Read wanga 2 ABARUCHI 4 Bible Online

2 ABARUCHI 4 - wanga bible

2 ABARUCHI 4

¹Omukhasi omulekhwa owali mulala khubomukanda kwabalakusi yatsia khu Elisha, ne naboola nomwoyo omukhongo ari, “Omwami, omusaatsa wanje wafwa! Ne shinga lwomanyile yali omundu owahelesinjia Nyasaye oluyali, nebutswa omundu wa yali niyeholakhwo amapesa yetsile, ne yenyanga okhubukula abaana banje abasiani babili mbu, babe abasumbabe khulwa okhurunga likofi elo.”

²Ne Elisha namukalusia ari, “Kho wenya ekhukholele shiina? Olikhwo nende shiina munzuwo?” Omukhasi oyo nakalusia ari, “Isie omukhalabaniwo shiendikhwo neshindu shiosi ta, habula orufura rutiiti butswa mukhayungu.”

³Elisha namuboolela ari, “Tsia khubamenyanibo obasabe tsinyungu tsinyinji.

⁴Mana iwe nende abaanabo abasiani mwinjile munzu, ne mwikalaho omuliango. Mana mutsushe orufura orwo mutsinyungu etsio tsiosi, ne buli inyungu eyitsula muchire halubeka.”

⁵Kho omukhasi oyo natsia munzu niyeyikalilamwo nabaanabe. Ne nabukula akhayungu akhalimwo orufura nachaaka okhutsukha orufura orwo mutsinyungu tsiabaanabe bamureerera.

⁶Olwa tsinyungu etsio tsiosi tsiali nitsiitsuule, yaboolela abasianibe ari, “Mundeerere eyindi.” Nabo nibamukalusia bari, “Eyo niyo eyibeele yokhumalilikha.” Mana amafura ako nikakhalikha.

⁷Omukhasi oyo nakalukha okhuboolela omulakusi Elisha; naye Elisha namuboolela ari, “Tsia okusie amafura ako mana orunje likofi elo. Ne olasikala namapesa kolekhoonyela iwe nabaanabo.”

⁸Inyanga yindi Elisha yatsia Shunemu womukhasi undi omuyinda yali niyamenya. Omukhasi oyo namwinjisia munzuye namuhelesia ebiokhulia. Kho buli olwa Elisha yatsitsanga Shulemu yenjilanga munzu eyo okhulia ebiokhulia.

⁹Omukhasi oyo naboolela omusaatsawe ari, “Emanyile mbu omundu witsanga hano buli khase uno nomundu omutakatifu wa Nyasaye.

¹⁰Lekha khumukaasilie eshisika eshitiiti khushilama shieinzu, khuremwo eshitali, imesa, eshifumbi nende itaha, mana ahuluushilenjemwo buli olwa yetsa okhukhucheniha.”

¹¹Inyanga yindi Elisha yakalukha Shulemu, ne natsia munzuye eyo okhuhuluukha.

¹²Mana naboolela Gehazi omukhalabaniwe mbu atsie alaanje omukhasi oyo. Olwa omukhasi oyo yetsa,

¹³Elisha naboolela Gehazi ari, “Reeba omukhaye oyo eshia ndakhamukholela khulwa okhurunga okhukhalabana okhwa akhukhalabaniile khuno. Haundi yakhenya khumureebele likhuwa khumuruchi noho khumukhongo welihe.” Omukhasi oyo nakalusia ari, “Isie endi nende buli shindu hano mubandu banje.”

¹⁴Kho Elisha nareeba Gehazi ari, “Kho nakhumukholele shiina?” Naye Gehazi namukalusia ari, “Toto shialikhwo nomwana yesi ta, ne omusaatsawe nomukofu.”

¹⁵Mana Elisha namuboolela ari, “Mulaanje yetse.” Gehazi nalaanga omukhasi oyo nasinjila hamuliango.

¹⁶Ne Elisha namuboolela ari, “Mubise shinga bino omuyika kwitsanga wakhabe nolelile omwana khumakuluko.” Omukhasi oyo namukalusia ari, “Omwami nochama olambeya tawe, iwe oli omundu wa Nyasaye.”

¹⁷Mana omuyika kwalondakhwo ebise tsana shinga lwomulakusi Elisha yali naboolile, omukhasi oyo yebula omwana omusiani.

¹⁸Omwana oyo nakhula, ne inyanga yindi yatsia wa samwana yali nali mumukunda nabakholibe abachesi.

¹⁹Ne bwangu nalilila samwana naboola ari, “Omurwe kunzuuna! Omurwe kunzuuna!” Naye samwana naboolela omukholiwe ari, “Chinga omwona oyo omuyile wa nyinamwana ali.”

²⁰Omukholi oyo nachinga omuraaka oyo namuyila wa nyinamwana yali. Nyinamwana namulela khumakulu, ne okhuula mushiteere hakari omwana tsana oyo nafwa.

²¹Mana natsia ninaye munzu ya Elisha, namwalisia khushitali, ne niyekala omuliango narulamwo.

²²Mana natsia naboolela omusaatsawe ari, “Nochama rumila hano bwangu mulala khubakholibo nende isishili, enzenya okhutsia bwangu ewa omulakusi Elisha, ndalakalukha bwangu.”

²³Omusaatsawe namureeba ari, “Ne wenya okhutsia okhumulola inyanga yino mbushiina? Shiyili inyanga ya Isabato kata inyanga yelisabo liokhuchaaka khwomwesi ta.” Omukhasi oyo namuboolela ari, “Ako kalakhuhendia omwoyo tawe.”

