Read wanga 2 ABARUCHI 21 Bible Online

2 ABARUCHI 21 - wanga bible

2 ABARUCHI 21

¹Manase yali nemiyika ekhumi nachibili olwa yemekhwa okhuba omuruchi, mana naruka mu Yerusalemu emiyika amakhumi karano nachirano. Nyinamwana yalangwa mbu, Hefiziba.

²Yakhola obwonooni imbeli wa OMWAMI Nyasaye, yakhola emiima chieshifwabi echia abandu bamahanga aba OMWAMI Nyasaye yali niyalonda okhurula imbeli wa Abaisiraeli bakholanga.

³Yombakha khandi habundu aha abamahanga okhwinamilaho abanyasaye babwe, habundu ha Hezekia samwana yali niyasasia. Yombakha ebimalilo biemisango khulwa okhwinamila omunyasaye Baali, khandi nakaasia eshifwanani shiomunyasaye weshikhasi Ashera, shinga lwomuruchi Ahabu yesi yali niyakhola. Omuruchi Manase khandi yenamilanga tsing'ining'ini.

⁴Yombakha ebimalilo biemisango biabamahanga muhekalu ya OMWAMI Nyasaye, habundu aha OMWAMI Nyasaye omwene yali niyaboola mbu niye oukhoyile okhwinamilwaho yenyene.

⁵Khandi niyombakha ebimalilo biemisango mutsinyanya tsibili tsieihekalu khulwa okhwinamila tsing'ining'ini.

⁶Yahaana omwanawe omusiani okhuba omusango kwokhusambwa, yakhola obulakusi nende obufumu, khandi natsia okhureeba okhurula khubetsinyengo nende abafumu. Yakhola obwonooni obukhongo imbeli wa OMWAMI Nyasaye, mana namusinyisia muno.

⁷Yabukula eshifwanani eshibaatse shiomunyasaye Ashera eshia yali nabatsile, ne nashira muhekalu, habundu watsana aha OMWAMI Nyasaye yali niyaboolela Daudi nende omusianiwe Solomoni ari, “Hano mu Yerusalemu, muhekalu muno, niho habundu ha ndaahula okhurula mumikunda chiosi echia tsimbia ekhumi natsibili tsia Isiraeli aha ekhoyile okhwinamilwa.

⁸Ne abandu ba Isiraeli nibaba nibalonda amalako kanje nende okhutiila lilako liosi elia omukhalabani wanje Musa yabahelesia, kho shindalafuchilila mbu balondwe okhurula mumukunda kwa ndahelesia abakuuka babwe tawe.”

⁹Nebutswa abandu ba Yuda shibahulila OMWAMI Nyasaye ta, naye Manase yabemilila okhukhola obwonooni obunji kata okhushila obwakholwa namahanga ka OMWAMI Nyasaye yalonda okhurula mushialo eshio, olwa abandube bali nibenjilangamwo.

¹⁰OMWAMI Nyasaye naboola okhubirira mubakhalabanibe abalakusi ari,

¹¹“Manase omuruchi wa Yuda akholile akeshifwabi kano, akali amabi muno okhushila aka Abakanani bakhola, khandi okhubirila mubifwananibie yenjisiye abandu ba Yuda mubwonooni.

¹²Khulweshio isie OMWAMI Nyasaye wa Isiraeli nendeere eshinyasio khu Yerusalemu nende khu Yuda, mbu omundu yesi owakhahulilekhwo yakhahuche.

¹³Khandi nehelesie Yerusalemu eshinyasio shinga olwa ndahelesia Samaria, shinga olwa ndakholela omuruchi Ahabu wa Isiraeli nende abolwibulolwe. Nerusie abandu boosi mu Yerusalemu mana litookho nilitong'a likhaya shinga eshikaye eshiosiibwe mana nishifumamibwa.

¹⁴Ndakhashiukhane nindekha abandu boosi abakhehonokoshe, mana nibahaana khubasuku babwe, abakhabatubule nende okhubukula eshialo shiabwe.

¹⁵Ndakhakholele abandu banje kano, shichila banzonooneele nende okhuyakula liruma lianje okhurula khubise biabakuuka babwe barula Misiri okhuula olwa leelo.”

¹⁶Okhumeetakhwo, Manase yeera abandu abanji ababula eshikha, nikachila emihanda chia Yerusalemu nichiitsulakhwo amatsayi; Yakhola kano okhumeeta khubwonooni obwa yakhola obwokhwimilila abandu ba Yuda okhwinamila ebifwanani, nabakhola okhwonoonela OMWAMI Nyasaye.

¹⁷Amakhuwa kandi ka Manase yakhola halala nende obwonooni bwa yakhola, kahandikwa mushitabu shiamakhuwa kakhale kabaruchi ba Yuda.

¹⁸Manase yafwa ne nayabilwa mumukunda kwoburuchi kwa Uzia, mana omusianiwe mbu, Amoni nakalukha mushilenjeshie okhuba omuruchi.

¹⁹Amoni yali nali nemiyika amakhumi kabili nachibili olwa yemekhwa okhuba omuruchi wa Yuda, mana naruka mu Yerusalemu khulwemiyika chibili. Nyinamwana yalangwa mbu Meshulemetsi omukhaana na Haruzi owokhurula mwitaala lia Yotiba.

²⁰Yesi khandi yakhola obwonooni imbeli ewa OMWAMI Nyasaye butswa shinga Manase samwana yakhola.

²¹Yalonda ebikhole bia samwana, niyenamila ebifwanani bia samwana yenamilanga.

²²Yaloba okhuhulila OMWAMI Nyasaye, Nyasaye wabakuukabe, khandi naloba okhulonda amalako ka OMWAMI Nyasaye.

²³Abakhongo bomuruchi Amoni nibamukoneshela mana nibamwira nali munzuye yoburuchi.

²⁴Mana abandu ba Yuda nibeera abandu boosi abali niberiire Amoni, mana nibemekha omusianiwe mbu Yosia okhuba omuruchi mushilenje shia samwana.

²⁵Amakhuwa kandi koosi aka Amoni yakhola kahandikwa mushitabu shiamakhuwa kakhale kabaruchi ba Yuda.

²⁶Amoni yayabilwa mung'ani yali mumukunda kwa Uza, mana omusianiwe mbu Yosia nakalukha mushilenjeshie okhuba omuruchi.