Read wanga 2 ABARUCHI 3 Bible Online

2 ABARUCHI 3 - wanga bible

2 ABARUCHI 3

¹Mumuyika kwekhumi namunane kwomuburuchi bwa Yehoshafati omuruchi wa Yuda, Yehoramu omusiani wa Ahabu yachaaka okhuruka Isiraeli, ne naruka Samaria khulwemiyika ekhumi nachibili.

²Yonoonela OMWAMI Nyasaye, nebutswa obwonoonibwe shibwali obubi shinga obwa Ahabu, samwana nende Yezebeli, nyinamwana bakhola tawe. Yakwisia hasi lichina lia samwana yali niyakaasia khulwa okhwinamila omunyasaye Baali.

³Nebutswa shinga butswa Yeroboamu, omusiani wa Nebati owamuranjilila, yesi khandi yemilila Abaisiraeli okhukhola obwonooni, ne shiyabakhola okhulekha okhwonoona tawe.

⁴Omuruchi Mesha owarukanga Moabu yali niyaruka amakondi, ne buli khumuyika yarunganga khumuruchi ebimeeme ebikhumila eshikhumi shilala (100,000) nende obwoya bwokhurula khumakondi ebikhumila eshikhumi (100,000).

⁵Nebutswa olwomuruchi Ahabu wa Isiraeli yafwa, omuruchi Mesha wa Moabu yakholela lihanga lia Isiraeli induli.

⁶Kho bwangu omuruchi Yoramu narula Samaria, ne nakhung'asia abelihebe halala.

⁷Khandi narumila omuruchi Yehoshafati wa Yuda likhuwa naboola ari, “Omuruchi wa Moabu ukholeele induli. Kho olanyunga omukhono khutsie khumuseere noho?” Naye omuruchi Yehoshafati nakalusia ari, “Khulatsia ninawe okhumuseera. Isie endi butswa shinga lwoli, abandu banje bali shinga abobo, khandi tsifarasi tsianje tsili shinga etsitsio.

⁸Ne khulaloonda khunjila shiina nikhutsia okhumuseera?” Mana omuruchi Yoramu namukalusia ari, “Khulaloonda khunjila yomushitsiimi shia Edomu.”

⁹Kho omuruchi Yoramu, nende abaruchi ba Yuda nende Edomu nibarula nibatsia okhulwana lihe. Ne olunyuma lwokhuchenda khulwa tsinyanga musafu, amaatsi kabwe kokhunywa kahwa khandi tsifarasi tsiabwe tsiosi nitsibula eshia tsinywa.

¹⁰Mana omuruchi Yoramu naboola ari, “Nishiina shino? OMWAMI Nyasaye akhulanjile ifwe abaruchi bataru okhwitsa kho akhuhaane mumakhono ka Abamoabu?”

¹¹Nebutswa Yehoshafati yareeba ari, “Omulakusi alikhwo hano, owakhunyala okhureeba OMWAMI Nyasaye okhubirila muye?” Mana mulala khubakhongo belihe ba Yoramu namukalusia ari, “Elisha omusiani wa Shafati ali hano. Yali omulondi wa Eliya.”

¹²Kho Yehoshafati naboola ari, “Oyo nomulakusi watoto.” Kho abaruchi bataru abo nibatsia khu Elisha.

¹³Naye Elisha nareeba omuruchi wa Isisraeli ari, “Eshichila ekhukhoonye nishiina? Tsia oreebe abalakusi bapapawo nende abalakusi bamamawo.” Nebutswa Yoramu omuruchi wa Isisraeli namukalusia ari, “OMWAMI Nyasaye niye oukhulanjile halala hano ifwe abaruchi bataru khulwa okhukhuhaana mumakhono komuruchi wa Moabu.”

¹⁴Naye Elisha nakalusia ari, “Nditsuba muliira elia OMWAMI Nyasaye, ouliho mwoyo, owekhalabanilanga mbu, nimba mbu shiehelesinjia omuruchi Yehoshafati wa Yuda oluyali ta, shindakhakhuhenjile iwe kata okhuhulila amakhuwako tawe.

¹⁵Nebutswa bulano mundeerere hano omukhupi wobukhana.” Ne lwomukhupi wobukhana oyo yakhupa litungulie, roho owa OMWAMI Nyasaye niyenjila mu Elisha,

¹⁶ne naboola ari, “Kano niko aka OMWAMI Nyasaye aboola ari, ‘Muyabe emitaro mwibanda eliumu lino.

¹⁷Ne kata nimulalola ifula kata omuyeka ta, libanda lino liletsulamwo amaatsi, ne inywe nende tsing'ombe tsienywe, nende emiruko chienywe chiosi, mulanyoola amaatsi amanji akokhunywa.’ ”

¹⁸Elisha natsiililila okhubaboolela ari, “Ne lino nelikhuwa eliangu khu OMWAMI Nyasaye okhukhola, alamunyalila okhuhula abasuku benywe Abamoabu.

¹⁹Mulalikulula amatookho kabwe, ketsingoba nende amatookho kabwe amakhulundu. Mularema emisaala chiabwe chiebiamo chiosi, mulasiba tsisebele tsiabwe tsiosi tsiamaatsi, khandi mulasasia emikunda chiabwe emilayi khulwa okhwitsusiamwo amachina.”

²⁰Inyanga yaloondakhwo mumabwibwi, ahambi khubise biabakholelangakhwo omusango kwa buli khase mumabwibwi, amaatsi kakholomokha okhurula Edomu nikayemba khwiloba.

²¹Ne olwa Abamoabu bahulila mbu abaruchi bataru abo betsile okhubaseera, abandu boosi, ababuukha nende abakofu, boosi abali nibanyala okhwimanula khulwa lihe bakhung'ana halala nibasinjila khulwakho.

²²Olwa babuukha inyanga yaloondakhwo omubasu kwali nikwakhanga khumaatsi, Abamori abali injelekha welibanda elo, balola amaatsi ako nikafwana amakhanyu shinga amatsayi.

²³Mana nibaboola bari, “Amatsayi! Amatsayi! Abaruchi bataru abo bafwana abalwanile mana nibasinzana abeene khubeene! Lekha khutsie khuyaaye ikambi yabwe!”

²⁴Nebutswa olwa boola khukambi ya Abaisiraeli, Abaisiraeli babuukha nibabalwana okhuula olwa belukha. Mana Abaisiraeli nibaseera eshialo shia Abamori nibabasinza.

²⁵Nibasasia amatookho kabwe. Ne olwa babiranga mumikunda emilayi buli mundu yasukunangamwo lichina okhuula olwa emikunda echio chiosi chiafuunikhwa namachina. Khandi nibekalila tsisebele tsiamaatsi tsiosi, nende okhurema emisaala chiebiamo chiosi. Litookho likhongo lia Kiri Heresi nende amachina kalio nilio eliatong'a lionyene, nebutswa abakhuyunji betsimburuusi balibotokhana mana khandi nibaliseera.

²⁶Olwa omuruchi wa Moabu yalola mbu ahulungwa mwihe, yabukula abasaatsa ebikhumi musafu (700) abetsinganga, ne nateema okhubamaala mubelihe liabasuku abo mbu atsie khumuruchi wa Edomu, nebutswa yakhaywa.

²⁷Mana nabukula omwanawe omusiani omwikulanda owali owokhukalukha mushilenjeshie okhuba omuruchi; mana namuhaanila khulukoba lwelitookho shinga omusango omusambe khumunyasaye wa Moabu. Abaisiraeli nibasinyikha muno, kho nibarula mwitookho elo nibakalukha mushialo shiabwe.