²⁴Kho omukhasi oyo narechekha isishili eyo, ne naboolela omukholiwe ari, “Ochiilusie tsimbilo, olachifuchilila okhuchenda kalaha khulwanje tawe, okhurusiakhwo nekhuboolela endio.”

²⁵Kho omukhasi oyo nachaaka oluchendo lwokhutsia Karimeli womulakusi Elisha yali. Elisha yamulola niyetsanga nashilikhwo ehale mana naboolela omukhalabaniwe Gehazi ari, “Lola! Omukhasi wa Shunami ngwoyo yetsanga!

²⁶Tsia bwangu omwakaanile omureebe nikali amakhuwa koosi namalayi khuye, khumusaatsawe nende khumwanawe omusiani noho.” Omukhasi oyo naboolela Gehazi mbu, amakhuwa koosi namalayi.

²⁷Nebutswa olwa yoola ewa Elisha yali, yenamia obwenibwe okhuula hasi, ne namutiila khubilenjebie. Gehazi yenya okhumusindikha nebutswa Elisha yamuboolela ari, “Lekha abe! Ali neshibeela eshikhongo. Nebutswa OMWAMI Nyasaye umbisile, ashili okhumboolela eshichila nabeelela tawe.”

²⁸Omukhasi oyo naboolela Elisha ari, “Omwami wanje, ndakhusabakhwo omwana? Shindakhuboolela mbu, shiolangatiakhwo butswa ta?”

²⁹Mana Elisha naboolela Gehazi ari, “Khola bwangu, bukula indabushi yanje mana otsie tsimbilo. Niwakaana nomundu yesi, shiolasinjila okhumushiesia tawe; ne omundu yesi nakhushiesia shiolamukalusia tawe. Habula otsie shilunji khumuraaka oyo mana walisie indabushi yanje khumwana oyo.”

³⁰Omukhasi oyo naboolela Elisha ari, “Nditsuba muliira elia OMWAMI Nyasaye ouliho mwoyo, khandi khulwa iwe mbu shindalakhulekha tawe.” Kho Elisha nasumukha natsia nomukhasi oyo.

³¹Mana Gehazi nabaranjilila, niyalisia indabushi ya Elisha khumwana oyo, ne nalahulilakhwo omwoyo kata eshindu shiosi eshiokhumanyia mbu omwana nomulamu tawe. Mana nakalukha okhwakanila Elisha namuboolela ari, “Omwana shiabushile tawe.”

³²Olwa Elisha yoola niyenjila munzu, yalola omwana nakonile khushitali nafwile.

³³Mana niyekalaho omuliango, ne nasaaya khu OMWAMI Nyasaye.

³⁴Mana nakona khumwana oyo, nara omunwakwe khukwomwana oyo, tsimonitsie khutsiomwana khandi amakhonoke khukomwana oyo. Ne olwa yelaambisia khumwana oyo, ne omubili kwomwana oyo nikuchaaka okhutunduma.

³⁵Elisha nabuukha nachenda chenda munzu eyo, mana khandi nakalukha niyelambisia khumwana oyo; Omwana oyo niyasamula okhuula musafu, ne natimbula tsimonitsie.

³⁶Mana Elisha nalaanga Gehazi namuboolela mbu, alaanje nyinamwana. Olwa nyinamwana yetsa, Elisha yamuboolela ari, “Omwanawo ngwoyo mubukule.”

³⁷Omukhasi oyo nakwa mumakulu ka Elisha niyenamia obwenibwe okhuula hasi, ne nabukula omwanawe natsia.

³⁸Olundi olwa inzala yaliho khushialo shiosi, Elisha yakalukha Giligali. Ne olwa yali niyechesinjia omukanda kwabalakusi, yaboolela omukholiwe okhurenjekha inyungu ikhongo khumayika, khulwa okhuteshela abalakusi abo eshiokhulia.

³⁹Mulala khubo natsia mubulimo okhwaya eliani. Mana nanyoolayo lisebebe liomubulimo, nanokakhwo amahondo kalio niyetsusia munguboye. Ne niyetsa ninako nakatonyamwo ebitonye mana nakatsukha munyungu eyo, nebutswa abulaho owamanya tawe.

⁴⁰Kho nibenulila abandu abo eshiokhulia, nebutswa olwa baliakhwo eshiokhulia eshio baboolela Elisha nomwoyo omukhongo bari, “Iwe omundu wa Nyasaye, eshiokhulia shino shikhwiira!” Ne nibakhaywa okhulia.

⁴¹Elisha nababoolela ari, “Ndeereere obusie.” Nabukula obusie obwo nabura munyungu eyo, ne naboola ari, “Benulile eshiokhulia balie.” Ne eshiokhulia eshio nishilabakhwo eshibi khandi tawe.

⁴²Olundi khandi, omundu yetsa okhurula Baali Shalisha nareerera Elisha emikaate amakhumi kabili, echiali nichiteshilwe okhurula khushayiri yambeli okhucheswa mumuyika okwo, nende ebitere ebibisi bieimele. Mana Elisha naboolela omukholiwe mbu, ahelesie abomukanda kwabalakusi okwo mbu balie.

⁴³Omukholiwe oyo namureeba ari, “Ndakhahelesia endie abandu eshikhumi shilala (100) eshiokhulia shino?” Nebutswa Elisha yamukalusia ari, “Bahelesie balie, shichila OMWAMI Nyasaye aboola ari, ‘Balalia khandi baleshe eshindi.’ ”

⁴⁴Mana omukholi oyo nabahelesia eshiokhulia eshio, ne shinga OMWAMI Nyasaye yali naboolile balia khandi nibalekha ebindi.