Read wanga 1 AKAKHALE 13 Bible Online

1 AKAKHALE 13 - wanga bible

1 AKAKHALE 13

¹Omuruchi Daudi nasanjilana nende abemilisi boosi aba emikanda ebikhumila (1,000) nende abemikanda ebikhumi (100) echia abelihe.

²Mana Daudi naboolela Abaisiraeli ari, “Nimuba nimufichilila khandi nikhuba okhwenya khwa OMWAMI Nyasaye; chende khurume abarume khubandu beshialo shiefu bandi, nende khubesaaliisi nende Abalawi abali mumataala kabwe, mana khubaboolele betse bekhung'asie halala hano ninafu.

³Mana khutsie ne khubukule Lisanduku lia Indakano ya Nyasaye elia ng'ayilwa olwa Saulo yali nali omuruchi.”

⁴Abandu basangalila likhuwa elo mana nibafichilila okhukhola bario.

⁵Kho omuruchi Daudi nakhung'asia halala abandu ba Isiraeli okhurula mushialo shiosi; okhuchachila khulwakho lwa Misiri oluli emulambo okhuula khubwinjililo bwa Hamatsi elubeka lwemasaba khulwa okhurusia Lisanduku lia Indakano Kiriatsi Yearimu nende okhulireera Yerusalemu.

⁶Daudi nende abelihebe batsia mwitookho lia Baali elili nilio Kiriatsi Yearimu, mushialo shia Yuda okhubukula Lisanduku lia Indakano ya Nyasaye eliali niliahandikwakho eliira elia OMWAMI Nyasaye Owunyala Biosi hekulu webilonje bia tsimbaha[9].

⁷Bayinia okhurula munzu ya Abinadabu Lisanduku lia Indakano ne nibalirechekha khwikaari liyiakha; Uza nende Ahio bemilila likaari elio

⁸naye Daudi nende abandu boosi nibashina namaani kabwe koosi khulwa okhuhelesia Nyasaye oluyali. Bembanga nibakhuba ebindu biobukhana: amatungu, manyanga, ebikhuli nende tsitarumbeta.

⁹Olwa boola habundu ha baseselanga yimele, eya Kidoni yiheyi eyali niyichinjile Lisanduku lia Indakano yesichirala, naye Uza nanyiila omukhonokwe okhutiililila Lisanduku elo.

¹⁰OMWAMI Nyasaye natiilwa bwangu noburuma khu Uza mana namwiira khulwa okhutiila khwisanduku elo. Yafwiila aho imbeli wa Nyasaye,

¹¹nakachila habundu yaho nihakulikhwa eliira mbu Perezi Uza[10] okhurula olwo. Daudi yasinyikha muno shichila OMWAMI Nyasaye yali nahelesiye Uza eshinyasio mwiruma.

¹²Mana Daudi naria muno OMWAMI Nyasaye ne naboola ari, “Ndakhabukula endie Lisanduku lia Indakano ndatsia ninalio bulano?”

¹³Kho Daudi shiyabukula lisanduku elio yatsia ninalio Yerusalemu tawe. Yalilekha munzu yomusaatsa undi mbu Obedi Edomu omwibulwa welitookho lia Gatsi.

¹⁴Lisanduku elio liamenyaho khulwemiesi chitaru mana OMWAMI Nyasaye nahelesia abeinzu ya Obedi Edomu nende biosi ebia yali ninabio ikhabi.