Read wanga 1 AKAKHALE 12 Bible Online

1 AKAKHALE 12 - wanga bible

1 AKAKHALE 12

¹Bano nibo abasaatsa abetsa khu Daudi nali Zikilagi, olwa yali neyefisile aleshe okhulolekha imbeli wa Saulo omusiani owa Kishi. Abasaatsa abo bali balala khuba lihe abamukhoonya mwihe.

²Bali nibamanula obuyingo khandi bali nobuchesi obunji bwokhunyala okhulasa tsimbaka noho okhulasa lichina lia imburusi nomukhono musaatsa noho omukhasi. Bali abekho ba Saulo okhurula muluyia lwa Benjamini.

³Abasaatsa abo bali nibemiliilwe nende Ahiezeri nende Yoashi abasiani ba Sheema okhurula Gibea. Abelihe bandi bali Yesieli nende Peleti abasiani ba Azimawetsi, Baraka nende Yehu okhurula mushialo shia Anatsotsi,

⁴Ishimaya okhurula Kibeoni, owali omusikari omululu khandi mulala khubemilisi babelihe Amakhumi Kataru, Yeremia, Yahasieli, Yohanani nende Yosabachi okhurula Kedera,

⁵Elusai, Yerimotsi, Belia, Shemaria nende Shefatia okhurula Harifu;

⁶Elikana, Ishia, Azareli, Yoezeri nende Yoshobeamu oweshilibwa shia Kora,

⁷Yoeli nende Zebadia abasiani ba Yerohamu okhurula Kedori.

⁸Kano niko ameera kabelihe abaluku, abobuchesi obulayi okhurula muluyia lwa Gadi abasanjilana nende abelihe aba Daudi lwa yali nali mulukoba mushitsiimi. Bali nibamanya obulayi okhulwana nebikhumba nende amafumo; bahenganga nokhurisia shinga italanyi khandi balinji abangu okhwilukha shinga eshitsusu shia mushikulu.

⁹Omwimilisi wabwe omukhongo yali Ezeri, kho nabo abandi nibamulondakhwo nibalondokhane bari, Obadia, Eliabu

¹⁰Mishimana, Yeremia,

¹¹Itai, Elieli

¹²Yohanani, Elizabadi

¹³Yeremia nende makibaninai

¹⁴Balala abokhubandu abolwibulo lwa Gadi bali abelihe abakhongo abasinjililanga abandu eshikhumila (1,000), nabo abandi abali abemilisi abatiiti businjililanga abandu abahela eshikhumi (100).

¹⁵Mumwesi kwambeli mumwika mulala olwa Omuchela kwa Yorodani kwali nikwitsule amaatsi nikabiriranga khwikulu, bambukha tsinjinga tsiakwo, nibasalaasinjia abandu abamenyanga mumabanda kebukwe nende Mumbo womuchela okwo.

¹⁶Inyanga yindi omukanda kwabandu abomutsimbia tsia Benjamini nende Yuda barula nibatsia mulukoba wa Daudi yali nali.

¹⁷Daudi natsia okhubaakaanila naboola ari, “Mwinjisibwe nimuba nimwitsanga shinga abetsa bokhukhoonya. Yitse mube ninefu! Nebutswa nimwakhatema okhuukhoba khubasuku banje; kata kario neshili okhuteema okhumusalisia, Nyasaye wa bakuuka befwe alamanya mana alamuhelesia eshinyasio.”

¹⁸Roho wa Nyasaye niyenjila mu Amasai, mulala khubo, owamala olunyuma abe omukhongo wabelihe “Amakhumi kataru” mana nalachilisia obutinyu ari, “Daudi omusiani wa Yese, khuli abandubo! Obe omuhulili halala nende abo abakhukhoonyanga! Nyasaye akhulwanilanga elubekawo.” Mana Daudi yabenjisia, nabakhola okhuba abakhongo aba abelihebe.

¹⁹Balala khubelihe boluyia lwa Manase betsa okhukhoonya Daudi olwa yali narulanga natsitsanga nende Abafilisiti okhulwana omuruchi Saulo. Toto bwene shiyakhoonyakhwo Abafilisiti tawe okhuba abaruchi babwe bali abari abalanyala okhubakhoba khu Saulo owali omwami wuwe wokhuranga tawe; kho nibamukalusia Zikilagi.

²⁰Bano nibo abelihe okhurula muluyia lwa Manase, abarula nibatsia okhukhoonya Daudi olwa yali nakalukhanga. Bali Adina, Yozabadi, Yediayeli, Mikaeli, Yozabadi, Elihu nende Ziletsai. Buli mulala yali omwimilisi womukanda kwabandu eshikhumila (1,000).

