelesia Musa.

⁷Kho OMWAMI Nyasaye yali ninaye, naye yanyalilungwa mukoosi ka yakhola. Yakholela omuruchi wa Asiria induli mana naloba okhuba hasiwe.

⁸Yahula Abafilisiti mwihe khandi nayaaya ebindu wa bali nibamenya. Yayaaya ebindu okhuchaachila khwitaala litiiti muno okhuula khwitookho likhongo muno, halala nende Gaza nende amataala akalibotokhaane.

⁹Mumuyika kwakhane Hezekia nali omuruchi, ne nikuli omuyika kwamusafu, Hoshea nali omuruchi wa Isiraeli, omuruchi Shalumaneseri wa Asiria yaseera Isiraeli mana nabotokhana litookho lia Samaria.

¹⁰Olunyuma lwemiyika chitaru nalibotokhaane, Abasiria babukula litookho lia Samaria. Kho litookho elo liabukulwa mumuyika kwakhasasaba Hezekia nali omuruchi wa Yuda, okwali omuyika kwashienda Hoshea nali omuruchi wa Isiraeli.

¹¹Omuruchi wa Asiria yabukula Abaisiraeli nabayila Asiria nibali shinga ababohe mana nabara okhumenya mwitookho lia Hala, abandi nibamenya ahambi nende omwalo kwa Habori mulukongo lwa Gozani, nabo abandi nibamenya mumatookho ka Media.

¹²Litookho lia Samaria liabukulwa shichila Abaisiraeli shibalonda lilako elia OMWAMI Nyasaye wabwe tawe, habula bafunaka indakano ya yali niyakaasia ninabo, khandi nibalalonda amalako koosi aka Musa omukhalabani wa OMWAMI Nyasaye yabahelesia tawe. Shibakahulilanga kata okhukalonda tawe.

¹³Mumuyika kwekhumi nakhane Hezekia nali omuruchi wa Yuda, Senakeribu omuruchi wa Asiria yaseera amatookho kamasiisi ka Yuda mana nakahula.

¹⁴Omuruchi Hezekia yaruma oburume khumuruchi Senakeribu owali nali Lakishi naboola ari, “Ekholile obumayanu, nochama oleshe okhuuseera, nasi ndalakhurunga shiosi eshia wenya.” Mana omuruchi Senakeribu niyenya mbu Hezekia omuruchi wa Yuda amurumile ifetsa eyihela tsikilo ebikhumila ekhumi (10,000), nende itsahabu eyihela tsikilo eshikhumila (1,000).

¹⁵Kho omuruchi Hezekia namurumila ifetsa yoosi eyali muhekalu nende mwibishilo liomunzu yoburuchi.

¹⁶Khandi nakhuura itsahabu yali khumiliango chia Ihekalu nende itsahabu ya ye omwene yali niyabakha khubihindi biemiliango echio, mana nachiyila yoosi khumuruchi Senakeribu.

¹⁷Omuruchi wa Asiria oyo naruma omukanda omukhongo kwabelihe okhurula Lakishi okhutsia okhuseera Hezekia nali Yerusalemu. Omukanda okwo kwemililwa nende abakhongo belihe bataru. Olwa boola Yerusalemu basinjila khwiyabo liamaatsi liemukulu, ahambi khumuhanda okutsia ewa abanabi betsingubo bali.

¹⁸Mana nibalanga omuruchi Hezekia, ne abakhongobe abelihe bataru abo nibatsia ninaye; bali, Eliakimu omusiani wa Hilikia owasinjililanga inzu yoburuchi, Shebuna owali omuhandichi womushiina, nende Yoa omusiani wa Asafu owabikhanga amahandiko.

¹⁹Mulala khubakhongo ba Abasiria abo nababoola mbu, omuruchi wa Asiria yenyanga okhumanya eshichilanga Hezekia naba neitswoni muno.

²⁰Nabareeba ari, “Mupaaranga mbu amakhuwa butswa kanyala okhuhelana nobusitsa bwokhulwana nende amaani kelihe? Niwiina owomupaaranga mbu alamukhoonya olwa mukholela Asiria induli?

²¹Lola, iwe wileetanga khushialo shia Misiri okhukhukhoonya, nebutswa ako kali butswa shinga okhubukula likata elifuniishe okhuba indabushi, elinyala okhufumira omukhono khandi okhukusaalisia lwoba niwitinyililakhwo. Omuruchi wa Misiri ali butswa shinga likata elo khumundu yesi owileeta khuye.”

