Read wanga 1 AKAKHALE 11 Bible Online

1 AKAKHALE 11 - wanga bible

1 AKAKHALE 11

¹Abandu boosi aba Isiraeli batsia khu Daudi nali Heburoni mana nibamuboolela bari, “Khuli omubilikwo omwene khandi amatsayiko.

²Khale, kata olwa Saulo yali nashili omuruchi wefwe, wemilila abandu ba Isiraeli okhutsia mwihe naye OMWAMI Nyasayewo yakhusuubisia iwe mbu wakhemilile abandube khandi wakhabe omuruchi wabwe.”

³Kho abemilisi boosi aba Isiraeli nibetsa khu Omuruchi Daudi nali Heburoni. Daudi nakaasia ninabo indakano imbeli ewa OMWAMI Nyasaye, nibamutsushililakho amafura mana naba omuruchi wa Isiraeli shinga butswa OMWAMI Nyasaye yali niyamusuubisia okhubirira mumulakusi Samweli.

⁴Omuruchi Daudi nende Abaisiraeli boosi nibatsia nibaseera litookho lia Yerusalemu. Mutsinyanga etsio liali niliamanyikha mbu Yebusi nabo Abayebusi abaranjilila okhumenya mushialo eshia bali nibashimenyilemwo.

⁵Abayebusi nibaboolela omuruchi Daudi mbu shialanyala okhwinjila mwitookho elo tawe, nebutswa Daudi yatiila tsingoba tsiabwe tsielitookho elio elia Zayuni mana nililangwa eliira mbu “Litookho lia Daudi.”

⁶Daudi naboola ari, “Omusaatsa oularanjilila okhwira Omuyebusi alaba omukhongo wa abelihe!” Yoabu owa nyina yali mbu Zeruya yemila okhutsia okhuseera mana naba omukhongo wa abelihe.

⁷Litookho elio lialangwa mbu Litookho lia Daudi shichila Daudi yamenya Mulukoba lwalio.

⁸Daudi nakalushila okhumbakha obuyiakha litookho elo, nachachilanga habundu helubeka lwebukwe weshikulu aha liloba liali nilietsusibwa. Naye Yoabu nakalushila okhumbakha obuyiakha tsimbeka tsindi tsiosi tsilitookho.

⁹Mana Daudi naba nende amaani amanji muno shichila OMWAMI Nyasaye omwene mahe yamulindanga.

¹⁰Kano niko ameera kabelihe abalulu ba Daudi. Abelihe bano halala nabandu bandi ba Isiraeli, bamukhoonya okhuba omuruchi, shinga OMWAMI Nyasaye yali niyasuubisia; mana nibakhola lihangalie okhuba eliamaani.

¹¹Owokhuranga yali Yashobeamu owa eshilibwa eshia Hakimoni, yali omwimilisi wa “Abelihe Bataru”.[8] Yalwana niyekhoonyelanga lifumolie abasaatsa ebikhumi bitaru (300) mana nabeera boosi mwihe elala elo.

¹²Omusaatsa owakhabili Mubululu mubataru abo yali Eleazari omusiani wa Dodo oweshilibwa shia Aho.

¹³Yalwana Abafilisiti nibali Pasi Damimu nakhoonyanga Daudi. Yali nali mumukunda kwa Ishayiri inyinji olwa Abaisiraeli bachaaka okhwilukha;

¹⁴kho ye mwene nende abelihebe nibasinjila hakari mumukunda okwo mana nibalwana Abafilisiti. OMWAMI Nyasaye yamunyalila okhuhula okhukhongo lihe elio.

¹⁵Inyanga yindi abelihe bataru abali balala khubelihe abalulu amakhumi kataru, batsia khulwanda ewa Daudi yali namenyanga hambi neimbangatsi ya Adulamu, lwomukanda kwa Abafilisiti nakwo kwali nikukhomile ikambi yabwe Mwibanda lia Abarefahimu.

¹⁶Khubise ebio Daudi yali nali mulukobalwe nakwo omukanda kwa abelihe ba Abafilisiti kwali nikuli Betselehemu

¹⁷Daudi natiilwa nobuloho mana naboola mumwoyokwe ari, “Shiakhuha omundu yambakhwo amaatsi kokhunywa okhurula mwiyabo elili hambi nende eshilibwa eshili Mubetselehemu!”