²¹Bakhonyelela Daudi okhulwana nende omukanda kwabayaayi shichila bosi bali abelihe abalulu abeitswoni. Olunyuma bali abakhongo babelihe

²²Hambi buli nyanga abandu bandi bemeetanga khubelihe ba Daudi, kho mbu abelihebe benjiha bwangu muno.

²³Olwa Daudi yali nali Heburoni, abelihe abanji abechesibwa okhulwana betsa nibeyunga khu abalihebe, okhumukhoonya abukule oburuchi bwa Saulo, shinga OMWAMI Nyasaye yali niyasuubisia. Obunji bwabwe bwali buri nanwa;

²⁴Okhurula mulwibulo lwa Yuda buli abasaatsa ebikhumila bisasaba nende ebikhumi munane (6,800), abeerechekha okhulwana nibali nende ebikhumba nende amafumo.

²⁵Abomulwibulo lwa Simeoni bali abasaatsa ebikhumila musafu nende eshikhumi (7,100) abechesibwa okhulwana.

²⁶Abomulwibulo lwa Lawi bali abasaatsa ebikhumila bine nende ebikhumi bisasaba (4,600).

²⁷Abalondi ba Yehoyada abolwibulo lwa Haroni bali abasaatsa ebikhumila bitaru nende ebikhumi musafu (3,700).

²⁸Nende Zadoki omulwani omuraaka omululu yali nende abemilisi amakhumi kabili nende babili ababelihe okhurula mubomunzuye.

²⁹Abolwibulo lwa Benjamini bali abasaatsa ebikhumila bitaru (3,000). Abanji khubo balinji abahulili khubeinzu eya Saulo okhuula olwenolwo.

³⁰Abolwibulo lwa Efuraimu bali abasaatsa ebikhumila amakhumi kabili, abalinji abeifuma indayi mubebilibwa biabwe.

³¹Inusu yolwibulo lwa Manase lwomumbo bali abasaatsa ebikhumila ekhumi nende munane (18,000) abahulwa okhutsia okhukhola Daudi abe omuruchi.

³²Abolwibulo lwa Isakari bali abasaatsa ebikhumi bibili (200) halala nende abasaatsa bandi abalinji hasi wabwe. Abemilisi bano bali nibamanya aka Isiraeli ikwanile okhukhola nende ebise ebilayi biokhukholelakhwo.

³³Abolwibulo lwa Zebuluni bali abasaatsa ebikhumila amakhumi karano (50,000) abaholo khandi abasuubilwa aberechekha okhulwana, khandi abamanula ebimanulwa bioluyia lwosi.

³⁴Abolwibulo lwa Nafutali bali abasaatsa abemilisi eshikhumila (1,000) halala nende abasaatsa ebikhumila amakhumi kataru nende musafu (37,000) nibamanula ebikhumba nende amafumo.

³⁵Abomuluyia lwa Dani bali abasaatsa ebikhumila amakhumi kabili namunane nende ebikhumi bisasaba (28,600) abechesibwa okhulwana.

³⁶Aboluyia lwa Asheri bali abasaatsa ebikhumila amakhumi kane (40,000) aberechekha okhulwana

³⁷Tsimbia etsili ebukwe womuchela kwa Yorodani shinga etsia Rubeni, Gadi, nende inusu yolwa Manase olwa ebukwe tsiali nende abasaatsa eshikhumila eshikhumi namakhumi kabili abamanula ebimanulwa bioluyia lwosi.

³⁸Abelihe bano bosi, aberechekha okhulwana lihe, batsia Heburoni nomwoyo kwitswoni okhukhola Daudi okhuba omuruchi wa Isiraeli yosi. Abandu bandi Abaisiraeli batong'a bali mubulala okhusanga mwikhuwa elio.

³⁹Bamenyaho tsinyanga tsitaru nibali nende Daudi balitsanga nende okhunywa ebilibwa bia Abaisiraeli bashiabwe bali nibabateesheele.

⁴⁰Abandu betsa okhurula ehale shinga tsimbia tsiemasaba tsia Isakari, Zebuluni, nende Nafutali nibareeranga ebiokhulia nibichinjilwe khutsisishili, tsingamia, tsipuri nende tsing'ombe; Tsiali nitsichinjile obusie, amakhuyu, nebiyuuyu biatsinzabibu tsinyumu, idivai nende amafura kemisaituni. Bareera khandi amakondi nende tsing'ombe ebia okhusinzwa nende okhulia. Ako koosi kali eshilolelo shiokhumanyisia omwikhoyo okwali mushialo shiosi.