Read wanga 2 ABARUCHI 5 Bible Online

2 ABARUCHI 5 - wanga bible

2 ABARUCHI 5

¹Naamani yali omukhongo wabelihe lia Abasiria, khandi yali omundu omukhongo khandi owaheebwa oluyali nomuruchi wa Siria, shichila okhubirila mu Naamani OMWAMI Nyasaye yali niyanyalila Abasiria okhuhula abasuku babwe. Yali omulwani omululu nebutswa yali nobulwale bwobuchele.

²Inyanga yindi Abasiria barula mumikanda nibatsia okhuseera eshialo shia Isiraeli, mana nibahamba omukhaana Omuisiraeli, owamala naba omukholi womukhasi wa Naamani.

³Omukhaana oyo yaboolela omukhasi wa yakholelanga ari, “Omwami wanje yakhatsilekhwo okhulola omulakusi owamenya Samaria, yakhahonile obuchelebwe!”

⁴Mana Naamani natsia naboolela omuruchi aka omukhaana oyo yali naboolile.

⁵Omuruchi oyo naboolela Naamani ari, “Tsia khumuruchi wa Isiraeli omuyilile ibarwa yino.” Kho Naamani nasumukha nabukula ebitonye bieifetsa ebikhumila bitaru (30,000), ebitonye bieitsahabu ebikhumila bisasaba (6,000), nende tsingubo tsindayi ekhumi.

⁶Ne ibarwa ya yayilila omuruchi wa Isiraeli yaboola yiri, “Erumanga omukhalabani wanje Naamani, neibarwa yino. Enzenya mbu omuhonie obulwalebwe bwobuchele.”

⁷Olwa omuruchi wa Isiraeli yasooma ibarwa eyo, yarandula tsingubotsie mushibeela naboola ari, “Omuruchi wa Siria uno yakhaboola arie mbu, isie embonie omusaatsa uno? Ye apaaranga mbu isie endi Nyasaye ouli nobunyali bwokhuhaana obulamu noho kata okhwira? Lolekhwo omuruchi uno shinga olwa ateemanga okhuusolasia!”

⁸Nebutswa olwa Elisha yahulilakhwo akali nikekholeeshe yarumila omuruchi likhuwa namureeba ari, “Oranduule tsingubotsio okhubeela shiina? Rumile omundu oyo, nasi ndalamumanyia mbu omulakusi ali mu Isiraeli.”

⁹Kho Naamani natsia nali namakaarike netsifarasitsie, ne nasinjilila hamuliango kweinzu ya Elisha.

¹⁰Naye Elisha naruma omukhalabaniwe okhutsia okhumuboolela ari, “Tsia wisinje mumwalo kwa Yorodani okhuula musafu, ne omubilikwo kulahona obuchele.”

¹¹Nebutswa Naamani yarulaho nasinyiishe naboola ari, “Isie embarirenje mbu alarula omwene yanzitsile mana yasaayile muliira elia OMWAMI Nyasayewe, mana achele omukhonokwe habundu hatsana halwala, mana yambonie obuchele bwanje!

¹²Kata kario omwalo kwa Abana nende okwa Fabari echili Damasiko shichili emilayi okhushila emialo chindi chiosi echili mu Isiraeli? Ndakhatsiile okhwisinga muchiene echio mana embone!” Mana Naamani nashiukhana narulaho nasinyiishe.

¹³Nebutswa abakhalabani ba Naamani bamutsiila nibamuboolela bari, “Omwami, omulakusi oyo aba nakhubooleele okhukhola likhuwa litinyu wakhalikholile! Kho bulano shiotsia butswa wisinje shinga olwa akhubooleele mana ohone?”

¹⁴Kho Naamani nakholomokha mumwalo kwa Yorodani niyeyinikhamwo okhuula musafu shinga olwa Elisha yali namuboolele, ne namala nahona. Eshikhoba shiomubilikwe nishikalukha habwene nishiba shinga shiomwana omutiiti.

¹⁵Mana Naamani nakalukha nabandube ewa Elisha yali, ne namuboolela ari, “Bulano ndakhamanya mbu omunyasaye undi abulaho nalali Nyasaye wa Isiraeli tawe. Nochama ofuchilile eshihaanwa okhurula khwisie omukhalabaniwo.”

