Read wanga 1 AKAKHALE 18 Bible Online

1 AKAKHALE 18 - wanga bible

1 AKAKHALE 18

¹Olunyumakhwo Daudi yaseera Abafilisiti khandi, ne nabahula mana nibaba hasi woburuchibwe. Daudi nabukula litookho lia Gatsi nende amataala kalio okhurula khu Abafilisiti.

²Nahula khandi Abamoabu mana nibaba abasumbabe khandi nibarunga obushuru khuye.

³Daudi khandi nahula Omuruchi Hadadezeri omusiani wa Rehobu omuruchi wa Siria owa mulukongo lwa Zoba hambi neshialo shia Hamatsi, shichila Hadadezeri yali niyenyanga okhusimikha oburuchibwe Mulukongo luli emukulu womwalo kwa Yufurate.

⁴Daudi yatiila abalwani bekhoonyelanga amakaari ketsifarasi eshikhumila shilala nende ebikhumi musafu (1,700), abokhubilenje bali ebikhumila amakhumi kabili (20,000). Yabukula khandi tsifarasi etsinyala okhuchesia amakaari eshikhumi (100), natsio etsindi tsiosi natsikhalaka ebilenje bieinyuma.

⁵Olwa Abasiria okhurula Damasiko betsa okhukhoonya Hadadezeri, Daudi yabaseera mana niyeera abandu ebikhumila amakhumi kabili nende babili (22,000).

⁶Mana Daudi nasimikha tsikambitsie etsia lihe mulukongo lwa Abasiria ba Damasiko. Abandu abo nibaba hasi woburuchibwe khandi nibarunga obushuru khuye. OMWAMI Nyasaye yanyalilanga Daudi okhuhula buli mwihe.

⁷Mana Daudi nabukula tsingabo etsia itsahabu etsiachingungwa nabakholi ba Hadadezeri natsiyila Yerusalemu.

⁸Nabukula khandi emikasa eminji muno okhurula mumatookho ka Tibatsi nende Kuni akarukungwa nomuruchi Hadadezeri. Olunyuma Solomoni yekhoonyela omukasa kwokhukaasia ebikaye ebikhongo ebilangwa mbu Inyanza, nende khandi okhukaasia tsisiilo nende ebindu bindi ebienyekha Muhekalu.

⁹Olwa Toyi omuruchi wa Hamatsi yahulilakhwo mbu Daudi ahulile abeliheba Hadadezeri boosi,

¹⁰Yaruma Yoramu omusianiwe okhushesia nende okhukhupila Daudi orio khulwa okhuhula Hadadezeri. Toyi yali niyalwana nende Hadadezeri akhandi akhanji. Yoramu yayilila Daudi ebihaanwa bieitsahabu, ebieifetsa nende ebiemikasa.

¹¹Omuruchi Daudi niyaahulila OMWAMI Nyasaye ebihaanwa ebio shinga olwa yali niyaahula ifetsa nende itsahabu ebia yabukula okhurula mumahanga aka yali niyamala okhuhula kano: Edomu, Moabu, Amoni, Filisitia nende Amaleki.

¹²Abishai owali omusiani wa Zeruya yahula aba Edomu Mwibanda lia Omunyu mana niyeera abandu ebikhumila munane (18,000).

¹³Nakhoma tsikambi tsiabelihe mushialo shiosi eshia Edomu mana abandu abomushialo shia nibaba hasi woburuchi bwa Daudi. OMWAMI Nyasaye nanyalila Daudi okhuhula buli hosi aha yatsitsanga.

¹⁴Daudi naruka Isiraeli yosi, nateema buli lwosi okhukholela abandube boosi akahabwene khandi akobulunjishi.

¹⁵Yoabu owa nyina yali Zeruya yali omusinjilili wabelihe. Yehoshafati omusiani wa Ahiludi yali omusinjilili wa obuhandichi.

¹⁶Zadoki omusiani wa Ahitubu nende Ahimeleki omusiani wa Abiatsari bali abesaaliisi, naye Seraya yali omuhandichi womushiina.

¹⁷Benaya omusiani wa Yehoyada yali omusinjilili wa abalindi ba Daudi bokhumubili, nabo abasiani aba Daudi bali abesaaliisi.