¹⁸Abelihe abalulu bataru abo nibenjila namaani mukambi ya Abafilisiti, nibatayamwo amaatsi okhurula mwiyabo elo, mana nibakareera khumuruchi Daudi. Nebutswa shiyanyala okhunywa tawe, habula yakasundula elwanyi okhuba omusango khu OMWAMI Nyasaye,

¹⁹naboola ari “Shindakhanywakhwo kano tawe! Kakhaba shinga ounywetsanga amatsayi kabandu bano abareere obulamu bwabwe mubutinyu!” Kho naloba okhunywa amaatsi ako. Bino nibio ebikhole biamaani bia abelihe abalulu abo bataru bakhola.

²⁰Omusiani wabwe Yoabu oulangwa mbu Abishai yali omwimilisi wa abelihe “Amakhumi kataru Abalulu.” Yalwana niyekhoonyelanga lifumolie abandu ebikhumi bitaru (300) mana nabeera ne naba omusikari omululu mwabo “Amakhumi Kataru.”

²¹Yali omululu muno mubandu boosi “Amakhumi Kataru” mana naba omwimilisi wabwe, nebutswa shiyali omululu shinga abalulu “Bataru” balia tawe.

²²Benaya omusiani wa Yehoyada okhurula mushialo shia Kabuzeeli, yali omusikari omululu. Yakhola ebikhole ebinji biamaani, halala nokhwiira Abamoabu babili abalwani bamaani. Yatsia khunyanga yindi eya itsaluchi niyenjila mwitikho, mana niyeera italanyi.

²³Khandi yeera omundu Omumisiri, ouhela oburambi tsimita tsibili nende okhushilaho owali nali nelifumo lirambi. Beneya yamuseera nende indabushi, nanuula Omumisiri oyo lifumo mumukhonokwe mana namwiirira.

²⁴Bino nibio ebikhole bia amaani bia Beneya, owali mulala khubalulu abo “Amakhumi kataru.”

²⁵Yali omululu muno mubandi boosi “Amakhumi Kataru” nebutswa shiyali obululu shinga “Abataru” balia tawe. Daudi namwahula okhuba omulindiwe wa khumubili.

²⁶Abelihe bandi abalulu bamaani bali Asaheli omusiani wabwe Yoabu, Elihanani omusiani wa Dodo okhurula Betselehemu.

²⁷Shamotsi omuharori, Helezi Omupeloni,

²⁸Ira omusiani wa Ikeshi okhurula mushialo shia Tekoa, Abiezari okhurula Anatsotsi,

²⁹Sibekai Omuhushatsi, Ilai Omuhohi,

³⁰Maharai Omunetofa, Heledi omusiani wa Baana Omunetofa,

³¹Itsai omusiani wa Ribai okhurula Gibea mushialo shia Benjamini; Benaya Omupiratsoni,

³²Hurai owemichela chia Gaashi, Abieli Omu Aribatsi,

³³Azimawetsi Omubaharumi, Eliabu Omushaaliboni,

³⁴abasiani ba Hashemu Omugizoni, Yonatsani omusiani wa Shage Omuharari.

³⁵Ahiamu omusiani wa Sakari Omuharari, Elifali omusiani wa Uri,

³⁶Hefa Omumekeratsi, Ahiya Omupeloni,

³⁷Heziro Omukarimeli, Naara omusiani wa Ezibai

³⁸Yoeli omusiani wabwe Natsani Mibahari omusiani wa Hagiri,

³⁹Zeleki Omuamoni, Naharai omuberotsi owachinjilanga Yoabu omusiani owa Zeruya ebimanulwa.

⁴⁰Ira Omuitsiri, Karebu omuitsiri,

⁴¹Uria Omuhiti, Zabadi omusiani wa Ahilai

⁴²Adina omusiani wa Shiza Omurubeni owali omwimilisi wa Abarubeni halala nende Amakhumi kataru abali ninaye;

⁴³Hanani omusiani wa Maaka, Yoshafati Omumitsini.

⁴⁴Uzia Omuashiteratsi, Shama nende Yeyieli abasiani ba Hotsamu Omu Aroeri,

⁴⁵Yediayeli omusiani wa Shimiri, omusiani wabwe yoha Omutizi

⁴⁶Elieli Omuhawi, Yeribai nende Yoshawia abasiani ba Elinaamu, Itsima Omumoabu,

⁴⁷Elieli, Obedi nende Yaasieli aba Mezobai.