Read wanga 2 ABARUCHI 7 Bible Online

2 ABARUCHI 7 - wanga bible

2 ABARUCHI 7

¹Elisha namukalusia ari, “Rechelesia aka OMWAMI Nyasaye aboola! Mukamba khubise shinga bino, mwitookho lia Samaria lino obusie bweingano obuhela tsikilo amakhumi kabili bulakusibwa eshitonye shilala eshieifetsa, khandi tsikilo tsisasaba tsieishayiri tsilakula eshitonye shilala eshieifetsa.”

²Mana omukhongo welihe oulindanga omuruchi naboolela Elisha ari, “Ako shikanyalikha tawe, kata OMWAMI Nyasaye omwene niyakhasundula imele okhurula mwikulu khushise shilala.” Naye Elisha namukalusia ari, “Olakalola netsimonitsio omwene, nebutswa shiolaliakhwo ebiokhulia ebio tawe!”

³Abasaatsa bandi baliho bane abali nobulwale obwobuchele, abekhalanga hashilibwa shielitookho lia Samaria, mana nibaboolelana abeene khubeene bari, “Shichila shiina khutsiililile okhwikhala hano nikhulindilila okhufwa?

⁴Nikhuba nikhuboola mbu, khutsie khwinjile mwitookho; inzala yilimwo, ne yilakhwira. Ne nikhuba nikhutsiililila okhwikhala hano khandi khulafwa. Kho chenda khutsie mukambi ya Abasiria mana khwihaane khubo. Nibaba nibalakhwira ta, kho khulabaho mwoyo, ne nibaba nibakhwira kho khulafwa.”

⁵Olwa obwile bwola basumukha okhutsia khukambi ya Abasiria, nebutswa olwa boolayo shibanyoolayo omundu yesi tawe.

⁶OMWAMI Nyasaye yali nakholile Abasiria okhuhulila obuyoka shinga bwamakaari kabelihe abanji nibetsanga nende tsifarasi; mana Abasiria abo nibapaara mbu omuruchi wa Isiraeli ukulile abaruchi ba Abahiti nende ba Abamisiri nende abelihe liabwe okhwitsa okhubeera.

⁷Kho Abasiria babuukha khungoloobe, ne nibelukha okhwihonokosia abeene, nibalekha amaheema kabwe, netsifarasi tsiabwe nende tsisishili tsiabwe, kho nibalekha butswa ikambi yabwe yikhaya.

⁸Olwa abasaatsa bane abobuchele abo boola khundulo weikambi, benjila mwiheema nibalia nende okhunywa ebialimwo. Khandi nibabukula ifetsa nende itsahabu, nende tsingubo nibatsia nibabisa. Mana nibakalukha nibenjila mwiheema lindi nibabukula ebindu okhurulamwo nibatsia khandi nibabisa.

⁹Nebutswa bamala nibaboolelana abeene khu beene bari, “Akakhukholanga kano shikali akahabwene tawe! Khuli namakhuwa amalayi, kho shikenya khukebishile abeene tawe. Nikhuba nikhulinda mbu bushie, kho khukaboolekhwo, khulanyoola eshinyasio. Chenda khutsie bwangu khuboolele abakhongo bomuruchi amakhuwa kano!”

¹⁰Kho nibasumukha okhurula khukambi ya Abasiria nibakalukha Samaria, ne nibalanjilisia abalindi bokhubilibwa nibababoolela bari, “Khutsiile khukambi ya Abasiria ne shikhulutsi kata okhuhulilakhwo omundu yesi yesi naboola tawe. Habula tsifarasi nende tsisishili tsiabwe nitsio etsia khulutsi nitsishiboyilwe nende amaheema kabwe nikaleshilwe butswa eshikhaya.”

¹¹Abalindi abo nibalanjilisia amakhuwa ako, nako nikolela abomunzu yomuruchi.

¹²Omuruchi nabuukha mushilo omwo, ne naboolela abakhongobe ari, “Ndalamuboolela aka Abasiria barechekhanga! Bamanyile mbu khuli neinzala, kho baleshile ikambi yabwe okhutsia okhwibisa elwanyi nibapaaranga mbu, ifwe khularula mwitookho okhutsia okhukhaaba ebiokhulia, kho bakhutiile nikhuli mwoyo mana bahambe litookho liefwe.”

¹³Mulala khubalondibe naboola ari, “Abandu bali mwitookho muno bamalile okhusasikha, bali butswa shinga abo abamala okhufwa khale. Kho chende khurume abandu nende tsifarasi tsirano khutsiasikala etsio, kho mana khumanyilisie akekholeeshe.”

¹⁴Kho nibaahula abandu, ne omuruchi nabaruma namakaari kabili nababoolela mbu batsie bamanyilisie eshikholeeshe khubelihe lia Abasiria.

¹⁵Abasaatsa abo nibabalondachila okhuula khumwalo kwa Yorodani, ne khunjila yoosi eya balondakhwo balolakhwo tsingubo nende ebindu bindi ebia Abasiria bali nibafubilenje nibelukha. Kho abasaatsa nibakalukha nibaboolela omuruchi aka bali nibaluutsi.

¹⁶Mana abandu ba Samaria nibatsia bwangu okhuyaaya ikambi ya Abasiria. Ne shinga OMWAMI Nyasaye yali naboolile tsikilo tsitaru tsiobusie obunyushe obweingano tsiakusibwa eshitonye shilala eshieifetsa, khandi tsikilo tsisasaba tsiishayiri tsiakusibwa eshitonye shilala shieifetsa.

¹⁷Bulano omuruchi wa Isiraeli yali nareereho omulindiwe okhulinda eshilibwa shielitookho. Ne abandu bamusenachilaho okhuula nafwa shinga lwomulakusi Elisha yali narumbule lwomuruchi oyo yatsia okhumulola.

¹⁸Elisha yali nabooleele omuruchi ari, “Khushise shinga shino mukamba tsikilo tsitaru tsiobusie obunyushe bweingano tsilakusibwa eshitonye shilala shieifetsa, khandi tsikilo tsisasaba tsiishayiri tsilakusibwa eshitonye shilala shieifetsa mwitookho lia Samaria.”

¹⁹Nebutswa omukhongo oyo yali nabooleele Elisha ari, “Ako shikanyalikha tawe, kata nikakhaba OMWAMI Nyasaye omwene yakhasundula imele okhurula mwikulu khushise shilala!” Naye Elisha yali namukalusiye ari, “Olakalola netsimonitsio omwene, nebutswa shiolaliakhwo ebiokhulia ebio tawe.”

²⁰Ne kekholekha khuye kario, abandu bamusenela hasi mushilibwa shielitookho okhuula nafwa.