¹⁶Elisha namukalusia ari, “Nditsuba muliira elia OMWAMI Nyasaye ouliho mwoyo, khandi owa ekhalabanilanga mbu shindalafuchilila eshihaanwa shiosi shiosi tawe.” Naamani nateema okhumulunyilisia mbu afuchilile, nebutswa shiyafuchilila tawe.

¹⁷Naamani namuboolela ari, “Noba nolafuchilila eshihaanwa shianje ta, ekhusaaya mbu umbelesie isie omukhalabaniwo, liloba elinyala okhuchingwa nende tsipuri tsibili enzie ninalio ingo, shichila okhurula bulano isie omukhalabaniwo shindalakholelakhwo abanyasaye bandi emisango emisambe kata emisango chindi ta, habula OMWAMI Nyasaye yenyene.

¹⁸Nebutswa Nyasaye yambeele tsimbabasi khulwa likhuwa elala lino mbu; lwomuruchi wanje yenjila muhekalu yomunyasaye Rimoni wa Siria okhumwinamila niyetiilile khumukhono kwanje, nasi siesi nindinamila muhekalu ya Rimoni eyo, OMWAMI Nyasaye yambeele tsimbabasi mwikhuwa lino!”

¹⁹Elisha namuboolela ari, “Tsia nomulembe.” Ne Naamani natsia. Olwa Naamani yali niyakhatsiakhwo oluchendo olwimbichiti,

²⁰Gehazi omukhalabani wa Elisha yeboolela omwene ari, “Omwami wanje aleshile butswa Namani okhutsia nalarunjilekhwo eshindu ta! Yakhafuchiliile okhubukula eshihaanwa eshia Omusiria oyo omureerere. Nditsuba muliira elia OMWAMI Nyasaye ouliho mwoyo mbu, ndalamulondachilila tsimbilo embukulekhwo eshindu okhurula khuye.”

²¹Kho Gehazi nalondachilila Naamani. Olwa Naamani yamulola niyetsanga tsimbilo, yeekha okhurula khwikaarilie okhumwakanila. Mana namureeba ari, “Shina eshibi?”

²²Naye Gehazi namukalusia ari, “Likhuwa libulaho libi ta, habula omwami wanje niye ourumile okhukhuboolela mbu, mubwangu buno, abaraka babili okhurula mumukanda kwabalakusi bakhetsa okhurula mushialo shiebikulu eshia Efuraimu. Kho akhureebanga nochama obahelesiekhwo ebitonye bieifetsa ebikhumila bitaru (3,000) nende tsingubo tsiokhwifwala tsibili.”

²³Mana Naamani namuboolela ari, “Bukula ebitonye bieifetsa ebikhumila bisasaba (6,000).” Namuhachia mbu afuchilile okhubukula, mana nabiboha mumisiko chibili namuhelesia. Khandi nabukula tsingubo tsiokhwifwala tsibili tsindayi nahelesia abakholibe nibaranjilila imbeli wa Gehazi.

²⁴Ne olwa boola khushikulu eshia Elisha yali niyamenyakhwo, Gehazi yaruula hasi emisiko chibili echio, ne nachiyila munzu. Mana naseebula abakholi ba Namani.

²⁵Mana Gehazi natsia niyenjila munzu, nasinjila imbeli wa Elisha. Elisha namureeba ari, “Gehazi, orula heena?” Gehazi namukalusia ari, “Omwami wanje, isie shienzilekhwo habundu tawe.”

²⁶Nebutswa Elisha yamureeba ari, “Opaara mbu, shiembeleho ninawe muroho lwomusaatsa oyo yeshile okhurula khwikaarilie okhukhwakaanila ta? Shino shishili eshise shiokhufuchilila amapesa, netsingubo, nemikunda chiemiseituni, nende echiemitsabibu, namakondi, netsing'ombe, nabakholi abeshisaatsa kata abeshikhasi tawe!

²⁷Ne bulano obuchele bwa Naamani bulakhwitsakhwo, iwe nende abolwibulolwo inziayo.” Kho olwa Gehazi yarula imbeliwe yali owobuchele, mana likhobalie niliba lilafu shinga amachina keifula.