Read wanga 2 ABARUCHI 23 Bible Online

2 ABARUCHI 23 - wanga bible

2 ABARUCHI 23

¹Mana omuruchi Yosia nalanga abemilisi ba Yuda nende aba Yerusalemu,

²ne boosi halala nibatsia muhekalu nibali nabesaaliisi nende abalakusi nende abandu boosi, abamanani kata abayinda. Mana omuruchi nabasoomela boosi eshitabu eshia indakano shiosi eshia bali nibanyoolile muhekalu.

³Omuruchi yasinjila hasiilo yoburuchi mana nakhola obuyiakha indakano nende OMWAMI Nyasaye, khulwa okhumuhulila nende okhulinda amalakoke nende amalachilisioke nomwoyokwe kwosi namaakanike koosi, nende okhukhola amakhuwa koosi akeindakano akahandikwa mushitabu eshio. Mana abandu boosi nibafuchilila okhulinda indakano eyo.

⁴Mana Yosia nalachilisia omwisaaliisi omukhulundu Hilikia nende abesaaliisibe abamukhonyelelanga, nende abalindi boosi abali abalindi inyanga eyo khumuliango kwomuhekalu, okhurusia muhekalu ebimanulwa biosi ebiekhonyelungwa khulwa okhwinamila omunyasaye Baali, nende ebiomunyasaye weshikhasi Ashera, nende ebietsing'ining'ini. Omuruchi nasambila ebimanulwa ebio biosi elwanyi welitookho lia Yerusalemu ahambi nende libanda lia Kidironi, ne likoshe liabio nilibukulwa niliyilwa Betseli.

⁵Yaleshesia obwisaaliisi abesaaliisi babaruchi ba Yuda bali nibaahula okhumalanga emisango khubimalilo biemisango ebiabanyasaye bandi; khandi nabarusia mumatookho ka Yuda nende mutsimbeka tsia Yerusalemu. Khandi naleshesia obwisaaliisi abo boosi abahananga emisango khumunyasaye Baali, khuliuba, khumwesi nende khubilonje biosi ebiomwikulu.

⁶Yarusia muhekalu isiilo yomunyasaye weshikhasi Ashera, nachirusia elwanyi welitookho nachiyila mwibanda lia Kidironi; mana nachisamba khandi nachitubula niyikwa olufu, mana nasalasia olufu tsana khubilindwa ebiabandu abalali abaruchi ta.

⁷Nakwisia tsinzu tsiali muhekalu etsiabatamba bali nibamenyamwo. (Nimwo omwa abakhasi benabilanga ebifwalo ebiekhonyelungwa mukhwinamila omunyasaye weshikhasi Ashera).

⁸Yachelesia Yerusalemu abesaaliisi boosi abali mumatookho ka Yuda nende abali mwihanga liosi, mana nalikulula ebimalilo biemisango bia bakholelangakhwo emisango chiabwe. Khandi nalikulula ebimalilo biemisango ebiali mubwinjililo bweshilibwa shia Yoshwa, owali omukafuna welitookho, eshili elubeka lwomukhono mukhasi niwinjilanga mwitookho.

⁹Abesaaliisi abo shibafuchililwa okhukhalabana muhekalu ta, habula bafuchililwa okhulia omukaate okubulamwo limela halala nabesaaliisi bashiabwe.

¹⁰Omuruchi Yosia khandi yonoonia Tofetsi habundu ha abamahanga benamilanga abanyasaye babwe mwibanda lia Hinomu, kho mbu omundu yesi akhaywe okhuhaana omwanawe omusiani noho omukhaana okhuba omusango omusambe khumunyasaye Moleki.

¹¹Khandi yarusiaho tsifarasi tsiabaruchi ba Yuda bali nibaahula okhwinamila eliuba, ne nasamba amakaari kekhonyelungwa mubwinamili bweliuba obwo. (Bino biali nibiabiikhwa mulwanyi lweihekalu, ahambi nende eshilibwa, ne shibiali ehale okhurula aha omukhongo Natsani Meliki yali niyamenya tawe).

