Read wanga 2 ABARUCHI 25 Bible Online

2 ABARUCHI 25 - wanga bible

2 ABARUCHI 25

¹Omuruchi Zedekia yakholela omuruchi Nebukadineza wa Babuloni induli, mana Nebukadineza niyetsa nabelihebe boosi mana naseera Yerusalemu khunyanga yekhumi eyomwesi kwekhumi mumuyika kwashienda kwomuburuchi bwa Zedekia. Mana nibakhupa ikambi elwanyi welitookho lia Yerusalemu, mana nibabotokhana amasiisi kalio.

²Nibabotokhana litookho elo okhuula khumuyika kwekhumi namulala kwoburuchi bwa Zedekia.

³Khunyanga yashienda yomwesi kwakhane mumuyika tsana okwo, olwa inzala ikhongo yaluma abandu, mana nibabula eshiokhulia,

⁴amasiisi kelitookho elo kakwisibwa. Kata Abababuloni olwa bali nibabotokhaane litookho elo, abelihe ba Yuda boosi belukha mushilo. Belushila khunjila yomukunda kwomuruchi, nibabirira mushilibwa eshili hakari wamasiisi kabili, mana nibelushila elubeka lwelibanda lia Yorodani.

⁵Abelihe ba Babuloni balondachila omuruchi Zedekia, ne nibamutiilila khumihololokhwe ahambi nende Yeriko, abelihebe boosi belukha nibamulekha.

⁶Mana Zedekia nayilwa imbeli womuruchi Nebukadineza owali nali mwitookho lia Ribula. Nebukadineza namukhalachila eshiina.

⁷Mana nibeera abasiani ba Zedekia nalolanga. Mana nibatsomola tsimoni tsia Zedekia nibamuboha neminyololo chiemikasa ne nibamuyila Babuloni.

⁸Khunyanga yomusafu yomwesi kwakharano mumuyika kwekhumi nashienda kwomuburuchi bwa Nebukadineza, Nebuzaradani omuchetsiyi womuruchi khandi omukhongo welihelie yenjila mu Yerusalemu.

⁹Mana nasamba Ihekalu, inzu yomuruchi, tsinzu tsindi tsiabandu boluyali boosi mu Yerusalemu,

¹⁰nabo abelihebe nibakwisia amasiisi kelitookho.

¹¹Mana Nebuzaradani nayila Babuloni abandu boosi abali nibatoonyile mwitookho; nende abasaatsa abali abalonji, nende abo abali nibelushiile Babuloni.

¹²Habula yalekha inyuma mu Yuda abo abali abamanani beshialo eshio khulwa okhukhola emilimo mumikunda chiemitsabibu nende okhuchilima.

¹³Abababuloni bafunaka tsisiilo tsiemikasa, nende amakaari akali Muhekalu halala nende amatanji komukasa, mana nibayila omukasa kwosi Babuloni.

¹⁴Khandi babukula tsinyungu, namahana kokhusimilia omulilo, nebichiko nende ebimanulwa biosi ebiomukasa ebiekhonyelungwa mubukhalabani bwomuhekalu.

¹⁵Mana omwimilisi wabalindi bomuruchi yabukula ebikaye biomulilo nende ebikaye nende buli shiashindu eshiakaasibwa okhurula khutsahabu inzeleleshe kata ifetsa.

¹⁶Ebindu ebiakasibwa khumukasa ebiomuruchi Solomoni yali niyakaasia khulwa Ihekalu, shinga tsisiilo tsibili, amakaari, nende amatanji biali ebisiro ebilanyala okhuchelwa tawe.

¹⁷Tsisiilo etsio tsiosi tsiafwanana, ne buli isiilo yali eyihela tsimita munane okhutsia ikulu, ne khwikulu khwayo yalikhwo ikofia yomukasa eyihela imita ndala netsisentimita amakhumi kataru. Okhubotokhana khukofia eyo yosi yali niyahomelwakhwo omukasa khandi niyasiaywakhwo namakomamanga akakaasibwa okhurula khumukasa.

¹⁸Okhumeetakhwo Nebuzaradani omukhongo welihe yabukula Sereya omwisaaliisi omukhulundu, Zefania omulondiwe, nende abakhongo bandi bataru bomuhekalu nabayila mubuhambe.

¹⁹Ne okhurula mwitookho yabukula omukhongo owali niyemililenje abelihe, abachetsiyi bomuruchi barano abali nibatoong'ile mwitookho, omuloondi womukhongo welihe, owasinjililanga amahandiko nende abakhongo bandi amakhumi kasasaba.

²⁰Nebuzaradani yababukula nabayila khumuruchi wa Babuloni owali nali mwitookho lia Ribula, mulukongo lwa Hamatsi.

²¹Ebweneyo omuruchi yalaka mbu beerwe. Kho abandu ba Yuda nibayilwa mubuhambe okhurula mushialo shiabwe.

²²Mana omuruchi Nebukadineza wa Babuloni niyaahula Gedalia omusiani wa Ahikamu omwitsukhulu wa Shafani okhuba omukafuna wabandu bali nibatong'a Yuda.

²³Ne olwa abakhongo aba abelihe ba Yuda nende abelihe bandi abalali nibehaanile mumakhono ka Abababuloni ta, bahulila mbu Gedalia akholilwe omukafuna wa Yuda, batsia nibeyunga halala ninaye Mizipa. Abakhongo batsana bali Ishimaeli omusiani wa Netsania, Yohanani omusiani wa Karea, Sereya omusiani wa Tanihumetsi okhurula mwitaala lia Netofa, nende Yezania okhurula Maaka.

²⁴Mana Gedalia nababoolela ari, “Emusuubisia mbu, mularie abakhongo ba Babuloni tawe. Menye mushialo shino, nimukhalabanila omuruchi wa Babuloni, ne amakhuwa koosi kalaba amalayi khwinywe.”

²⁵Nebutswa mumwesi kwamusafu mumuyika okwo, Ishimaeli omusiani wa Netsania omwitsukhulu wa Elishama, owali owomunzu yoburuchi, yatsia Mizipa nali nabandu ekhumi, mana naseera Gedalia ne namwira. Khandi niyeera Abaisiraeli nende Abababuloni bali nibali nende Gedalia.

²⁶Mana Abaisiraeli boosi, abamanani nabayinda halala nende abakhongo belihe barula nibatsia Misiri, shichila bali nibarire Abababuloni.

²⁷Ne mumuyika kwa Ewili-Merodaki yemekhwa okhuba omuruchi wa Babuloni, yakholela omuruchi Yehoyakini wa Yuda aketsimbabasi khulwa okhumulekhuula okhurula mumbohe. Kano kekholekha khunyanga yamakhumi kabili namusafu yomumwesi kwekhumi nakhabili okwa mumuyika kwa amakhumi kataru namusafu olunyuma olwa Yehoyakini omuruchi wa Yuda okhuyilwa mubuhambe.

²⁸Kho omuruchi Ewili-Merodaki yakholela Yehoyakini amakhuwa amalayi, mana khandi namwemekha khushifumbi shioluyali okhushila ebifumbi biosi bia abaruchi bandi boosi aba yali ninabo mubuhambe Babuloni.

²⁹Mana Yehoyakini nafwalula ebifwalobie biomumbohe, mana nafuchililwa okhulitsanga ebiokhulia halala nende omuruchi munyanga etsiobulamubwe bwosi.

³⁰Khu oluhoono lwa Yehoyakini yaliho mwoyo, yahebungwa amapesa buli nyanga akokhukula shiosi eshia yenya.