Read wanga 2 ABARUCHI 2 Bible Online

2 ABARUCHI 2 - wanga bible

2 ABARUCHI 2

¹Ebise biola ebia OMWAMI Nyasaye okhuyila Eliya mwikulu okhubirila mushimbalakusi. Eliya nende Elisha bachaaka okhurula Giligali.

²Ne nibali khunjila, Eliya yaboolela Elisha ari, “Nochama osikale hano, shichila OMWAMI Nyasaye urumile okhutsia okhuula Betseli.” Nebutswa Elisha nakalusia ari, “Nditsuba muliira elia OMWAMI Nyasaye nende muliiralio mbu, shindalakhulekhakhwo tawe”. Kho nibakholomokha niboola Betseli.

³Omukanda kwabalakusi abali nibamenya Betseli nibetsa nibareeba Elisha bari, “Omanyilekhwo mbu, OMWAMI Nyasaye alabukula omwamiwo inyanga yino?” Naye nabakalusia ari, “Emanyile mbu kali kario, habula inywe muholeele butswa!”

⁴Mana Eliya naboolela Elisha ari, “Iwe, sikala hano, shichila OMWAMI Nyasaye urumile okhutsia okhuula Yeriko.” Naye Elisha namukalusia ari, “Nditsuba mbu, shinga OMWAMI Nyasaye aliho mwoyo, khandi shinga iwe oliho mwoyo, shindalakhulekhakhwo tawe!” Kho nibatsia niboola Yeriko.

⁵Khandi omukanda kwabalakusi abali nibamenya Yeriko nibareeba Elisha bari, “Omanyilekhwo mbu, OMWAMI Nyasaye alabukula omwamiwo uno inyanga yino?” Elisha nabakalusia ari, “Emanyile kali kario, nebutswa inywe holeele butswa tsi!”

⁶Mana Eliya naboolela Elisha khandi ari, “Sikala hano, shichila OMWAMI Nyasaye urumile okhutsia okhuula khumwalo kwa Yorodani.” Nebutswa Elisha yamukalusia ari, “Nditsuba mbu, shinga OMWAMI Nyasaye aliho mwoyo, khandi shinga iwe oliho mwoyo shindalakhulekha tawe.” Kho boosi bario nibatsiililila okhuchenda.

⁷Ne abalakusi amakhumi karano nibatsia ninabo okhuula khumwalo kwa Yorodani, Eliya nende Elisha nibasinjila khumwalo okwo, nabo abalakusi abo nibasinjila ehalekhwo.

⁸Mana Eliya nafwalula inguboye nachifumba, ne nakhupa khumaatsi ako, amaatsi ako nikahukhamwo eyi nende eyi, kho Eliya nende Elisha nibachenda khumuyeshe nibambukha nibatsia injelekha wakwo.

⁹Nibakhambukha, Eliya yaboolela Elisha ari, “Mboolela, wenyanga ekhukholelekhwo shiina neshili okhubukulwa?” Elisha namukalusia ari, “Ekhusaaya wumbelesiekhwo omukabo kwa rohowo eshikhabili.”

¹⁰Eliya namuboolela ari, “Usabile likhuwa litinyu, nebutswa noba niundola olwa embukulwa, olahelesibwa, ne nolandola ta, shiolahebwa tawe.”

¹¹Mana nibatsiililila okhuchenda nibaboola, mana bwangu likaari liomulilo nilikhwesungwa nende tsifarasi tsiomulilo nilibahukhasia, naye Eliya nayilwa mwikulu neshimbalakusi.

¹²Elisha yalola nayilungwa, ne niyayula naboolela Eliya ari, “Papa! Papa! Omulindi wa Isiraeli! Otsiile!” Mana nalalolakhwo Eliya khandi tawe. Mana mushibeela narandula tsingubotsie mubitonye bibili.

¹³Mana nabukula ingubo ya Eliya yali nalakasiye, ne natsia nasinjila khuluchinga lwomwalo kwa Yorodani.

¹⁴Mana nakhupa amaatsi neingubo eyo naboola ari, “OMWAMI Nyasaye aliheena bulano? Nyasaye wa Eliya?” Olwa yakhupa khumaatsi olwakhabili, kakabukhanamwo eyi nende eyi, mana niyambukha.

¹⁵Abalakusi amakhumi karano bokhurula Yeriko abo, bali balolanga, kho nibaboola bari, “Iroho ya Eliya yili mu Elisha!” Mana nibatsia okhumwakaanila nibenamia obweni bwabwe hasi khulwa okhumuhelesia oluyali nibaboola bari,

¹⁶“Khuli hano abasaatsa bamaani abandu amakhumi karano, lekha khutsie khukhaabe omwamiwo. Haundi Roho owa OMWAMI Nyasaye anyala okhuba namuchinjile namuyilile khushikulu noho mwibanda.” Naye Elisha nabakalusia ari, “Tawe! Shimulatsie tawe.”

¹⁷Nebutswa olwa bamulunyilisia yafimbwa omurwe okhubakaya. Kho nababoolela mbu batsie. Kho amakhumi karano abo nibatsia nibamukhaaba khulwa tsinyanga tsitaru nebutswa shibamunyoola tawe.

¹⁸Mana nibakalukha khu Elisha, owali nabalindiliile Yeriko, ne nabareeba ari, “Shiemukayilekhwo okhutsia?”

¹⁹Mana abasaatsa bandi okhurula mwitookho lia Yeriko nibatsia nibaboolela Elisha bari, “Omwami wefwe lola! Litookho liefwe lino nelilayi, nebutswa amaatsi kalio namabi, kakholanga abakhasi befwe okhwiruluutsa munda.”

²⁰Mana Elisha nababoolela ari, “Bukule omunyu mutiiti mure khushikaye eshiyia mana mundereere. Nabo nibakhola bario.”

²¹Mana natsia khusebele yamatsi, ne nasukuna omunyu okwo mumaatsi naboola ari, “Kano niko aka OMWAMI Nyasaye aboola mbu, ‘Emalile okhuhonia amaatsi kano, shikaleerakhwo abandu ta, kata okhukhola abakhasi okhwiruluutsa tawe.’ ”

²²Ne amaatsi ako nikatong'a nikali ameleleshe, ne kashili kario okhuula olwa leelo, shinga butswa olwa Elisha yaboola.

²³Mana Elisha narula Yeriko natsia Betseli. Ne olwa yali nali khunjila natsitsanga abasiani bandi barula mwitookho nibamutseshelela nibaboola bari, “Rula hano iwe omundu weshiole!”

²⁴Elisha niyeshebukha, ne nabalaamila eshilaamo shiobubi muliira elia OMWAMI Nyasaye. Mana tsitubu tsikhasi tsibili nitsirula mumutsuru nitsirandula mubitonye amakhumi kane nababili khubasiani abo.

²⁵Naye Elisha natsiililila okhutsia okhuula khushikulu shia Karimeli, ne olunyuma nakalukha Samaria.