Read wanga 1 AKAKHALE 17 Bible Online

1 AKAKHALE 17 - wanga bible

1 AKAKHALE 17

¹Ne olwomuruchi Daudi yali namenyile munzuye yoburuchi, inyanga yindi yaboolela omulakusi Natsani ari, “Lola, isie emenyile munzu yombashilwa emisaala chiemisiita, nalio lisanduku lieindakano eya OMWAMI Nyasaye lili mwiheema.”

²Natsani namukalusia ari, “Tsia okhole koosi aka oparanga, shichila OMWAMI Nyasaye ali ninawe.”

³Nebutswa eshilo eshio, OMWAMI Nyasaye yaboolela Natsani ari,

⁴“Tsia oboolele omukhalabani wanje Daudi mbu isie emboola mbu, ‘Shioli niwe oukhoyile okhunyumbashila inzu ya emenyamwo tawe!

⁵Okhurula khunyanga ya ndahonokosiliakhwo Abaisiraeli okhurula Misiri okhuula olwa leelo, eshili okhumenyakhwo munzu. Buli lwosi emenyanga mumaheema ne kasitibungwa okhurula habundu nikayilwa haundi:

⁶Habundu hosi aha ndatsia nendi nende Abaisiraeli eshili okhurebakhwo omwimilisi yesi owa ndaahula mbu; mbushiina nolanyumbashila inzu yemisaala chiemisiita tawe.’ ”

⁷Khulweshio boolela omukhalabani wanje Daudi ori, “Isie OMWAMI Nyasaye omwene mahe, ndakhurusia mukhwaya amakondi mushikuri nekhukhola okhuba omuruchi wabandu banje ba Isiraeli.

⁸Embetsanga ninawe habundu hosi aha otsitsanga khandi erusinjiaho abasukubo boosi imbeliwo. Ndalakhukhola iwe okhumanyikha muno shinga abemilisi abakhongo muno abokhushialo.

⁹Ndamala okhwahulila abandu banje Abaisiraeli habundu aha bakhamenye nomulembe. Abandu abamayanu shibalibanyasiakhwo shinga olwali lwambeli tawe;

¹⁰khandi bashikholanga okhurula khubise bia ndahulilakhwo abemilisi ba abandu banje Abaisiraeli. Ekhusuubisia mbu ndalahula abasukubo boosi khandi ndalakhukhola okhuba nabetsukhulu abanji.

¹¹Olwa tsinyangatsio tsiakhabe nitsihwele ne nofwa, noyabilwa halala nabakuukabo, ndakhakhole mulala khubasianibo okhuba omuruchi khandi ndakharalisie lihangalio.

¹²Niye oulinyumbashila inzu, nasi ndakharalisie lihangalie ebisoni nebisoni.

¹³Ndakhabe samwana naye yakhabe omwana wanje. Shindakhaleshe okhumukhoonya shinga olwa ndalekha okhukhoonya Saulo tawe; owandarusiaho kho mbu iwe obe omuruchi.

¹⁴Ndakhamukhole okhuba omwimilisi wabandu banje nende owa lihanga lianje inziayo. Nabwo oburuchibwe bwakharalisibwe inziayo.”

¹⁵Natsani naboolela Daudi amakhuwa koosi shinga Nyasaye yali namumanyiyie mwilolelo.

¹⁶Mana omuruchi Daudi niyenjila mwiheema Litakatifu elia OMWAMI Nyasaye niyekhala hasi mana nasaba naboola ari, “E OMWAMI Nyasaye, shiengwanile okhukholelwa aka omalile okhuukholela tawe, kata abeinzu yanje shibakwanile tawe.

¹⁷Kata kario OMWAMI Nyasaye oshitsilililanga okhukhola amanji, osuubisiiye abolwibulo lwanje aka balinyoola mumiyika echitsanga khandi niwe ounindanga shinga omundu omukhongo.

¹⁸OMWAMI Nyasaye kho elindi nelili heena elia ndakhaboola! Okhuba wumanyile obulayi isie omukhalabaniwo; ne kata kario, umbelesinjia isie oluyali omukhalabaniwo.

¹⁹Kali aka okhwenyakhwo mbu kekholeshe kario, okholile amakhuwa amakhongo kano khulwa okhunzechesia.

²⁰Iwe OMWAMI Nyasaye, abulaho Nyasaye wundi nebutswa iwe shinga olwa khwahulila namarwi kefwe.

²¹Libulaho lihanga lindi khushialo shinga elia Isiraeli, lihanga elia wahonokosia omwene okhurula Misiri mubunyakhani khulwa okhubakhola babe abandubo. Amakhuwa amakhongo khandi akokhuhuchisia ka wabakholela kachila eliiralio liamanyikha khushialo shiosi. Wahonokosia abandubo okhurula Misiri khandi norusiamwo amahanga kandi olwa abandubo bali nibenjilanga.

²²Wamala okhukhola Abaisiraeli okhuba abandubo beene inziayo, khandi iwe OMWAMI Nyasaye wikholile Nyasaye wabwe.

²³“Iwe OMWAMI Nyasaye bulano ohesie inziayo aka wasuubisia khwisie nende abolwibulo lwanje mana okhole aka waboola mbu wakhakhole.

²⁴Eliiralio liletsoomibwa buli lwosi, khandi abandu balaboolanga inziayo bari, ‘OMWAMI Nyasaye omwene mahe, niye Nyasaye wa Isiraeli.’ Khandi oliralisia abeinzu yanje buli lwosi.

²⁵OMWAMI Nyasaye Ounyala biosi, Nyasaye wa Isiraeli! Endi neitswoni okhusaba kano khwiwe, shichila ofimbuliile isie omukhalabaniwo kano koosi, khandi niumboolela mbu wakhakhole abetsukhulu banje okhuba abaruchi.

²⁶Ne bulano OMWAMI Nyasaye, niwe Nyasaye, khandi olindanga obusuubisie bwokhuhuchisia buno.

²⁷Ekhusaya ohelesie abetsukhulu banje ikhabi kho mbu batsiliilile okhulola obulayi bubwo. Iwe OMWAMI Nyasaye osuubisiye kano, kho tsikabitsio tsilabetsanga khubetsukhulu banje buli lwosi.”