Read wanga 2 ABARUCHI 19 Bible Online

2 ABARUCHI 19 - wanga bible

2 ABARUCHI 19

¹Olwa omuruchi Hezekia yahulila amakhuwa ako, yarandula ebifwalobie nafwala amakunia mana natsia muhekalu ya OMWAMI Nyasaye.

²Mana naruma Eliakimu owali omusinjilili weinzu yoburuchi, nende Shebuna owali omuhandichi wamakhuwa komushiina nende abesaaliisi abakhongo khumulakusi Isaya omusiani wa Amozi. Boosi bali nibefwalile amakunia.

³Yababoolela mbu batsie baboolele Isaya bari, “Inyanga yino neinyanga yobunyakhani, khuhebungwa eshinyasio khandi khuli neshifimbwa murwe. Khuli shinga omukhasi oulumwa inzibula nebutswa abula amaani akokhwibula.

⁴Omuruchi wa Asiria arumile omukhongowe okhwitsa okhunyeka Nyasaye ouliho mwoyo. OMWAMI Nyasayewo akhoya yahulila amanyeko kano, mana ahelesie abo abakarumbuule eshinyasio. Kho osaaye khu Nyasaye khulwa abandu befwe abahonokokha.”

⁵Olwa Isaya yahulila oburume bwomuruchi Hezekia,

⁶yabaruma okhukalukha okhuboolela Hezekia bari, “OMWAMI Nyasaye aboola mbu, shiolalekha Abasiria okhukhurisia nende amakhuwa kabwe mbu OMWAMI Nyasaye shianyala okhukhuhonia tawe.

⁷OMWAMI Nyasaye alakhola omuruchi oyo okhuhulila amakhuwa kobubeeyi akalamukhola okhukalukha mushialoshie, ne OMWAMI Nyasaye alamukhola okhwirwa nolukanga mushialoshie shiene.”

⁸Rabushaka omukhongo wa Asiria yahulila mbu, omuruchiwe arulile Lakishi, ne atsile okhuseera litookho lia Libuna elili ahambi Asiria, yatsia Libuna okhureeba aka akhola okhurula khumuruchi.

⁹Ne Omuruchi Senakeribu nanyoola likhuwa mbu, abelihe lia Misiri nibemiliilwe nende Tarahaka owokhurula Etsopia bali nibetsanga okhumuseera. Kho naruma ibarwa khumuruchi Hezekia owa Yuda,

¹⁰naboola ari, “Omunyasaye owa wisikanga akhubooleele mbu, shiolaba hasi owobunyali bwanje ta, nebutswa ako kalakhukaatia tawe.

¹¹Wahulile akomuruchi wa Asiria akholanga khwihanga liosi liaba nachoma okhusasia. Kho nawe opaaranga mbu olehonokokhamwo noho?

¹²Abakuuka banje basasia amatookho ka Gozani, Harari, nende Rezefu, mana nibeera abandu ba Betsedeni abamenyanga Telasari, ne abulaho khubanyasaye babwe owanyalilwa okhubahonia.

¹³Ne baliheena abaruchi bamatookho ka Hamatsi, Arapadi, Sefawaimu, Hena nende Iwa?”

¹⁴Omuruchi Hezekia nabukula ibarwa eyo okhurula khubarumwa abo, nachisooma. Mana natsia muhekalu ya OMWAMI Nyasaye, nabambula ibarwa eyo imbeli wa OMWAMI Nyasaye.

¹⁵Ne nasaaya khu OMWAMI Nyasaye naboola ari, “Iwe OMWAMI Nyasaye wa Isiraeli, owikhale khushifumbishio shioburuchi ikulu webilonje bietsimbaha, iwe wenyene niwe Nyasaye, ourukanga amahanga koosi akokhushialo. Niwe owalonga eshialo nende likulu.

¹⁶Bulano OMWAMI Nyasaye lolakhwo amakhuwa kekholekhanga khwifwe. Recheresia, ohulikhwo butswa amanyeko ka Senakeribu aboolanga khwiwe, iwe Nyasaye ouliho mwoyo.

¹⁷Kali habwene mbu, abaruchi ba Asiria basasiye amahanga amanji nende okhukhola emikunda chiabwe okhusikala eshikhaya.

¹⁸Basambile abanyasaye babwe nende okhubasasia, okhuba kata shibali abanyasaye ta, habula ebifwanani bietsimbao nende amachina ebiakaasibwa namakhono kabandu butswa.

¹⁹Bulano OMWAMI Nyasaye wefwe khuhonie okhurula khu Abasiria abo, kho mbu amahanga koosi keshialo kamanye mbu iwe wenyene OMWAMI Nyasaye niwe Nyasaye.”

