Read wanga 1 AKAKHALE 15 Bible Online

1 AKAKHALE 15 - wanga bible

1 AKAKHALE 15

¹Daudi yombakha tsinzu Mwitookholie tsiomwene okhwikhoonyela. Yakaasia khandi habundu wa lisanduku lia Indakano ya Nyasaye khandi nasinjisia liheema khulwalio.

²Ne naboola ari, “Abalawi bonyene nibo abakhoyele okhuchinga Lisanduku lia Indakano, shichila nibo aba OMWAMI Nyasaye yaahula okhulichinganga nende okhumukhalabanila buli lwosi.”

³Kho Daudi nalanga abandu boosi Abaisiraeli okhukhung'ana halala Yerusalemu khulwa okhureera Lisanduku lia Indakano habundu ha yali nalikaasiliye.

⁴Eshialondakho yalanga abolwibulo lwa Haroni nende olwa Abalawi.

⁵Omundu wetsa okhurula mushiliibwa shia Omulawi woluyia lwa Kohatsi yali Urieli; owali omwimilisi owa abandu ekhumi nende babili (120) abomushilibwashie.

⁶Okhurula mushilibwa shia Merari yali Asayia owali omwimilisi wabandu ebikhumi bibili nende amakhumi kabili (220).

⁷Okhurula mushilibwa eshia Gerishoni yali Yoeli, owali omwimilisi wabandu eshikhumi nende amakhumi kataru (130).

⁸Okhurula mushilibwa shia Elizafani yali Shemayia owali omwimilisi wa abandu ebikhumi bibili (200),

⁹Okhurula mushilibwa shia Heburoni yali Elieli owali omwimilisi wabandu amakhumi munane,

¹⁰okhurula mushilibwa shia Uzieli yali Aminadabu owali omwimilisi wabandu eshikhumi nende ekhumi nababili (112).

¹¹Daudi nalanga abesaaliisi Zadoki, nende Abiatsari nende Abalawi bano; Urieli, Asayia, Yoeli, Shemayia, Elieli nende Aminadabu.

¹²Naboolela Abalawi ari, “Ninywe abemilisi bebilibwa bia Abalawi. Mwisiiye abeene khandi nende Abalawi bashienywe, kho mbu munyale okhureera Lisanduku lia Indakano eya OMWAMI Nyasaye wa Isiraeli habundu aha elikasiliye.

¹³Khulwa okhubela shimwaliho olwokhuranga mwalichinga tawe, OMWAMI Nyasaye yakhuhelesia eshinyasio shichila shikhwamwinamila shinga olwa khukhoyele tawe.”

¹⁴Mana abesaaliisi nende Abalawi nibesiiya abeene khulwa okhuchinga Lisanduku lia Indakano eya OMWAMI Nyasaye wa Isiraeli.

¹⁵Abalawi nibalichinjila khumisaala khumabeka kabwe shinga OMWAMI Nyasaye yali niyalachilisia okhubirira khu Musa.

¹⁶Daudi nalachilisia abemilisi ba Abalawi baahule Abalawi bashiabwe abanji okhwimba tsinyimbo tsiomwikhoyo nende okhukhupa obukhana bwa lileele, litungu nende ebikhuli.

¹⁷Kho nibaahula abalondakhwo bano okhurula mubeshilibwa shiabembi; Hemani omusiani wa Yoeli, Asafu omusiani wa Barekia owali owamushilibwa shiabwe, nende Etsani omusiani wa Kushala okhurula mushilibwa shia Merari.

¹⁸Halala ninabo, abasiani babwe abalondakhwo mubwimilisi bali Zakaria, Yaazieli, Shemiramotsi, Yehieli, Uni, Eliabu, Benayia, maaseyia, Matitsia, Elifelehu, Mikineyia, Obedi Edomu nende Yeyieli, abo bali abalindi bebilibwa.

¹⁹Abembi bano mbu Hemani, Asafu nende Etsani nibo abakhupanga ebikhuli biakaasibwa okhurula khumukasa.

²⁰Zakaria, Yazieli, Shemiramotsi Yeyieli, Uni, Ehabu, Mezea nende Benea nibo abakhupanga amatungu kamayoosi kehekulu.

²¹Nabo Matitsia, Elifelehu Mikunaya, Azazia nende abalindi ba Ihekalu nibo abakhupanga amatungu amayoosi kahasi.

²²Kenania yaahulwa okhuba omwimilisi wabembi shichila yali niyamanya obulayi obwimbi.

²³Barekia nende Elikana nibo abalindanga Lisanduku lia Indakano

²⁴Shebania, Yoshafati, Natsaneli, Amasai, Zekaria, Beneya nende Eleazari omwisaaliisi nibo abakhupanga tsitarumbeta imbeli wa Lisanduku lia Indakano Obedi Edomu nende Yehia khandi boosi baahulwa okhulinda Lisanduku lia Indakano.

²⁵Omuruchi Daudi, abemilisi ba Isiraeli nende abakhongo bemikanda chiabelihe eshikhumila (1,000) batsia okhurusia Lisanduku lia Indakano eya OMWAMI Nyasaye okhurula munzu mwa Obedi Edomu nomwikhoyo omukhongo.

²⁶Bakhola omusango kwa tsisurusi musafu nende amakondi musafu shichila OMWAMI Nyasaye yali nakhoonyile Abalawi abachinganga Lisanduku lia Indakano eya OMWAMI Nyasaye.

²⁷Daudi, abembi, Kenaniya omwimilisi wabwe nende Abalawi abachinganga Lisanduku elia Indakano boosi befwalanga ikanzu yeikitani indorotoro; kandi Daudi yefwala ifoti yeikatani.

²⁸Nolwa Isiraeli yosi yareera Lisanduku lia Indakano Yerusalemu nobuyoka obukhongo bwomwikhoyo nibakhupanga tsinzika, tsitarumbeta, ebikhuli amalele, amatungu nende amachieng'i.

²⁹Shinga Lisanduku lia Indakano elio olwa liali nilireerungwa Mwitookho, omukhaana wa Saulo oweliira mbu Mikali, yayenjelela elwanyi mwitirisha ne nalola omuruchi Daudi nashinanga nasiilasiila nomwikhoyo, mana omukhaana oyo namuchaya mumwoyokwe.