Read wanga 2 ABARUCHI 22 Bible Online

2 ABARUCHI 22 - wanga bible

2 ABARUCHI 22

¹Yosia yemekhwa okhuba omuruchi wa Yuda nali nemiyika munane, mana naruka mu Yerusalemu khulwemiyika amakhumi kataru namulala. Nyinamwana yalangwa mbu Yedida omukhaana wa Adayia okhurula mwitaala lia Bozikatsi.

²Yosia yakhola amakhuwa amalayi akachamisia OMWAMI Nyasaye, yalonda ebikhole biomuruchi Daudi kuukanyene, mana nalonda amalako koosi aka Nyasaye.

³Mumuyika kwekhumi namunane okwoburuchi bwa Yosia, omuruchi yaruma Shafani omusiani wa Asalia omuhandichi womushina, omwitsukhulu wa Meshulamu, mbu atsie muhekalu namulachilisia ari;

⁴“Tsia khumwisaaliisi omukhulundu Hilikia, omureebe mbu namapesa kanga kabesaaliisi balindanga omuliango kwokhwinjila muhekalu basoloole okhurula khubandu.

⁵Omuboolele ahaane amapesa ako khubandu abasinjiliile omulimo kwokhumbakha Ihekalu. Nabo barunje,

⁶abaari betsimbao, abombashi, ababaatsi bamachina, khandi bakule tsimbao nende amachina kokhumbashila Ihekalu.

⁷Abandu basinjiliile omulimo okwo balareebwa okhumanyia shinga bekhoonyela amapesa kabahebwa ta, shichila nabesiikwa mukhukhola khwabwe.”

⁸Mana Shafani nayilila Hilikia, omwisaaliisi omukhulundu amakhuwa ako. Hilikia naboolela Shafani omuhandichi womushiina ari; “Ndanyoolile eshitabu shia Amalako muhekalu.” Mana nashihaana khu Shafani, naye nashisooma.

⁹Mana Shafani nakalukha khumuruchi Yosia namuboolela ari, “Abakhalabanibo barusiye amapesa koosi akanyoolekha muhekalu mana nibakahaana khubakholi abasinjiliile omulimo kwokhukaasia Ihekalu.”

¹⁰Mana khandi nameeta okhumuboolela ari, “Omwisaaliisi omukhongo Hilikia yambelesiye eshitabu shino mbu ekhureerere.” Mana Shafani nashisooma imbeli womuruchi nomwoyo omukhongo.

¹¹Olwa omuruchi yahulila amakhuwa akali mushitabu eshia Amalako eshio, yarandula tsingubotsie mushibeela.

¹²Mana nalachilisia omwisaaliisi Hilikia, nende Ahikamu omusiani wa Shafani, nende Akibori omusiani wa Mikaya nende Shafani omuhandichi womushiina, nende Asayia omukhongo omulindi womuruchi ari,

¹³“Tsie muureebele khu OMWAMI Nyasaye khulwa isie, khandi khulwa abandu ba Yuda boosi amakhuwa keshitabu shino shiechesinjia. OMWAMI Nyasaye ali neliruma likhongo khwifwe shichila abakuuka befwe shibakhola akeshitabu shino shiboolanga mbu okhuula kakholwe tawe.”

¹⁴Kho omwisaaliisi Hilikia, Ahikamu, Akibori, Shafani, nende Asayia nibatsia okhureeba okhurula khumulakusi weshikhasi owalangwa mbu, Hulida owamenyanga mulukongo lwakhabili lwa Yerusalemu. Hulida tsana oyo yali omukhasi wa Shalumu, omusiani wa Tikiwa, omwitsukhulu wa Harihasi owali omusinjilili wetsingubo tsiomuhekalu. Bamwinoosilia akali nikekholeeshe.

¹⁵Naye nababoolela mbu bakalushe khumuruchi mana bamuboolele

¹⁶oburume buno okhurula khu OMWAMI Nyasaye mbu, Nyasaye aboola bari, “Enzia okhuhelesia abandu ba Yerusalemu boosi eshinyasio shinga olwa kahandikwa mushitabu shiomuruchi asoomile.

¹⁷Shichila abandu bano bandoba isie mana nibakholela abanyasaye bandi emisango, ne nibayakula liruma lianje khulwa amakhuwa koosi aka bakhola. Liruma lianje libushile khu Yerusalemu, ne shililasimibwa tawe.

¹⁸Ne mumuboolele kano omuruchi mwene oumurumile mbu isie OMWAMI Nyasaye, Nyasaye wa Isiraeli emboola mbu, iwe warecheresiye amakhuwa kahandikwa mushitabu,

¹⁹mana niwiyama khandi niwituutuyia imbeli wanje, norandula ebifwalobio mushibeela, niwikhuula olwa wahuliile shinga esiomanga okhuhelesia Yerusalemu nende abandu balio eshinyasio. Nelikhole okhuba habundu ahokhurisia, aha eliira lialio lilaba liokhulaama eshilaamo shiobubi. Nebutswa embuliile amasaayoko.

²⁰Khulweshio, eshinyasio shienzia okhureera khu Yerusalemu shinashiitse ta, okhuula olwa nobe nomalile okhufwa, ndalakhulekha iwe okhufwa mumulembe.” Mana abarume abo nibakalukha nibaboolela omuruchi Yosia amakhuwa ako.