²⁰Mana Isaya omusiani wa Amozi narumila omuruchi Hezekia oburume namuboolela mbu, OMWAMI Nyasaye wa Isiraeli umalile okhuhulila amasaayoke khulwa Senakeribu omuruchi wa Asiria.

²¹Ne kano niko aka OMWAMI Nyasaye arumbula khuye ari, “Litookho lia Yerusalemu likhutseshelela iwe Senakeribu khandi likhulechelesia.

²²Opaaranga mbu niwiina wonyechilenje nende okhuchaaya? Shiumbelesiye oluyali isie Nyasaye, Omutakatifu wa Isiraeli tawe.

²³Orumile abarumwabo okhwiyitsialila khwisie mbu wekhoonyela amakaariko okhuhula ebikulu ebirambi bia Lebanoni. Weyitsiala mbu ebweneyo warema nokwisia hasi emisaala emisiita emirambi, nende emitarakwe emirambi, khandi mbu wenjila okhuula mukari mwene mwemitsuru echio.

²⁴Weyitsiala mbu wayaba amayabo nende okhunywa amaatsi mushialo eshicheni, khandi mbu nebilenje ebikhaya abelihebo bachenda nibakhamia amaatsi komwalo kwa Naili.

²⁵“Oshili okhuhulilakhwo mbu, nisie owarechekha ako koosi okhwikholekha okhurula khale ta? Ne bulano emalile okhukakhola. Ndakhuhelesia obunyali bwokhutubula amatookho kamasiisi okhukwa amahindi.

²⁶Abandu abamenyangamwo bali ababula amaani, bali abari mana nibang'ang'aala. Bali butswa shinga obunyasi noho obulimo obumelanga khushilama shieinzu mana buuma nibushili okhukhula.

²⁷“Nebutswa isie emanyile buli shindu khwiwe, akokholanga nende wotsitsanga. Emanyile shinga olwa umbaarilanga amabi.

²⁸Embuliile amakhuwako shinga olwa umbariranga amabi nende okhwichinjimisiakhwo. Ne bulano enzia okhura olulobo lwanje mumooluko nende eshitiili mumunwakwo, nende okhukhukalusilia khunjila ya witsiilekhwo.”

²⁹Mana Isaya naboolela omuruchi Hezekia ari, “Shino nishio eshilolelo shiamakhuwa ketsa okhwikholekha. Omuyika kuno nende okulondakhwo olalia imele eyinabulimo, nebutswa omuyika kwakhataru olaraaka imeleyo omwene nende okhuchesa. Khandi olaraaka emitsabibu nende okhulia tsinzabibu tsiachio.

³⁰Abo abalehonokokha nibatong'a khuboluyia lwa Yuda balayindila shinga emisaala echiyilanga emisi hasi khandi nichiama ebiamo.

³¹Khwakhabeho nabandu mu Yerusalemu nende khushikulu shia Zayuni abalihonokokha, shichila OMWAMI Nyasaye achoomile okhukhola mbu kabe kario.

³²“Khulweshio, OMWAMI Nyasaye aboola khumuruchi wa Asiria ari, ‘Shialenjila mwitookho lino kata okhulasakhwo olusele lulala lwobuyingobwe tawe. Abulaho owelihe ouli neshikhumba oulasita ahambi nelitookho kata okhulibotokhana nalisira tawe.

³³Injila yayetselakhwo khandi niyo eyalakalushilakhwo. Shialenjilakhwo mwitookho tawe. Isie OMWAMI Nyasaye nisie ouboolile.

³⁴Ndalalinda litookho lino nende okhuliterera khulwa okhubela oluyali lwanje khandi khulwa okhubela obusuubisie bwandasuubisia omukhalabani wanje Daudi.’ ”

³⁵Mushilo shieinyanga eyo, omumalaika owa OMWAMI Nyasaye yatsia mukambi ya Abasiria, ne niyeera abandu abelihe ebikhumila eshikhumi namakhumi munane nabirano (185,000). Olwa bwashia inyanga yaloondakhwo boosi bali nibakwiile hasi nibafwile!

³⁶Mana Senakeribu, omuruchi wa Asiria nakalukha ingowe, ne namenya mwitookho lia Ninewe.

³⁷Inyanga yindi yali nali muhekalu niyenamilanga omunyasayewe Nisiroki, ne abasianibe babili Adarameleki nende Sharezeri nibamwira netsinganga tsiabwe. Mana nibelushila mushialo shia Ararati. Omusianiwe undi mbu Esahadoni nakalukha mushilenjeshie okhuba omuruchi.