¹²Omuruchi Yosia yakwisia ebimalilo biemisango biabaruchi ba Yuda bali nibombakha khushilama shieinzu yoburuchi ikulu weshikoro shiomuruchi Ahazi, shiasambulwa, halala nende ebimalilo biemisango biomuruchi Manase yali niyombakha mutsinyanyi tsibili tsie Ihekalu. Yatonya ebimalilo biemisango ebio mubitonye mana nabisukuna mwibanda lia Kidironi.

¹³Omuruchi Yosia yonoonia khandi ebimalilo biemisango ebiomuruchi Solomoni yali niyombakha ebukwe welitookho lia Yerusalemu, emulambo weshikulu shiemiseituni ebiekhonyelungwa khulwa okhwinamila abanyasaye beshisinyo ba Abasidoni, nibo Asitarite omunyasaye weshikhasi wa Sidoni, Chemoshi omunyasaye wa Moabu, nende omunyasaye wa Amoni.

¹⁴Omuruchi Yosia yafunaka tsisiilo tsiamachina mubitonye, nasiuula eshifwanani shiomunyasaye weshikhasi Ashera; ne habundu tsana aha biali nibiasinjisibwa niyetsusiaho amakumba kabandu.

¹⁵Yosia khandi yalikulula habundu hokhwinamila ahali Betseli aha omuruchi Yeroboamu omusiani wa Nebati, owemilila Abaisiraeli okhukhola obwonooni yombakha. Yosia yalikulula eshimalilo shiemisango, niyaraka amachina kashio mubitonye, ne nakatubula nikakwa olufu. Khandi yasamba eshifwanani shiomunyasaye weshikhasi Ashera.

¹⁶Mana omuruchi Yosia nahenga, ne olwa yalola ebilindwa ebiali khushikulu nalaka mbu, amakumba karusibwemwo kasambilwe khushimalilo shiemisango. Kho mbu bonoonie eshimalilo shiemisango eshio, nakhola akomulakusi yali niyarumbula khale munyanga tsielisabo, lwomuruchi Yeroboamu yali nasinjiile ahambi neshimalilo shiemisango eshio. Omuruchi Yosia khandi nahenga, ne nalola eshilindwa shiomulakusi tsana owali niyarumbula amakhuwa kano.

¹⁷Mana nareeba ari, “Eshilindwa eshio neshia wina?” Abandu ba Betseli nibamuboolela bari, “Nishio eshilindwa shiomulakusi owarula Yuda ne narumbula amakhuwa kokholile khushimalilo shiemisango shino.”

¹⁸Omuruchi Yosia nalaka ari, “Leshe shibe, amakumbake shikalarusibwamwo tawe.” Kho amakumbake shikarusibwamwo ta, kata akomulakusi wetsa okhurula Samaria shikarusibwa tawe.

¹⁹Omuruchi Yosia yalikulula buli habundu mwitookho lia Isiraeli, aha abamahanga benamilanga abanyasaye babwe, aha abaruchi ba Isiraeli bali nibombakha, ne khulwa okhukhola bario nibabuusia liruma lia OMWAMI Nyasaye. Yakhola khubimalilo biemisango ebio aka yali niyakhola khubiali Betseli.

²⁰Yosia yasinzila abesaaliisi boosi abamahanga khubimalilo biemisango bia bamalilangakhwo emisango, mana nasambila amakumba kabandu khu buli eshimalilo shiemisango. Mana nakalukha Yerusalemu.

²¹Mana omuruchi Yosia nalachilisia abandu boosi ari, “Mukhole lisabo lia Pasaka khulwa okhuhelesia OMWAMI Nyasaye wenywe oluyali shinga olwa kahandikwa mushitabu shieindakano eshio.”

²²Lisabo lia Pasaka shiliali niliakholwakhwo nabaruchi ba Isiraeli kata aba Yuda okhurula mutsinyanga etsia Abayaasi bemililanga Isiraeli tawe.

²³Nebutswa mumuyika kwekhumi namunane okwomuburuchi bwa Yosia, lisabo lia Pasaka liakholelwa OMWAMI Nyasaye mu Yerusalemu.

