Read wanga 1 AKAKHALE 16 Bible Online

1 AKAKHALE 16 - wanga bible

1 AKAKHALE 16

¹Benjisia Lisanduku lia Indakano mwiheema lia Daudi yali niyombashiile lisanduku elio mana nibalirechekha mukari. Nibahaana emisango nende emisango chiokhureera omulembe khu Nyasaye.

²Daudi niyakhamala okhumala emisango echio, yasabila abandu abo ikhabi muliira elia OMWAMI Nyasaye

³mana nabakabila boosi ebiokhulia. Yakaba buli omusaatsa nende omukhasi ouli Isiraeli omukaate, eshitonye shia inyama isambe nende ikeki yemitsabibu.

⁴Daudi niyaahula balala khu Abalawi okhwimilila bwinamili obwa OMWAMI Nyasaye, Nyasaye wa Isiraeli imbeli we Lisanduku lie Indakano khulwa okhwimbanga tsinyimbo tsiokhwitsoomia OMWAMI Nyasaye.

⁵Asafu niye owaahulwa okhuba omwimilisi nende Zakaria okhuba omulondeleliwe. Yeyieli, Shemiramotsi, Yehieli, Matitsia, Eliabu, Benaya, Obedi Edomu nende Yeyieli okhukhupanga litungu nende lichieng'i. Asafu yali owokhukhupanga ebikhuli

⁶nabo abesaaliisi babili bano Benayia nende Yahazieli abokhupanga tsitarumbeta buli lwosi imbeli wa Lisanduku lia Indakano.

⁷Lwali olwene olwa Daudi yaranjilila okhuhelesia Asafu nende Abalawi bashie omulimo kwokhwimbanga nibetsoomia OMWAMI Nyasaye.

⁸Khupile OMWAMI Nyasaye orio, Murumbule obukhongobwe Muboolele amahanga ebia akholile.

⁹Yimbile OMWAMI Nyasaye nimumwitsoomia, nimurumbula akebikholebie ebiamakana ebia akholile.

¹⁰Musangale mbu khuli abebe. Leshe boosi abamwinamilanga OMWAMI Nyasaye bekhoye!

¹¹Habile OMWAMI Nyasaye khulwa obukhoonyi, nimumwinamila buli lwosi.

¹²Mwitsulile amakhuwa amalayi kaakholile. Ebikhole ebikhongo biakholile, obukhalachi bwa akhalache.

¹³Inywe abolwibulo lwa Isiraeli omukhalabaniwe inywe abolwibulo lwa Yakobo aba omwene yaahula.

¹⁴OMWAMI Nyasaye niye Nyasaye wefwe amalakoke kali khulwa abandu boosi.

¹⁵OMWAMI Nyasaye alalinda indakanoye buli lwosi; nende obusuubisiebwe khutsinzibulo ebikhumila.

¹⁶OMWAMI Nyasaye alindanga indakano ya yakaasia nende Aburahamu nende obusuubisiebwe khu Isaka.

¹⁷OMWAMI Nyasaye yakhola indakano nende Yakobo, niyo eyilabaho inziayo.

¹⁸OMWAMI Nyasaye yaboolela Yakobo ari, “Ndakhuhelesia eshialo shia Kanani nashio shilaba eshishio.”

¹⁹Abandu bali nibashili batiiti khandi abacheni mushialo eshio.

²⁰Bachendachendanga okhurula khwihanga okhutsia khulindi,

²¹OMWAMI Nyasaye shiyafuchililakhwo abandu okhubamina tawe; OMWAMI Nyasaye yabalinda, nasiomela abaruchi ari,

²²“Mulabasalisiekho abakhalabani banje abaahule tawe; mulatiilekhwo khubalakusi banje tawe.”

²³Yimbile OMWAMI Nyasaye, abandu boosi! Rumbule buli lwosi amakhuwa amalayi mbu akhuhonie ifwe.

²⁴Rumbulile amahanga oluyalilwe, ebikholebie biamaani khubandu boosi.

