Read wanga 1 AKAKHALE 14 Bible Online

1 AKAKHALE 14 - wanga bible

1 AKAKHALE 14

¹Omuruchi Hiramu weshialo shia Tiro yaruma abarume ewa Daudi nibali nemisaala chiemisiita, nabombashi bamachina nende ababaatsi khulwa okhumbashila Daudi inzu.

²Naye Daudi namanya shinga OMWAMI Nyasaye yali namwahuule abe omuruchi wa Isiraeli khandi yali naralisinjia oburuchibwe khulwa okhubela abandube.

³Daudi nateshia abakhasi abanje nali Yerusalemu khandi niyebula abasiani nende abakhaana.

⁴Bano nibo abaana ba Daudi yebula nali Yerusalemu; Shamua, Shobabu, Natsani, Solomoni

⁵Ibuhari, Elishua, Elipeleti

⁶Noga, Nefegi, Yafia

⁷Elishama, Beeliada nende Elifeleti.

⁸Olwa Abafilisiti bahulilakhwo mbu Daudi atsushiliilwekho amafura okhuba omuruchi khu Isiraeli yosi, barula namaani koosi okhumukhaba, nebutswa Daudi namanya, naye narula okhubaakaanila nabaseera.

⁹Abafilisiti bali bamalile okhukhoma ikambi yabwe mwibanda lia Abarefahimu ne nibachachile okhuyaaya ebindu bia amataala akaliho ahambi.

¹⁰Daudi nareeba OMWAMI Nyasaye ari, “Enzie eseere Abafilisiti? Olaakhola okhuhula?” OMWAMI Nyasaye namukalusia ari, “Tsia oseere! Ndalakhukhola Ohule!”

¹¹Kho Daudi nabaseera nibali Baali Perazimu mana nabahula. Naboola ari, “Nyasaye yanzikhonyele isie okhubira mu abasuku shinga amaatsi ketsuule” kabiranga kho habundu aho alangungwa mbu Baali Perazimu.[11]

¹²Olwa Abafilisiti belukha, balekha ebifwanani biabwe inyuma mana Daudi nalaka mbu bisambwe.

¹³Bwangu bwene Abafilisiti nibakalukha mwibanda mana nibachaaka okhuliyaaya khandi.

¹⁴Daudi nakalukha khandi okhureeba OMWAMI Nyasaye, owamala namukalusia ari, “Shiolabaseera noli hano tawe, nebutswa tsia obotokhane ne wirecheeshe okhubaseera norulililanga elubeka wundi hambi nende emisaala chiemiforisati

¹⁵Olwa ohulila oluyoka lwokhuchenda khumisaala echio ikulu, kho obaseere shichila ndalaba nenjendanga imbeliwo okhuhula abelihe aba Abafilisiti.”

¹⁶Daudi nakhola aka OMWAMI Nyasaye yali nalachilisiye nibashili inyuma okhurula Gibeoni khunjila khwosi okhuula Gezeri.

¹⁷Ifuma yoluyali lwa Daudi niyihulilikha buli habundu naye OMWAMI Nyasaye nakhola buli lihanga okhumuria.