²⁴Khulwa okhutinyilisia amalako akahandikwa mushitabu shiomwisaaliisi omukhulundu Hilikia yanyoola muhekalu, omuruchi Yosia yarusia mu Yerusalemu nende mu Yuda abebitsohelo boosi, nende abafumu, nende abanyasaye bomutsinzu, ebifwanani nende ebindu biosi ebiekhoonyelungwa nabamahanga khulwa okhwinamila abanyasaye babwe.

²⁵Shiyalikhwoho omuruchi undi shinga ye khubamuranjilila owakhalabanila OMWAMI Nyasaye nomwoyokwe kwosi namakanike koosi, nalondanga amalako ka Musa koosi, kata khu abaruka olunyumalwe tawe.

²⁶Nebutswa liruma lia OMWAMI Nyasaye lilulu liali niliabuushila khu Yuda khulwa ebikhole ebibi ebia omuruchi Manase yali niyakhola. Kho kata olunyuma lwa ako koosi shiliarulaho tawe.

²⁷Mana OMWAMI Nyasaye naboola ari, “Ndalaloonda abandu ba Yuda okhurula imbeli wanje shinga olwa ndaloonda Isiraeli. Khandi ndalaloba litookho lia Yerusalemu elia ndali nindaahula, nende Ihekalu yino eya ndali nindaboola mbu niyo eya ekhoyile okhwinamilwamwo.”

²⁸Amakhuwa kandi koosi akomuruchi Yosia yakhola kahandikwa mushitabu eshiamakhuwa kakhale kabaruchi ba Yuda.

²⁹Olwa Yosia yali nali omuruchi, Neko omuruchi wa Misiri yemilila abelihebe nibatsia khumwalo kwa Yufurate khulwa okhukhoonya omuruchi wa Asiria. Omuruchi Yosia yarula natsia okhulwana ninaye, nebutswa omuruchi Neko yamufimira namwirira Mekido.

³⁰Abakhongo ba Yosia babukula omubilikwe nibakura mwikaari, mana nibakuyila Yerusalemu, ewa bamuyabila mubilindwa biabaruchi. Mana abandu ba Yuda nibaahula omusianiwe mbu Yoahazi, nakalukha mushilenjeshie okhuba omuruchi.

³¹Yoahazi yali nemiyika amakhumi kabili nachitaru olwa yemekhwa okhuba omuruchi wa Yuda, mana naruka mu Yerusalemu khulwemiesi chitaru. Nyinamwana yalangwa mbu Hamutali omukhaana wa Yeremia owokhurula mwitookho lia Libuna.

³²Yesi yakhola obwonooni imbeli ewa OMWAMI Nyasaye shinga butswa abakuukabe bali nibakhola.

³³Oburuchibwe bwakama lwomuruchi Neko wa Misiri yamuyila nali omubohe mushialo shia Ribula mulukongo lwa Hamatsi, khandi nakhola abandu ba Yuda okhumurunga omurungo kwifetsa tsikilo ebikhumila bitaru nebikhumi bine (3,400) nende itsahabu tsikilo amakhumi kataru natsine.

³⁴Omuruchi Neko yemekha omusiani wa Yosia mbu Eliakimu okhuba omuruchi wa Yuda okhukalukha mushilenje shia samwana. Mana nakalukhasia eliiralie namukulikha mbu Yehoyakimu. Omuruchi Neko yayila Yoahazi Misiri, mana Yoahazi nafwilayo.

³⁵Omuruchi Yehoyakimu yasolola obushuru okhurula khubandu okhulondana nemiandu chiabwe khulwa okhusolola eshichelo shiobushuru bwokhurunga omurungo kwomuruchi wa Misiri yali niyenyile.

³⁶Yehoyakimu yali nali nemiyika amakhumi kabili nachirano olwa yemekhwa okhuba omuruchi wa Yuda, ne naruka mu Yerusalemu khulwemiyika ekhumi nende mulala. Nyinamwana yalangwa mbu Zebida omukhaana wa Pedayia wokhurula mwitaala lia Ruma.

³⁷Yakhola obwonooni imbeli ewa OMWAMI Nyasaye shinga olwa abakuukabe bakhola.