²⁵OMWAMI Nyasaye nomukhongo khandi akhoyele okhwitsoomibwa muno; Akhoyele okhuhesibwa oluyali okhushilakhwo abanyasaye bandi.

²⁶Abanyasaye bamahanga kandi nebifwanani butswa bionyene nebutswa OMWAMI Nyasaye yalonga likulu.

²⁷Oluyali nende obunyali bwamubotokhana, obunyali nende obusangaali bietsula mu Ihekaluye.

²⁸Abandu boosi abali khushialo mumwitsoomie OMWAMI Nyasaye. Mwitsoomie oluyalilwe nende obunyalibwe.

²⁹Mwitsoomie eliira elio OMWAMI Nyasaye elia Oluyali Mureere ebihaanwa khandi mwitse Muhekaluye Mumwinamile OMWAMI Nyasaye olwa alolekha Mubutakatifubwe;

³⁰eshialo shiosi mutechele imbeliwe! Eshialo shiasalisibwa mubwikhalo bwashio ne shishinyala okhusitibwa tawe.

³¹Eshialo nende likulu saangaale! Boolele amahanga mbu OMWAMI Nyasaye niye Omuruchi,

³²Leshe inyanza yihoole nende ebilonje biosi ebilimwo. Leshe emikunda chiikhoye nende biosi ebilimwo!

³³Emimela echili mubitsuru chikhupe tsingalakala imbeli ewa OMWAMI Nyasaye, olwa niyetse okhuruka eshialo.

³⁴Khupile OMWAMI Nyasaye orio, shichila nomulayi; Obuheelibwe nobwa inziayo.

³⁵Boolele OMWAMI Nyasaye muri, “Iwe Nyasaye omuhonia wefwe; khuhonie; khukhung'aasie ifwe halala; okhuhonokosie okhurula mubamahanga, kho mbu khukhuupile orio khandi khwitsoomie eliiralio Litakatifu.”

³⁶Mwitsoomie OMWAMI Nyasaye, Nyasaye wa Isiraeli! Mumwitsoomie bulano okhuula inziayo! Mana abandu boosi nibaboola “Kabe kario,” ne nibamwitsoomia OMWAMI Nyasaye.

³⁷Omuruchi Daudi yara Asafu nende Abalawi bashie okhusinjilila buli lwosi obwinamili bwakholilungwa habundu ha Lisanduku lia Indakano lialinji niliabikhwa. Benyekhanga okhusinjilila emilimo echio buli nyanga.

³⁸Daudi khandi nara Obedi Edomu nende abandi amakhumi kasasaba nende munane (68) abeshilibwashie okhubakhoonyelela. Obedi Edomu omusiani wa Yedutsuni nende Hosa bali abasinjilili bobulindi bwebilibwa.

³⁹Omwisaaliisi Zadoki nende abesaaliisi bashie nibo abasinjililanga obwinamili obwa OMWAMI Nyasaye habundu hokhwinamila mu Gibeoni

⁴⁰Basambanga emisango khushimalilo shiemisango buli mumabwibwi nende khungoloobe okhulondana nende akali nikahandikwa Mumalako aka OMWAMI Nyasaye yahelesia Isiraeli.

⁴¹Hemani nende Yedutsuni bali abalondeleli babwe halala nende abasaatsa bandi abali nibaahulwe okhwimba nibetsoomia OMWAMI Nyasaye khulwa obuheelibwe bweinziayo.

⁴²Hemani nende Yedutsuni khandi bali abasinjilili ba obokhukhupanga tsitarumbeta, ebikhuli nende ebindi biosi ebiopungwa olwa tsinyimbo tsiokhwitsoomia tsiembungwa. Abandu beshilibwa shia Yedutsuni bali abasinjilili bobulindi bwebilibwa.

⁴³Mana buli mundu niyenyokha khandi Daudi niyenyokha okhutsia okhumenyakhwo tsinyanga nende abeinzuye.