²²Omukhongo wa Asiria oyo natsiililila okhuboola ari, “Noho witsa okhumboolela mbu wileetanga khu OMWAMI Nyasaye wenywe? Shibiali ebimalilo biemisangobie ebia omuruchi Hezekia yasasia. Mana khandi naboolela abandu ba Yuda nende Yerusalemu mbu benamilenje OMWAMI Nyasaye oyo khushimalilo shiemisango eshili Yerusalemu?

²³Yitsa wichelasie nomwami wanje omuruchi wa Asiria. Nasi ndalakhuhelesia tsifarasi ebikhumila bibili (2,000) noba nonyala okhunyoola abandu bokhutsiniinakhwo!

²⁴Iwe shionyala okhwichelasia kata khumutiiti mwene khubakhongo ba Asiria tawe. Ne nilwo lwopaaranga mbu olanyoola obukhonyi bwamakaari nende abokhwilushilakhwo okhurula Misiri?

²⁵Mupaaranga mbu olwa isie eseera lihanga lienywe nende okhulisasia ndalekhoonyela obunyali obwa OMWAMI Nyasaye? OMWAMI Nyasaye omwene niye owamboolela okhuliseera nende okhulisasia.”

²⁶Mana Eliakimu, Shebuna, nende Yoa nibaboolela omukhongo wa Asiria oyo bari, “Omwami, boola ninefwe mu Luaramia, ifwe abakhalabanibo khuluhulilanga, olaboola Oluheburania tawe, okhuba abandu boosi abali khwisiisi bahulilanga.”

²⁷Omukhongo oyo nabakalusia ari, “Mupaaranga mbu ninywe nende omuruchi mwenyene abomwami wanje yarumile okhuboolela amakhuwa kano noho? Tawe, yarumile okhuboolela kata abandu abekhaale khumasiisi, abetsa okhulia amafwi kabwe nende okhunywa amenyali kabwe shinga olwa mwesi khandi mwitsa okhulia murio.”

²⁸Mana omukhongo oyo nasinjila nalanjilisia nomwoyo omukhongo muluheburania ari, “Recheresie akomuruchi wa Asiria aboola!

²⁹Amuchetsiyinjia mbu, mulafuchilile Hezekia okhumukatia tawe. Hezekia shianyala okhumuhonia tawe.

³⁰Khandi mulamufuchilile ye okhumutsuuba mbu mwileete khu OMWAMI Nyasaye tawe. Mulapaare mbu OMWAMI Nyasaye alamuhonia kata okhusinjisia abelihe befwe aba Asiria okhulekha okhutiila litookho lienywe tawe.

³¹Mulamurecheresia Hezekia tawe, shichila omuruchi wa Asiria aboola ari, ‘Kasia omulembe ninasi mana orule mwitookho wihaane khwisie, mana buli mulala khwinywe alalia tsinzabibu tsiokhumitsabibu chienywe, nende okhulia amakhuyu kokhumikhuyu chienywe, nende okhunywa amaatsi komumayabo kenywe;

³²okhuula olwa nditsa okhumuyila mushialo eshili shinga eshienywe. Eshialo eshili neshiokhulia nende idivai indoro. Eshialo eshili nemikaate nende emikunda chiemitsabibu. Eshialo eshili nemisaala chiemiseituni, amafura kemiseituni nende obuushi. Kho mwahule obulamu, mulahula lifwa tawe. Ne mularecheresia aka Hezekia olwa amukaatia namuboolela mbu, OMWAMI Nyasaye alamuhonia tawe.

³³Mana abanyasaye belihanga lindi bahoniakhwo lihanga liabwe okhurula mumakhono komuruchi wa Asiria?

³⁴Bali hena abanyasaye ba Hamatsi nende Arafadi? Bali hena abanyasaye ba Sefawaimu, Hena nende Iwa? Bahonokosiakhwo litookho lia Samaria okhurula mumakhono kanje noho?

³⁵Niwiina khubanyasaye bamahanga kano owahoniakhwo eshialoshie okhurula mumakhono kanje? Kho OMWAMI Nyasaye yakhahonia arie Yerusalemu okhurula mumakhono kanje?’ ”

³⁶Nebutswa abandu baholeela butswa tsi, shibamukalusiakhwo likhuwa liosi liosi tawe; shichila omuruchi Hezekia yali nababooleele ari, “Shimulamukalusiakhwo likhuwa liosi liosi tawe.”

³⁷Mana Eliakimu, Shebuna, nende Yoa nibarandula tsingubo tsiabwe mushibeela, ne nibakalukha nibaboolela omuruchi Hezekia aka omukhongo wa Asiria oyo yali naboolile.