Read wanga 1 AKAKHALE 20 Bible Online

1 AKAKHALE 20 - wanga bible

1 AKAKHALE 20

¹Mukhuchaaka khwomwaka omuyia mubise bia abaruchi bali nibanala okhutsia mwihe, Yoabu yemilila abelihe mana naseera eshialo eshia Amoni. Nebutswa omuruchi Daudi yatong'a Yerusalemu. Babotokhana litookho lia Raba mana nibasasia ebindu biosi ebiali mulio.

²Eshifwanani shiomuruchi Mileki wa Abamoni shiali nolusimbi lwitsahabu khumurwe kwashio shiobusiro obuhela tsikilo amakhumi kataru natsine. Shialimwo amachina amang'inang'inu aka Daudi yabukula ne nakara mulusimbilwe omwene. Yabukula khandi ebindu ebinji ebiayaaywa okhurula mwitookho elo.

³Yabukula abandu bomwitookho elo, nabara khumilimo chiemisumeno, tsimbako tsiebibia nende tsihaywa. Yakhola ario khandi khubandu boosi ba amataala kandi aka Amoni. Mana nakalukha nabandube Yerusalemu.

⁴Olunyumakhwo lihe liabukha khandi khu Abafilisiti habundu mbu Gezeri. Lihe liachaaka olwa Sibeki okhurula mushialo shia Husha yeera omundu omukhomefu oulangwa mbu Sipai nabo Abafilisiti nibahulwa.

⁵Lihe lindi khandi lialiho khu Abafilisiti ne Elihanani omusiani wa Yayiri niyeera Lahimi omusiani wabwe Koliatsi okhurula mushialo shia Gatsi, owa lifumolie liali neimbeka yobusiro buli shinga omusaala kwomulushi webifwalo.

⁶Lihe lindi lialiho Gatsi, ewa okundu okukhongo kwaliho okwali netsinzala tsisasaba buli khumukhono khandi etsiebilenje tsisasaba khu buli eshilenje. Okundu okwo kwali okwokhubolwibulo lwa Rafa lwemindu emikhongo chia khale.

⁷Yachayanga Abaisiraeli mana Yonatsani omusiani wa Shama omusiani wabwe Daudi namwiira.

⁸Bataru abo beera Daudi nende abandube beera, bali abolwibulo lwa Rafa abomushialo shia Gatsi.