Read wanga 1 AKAKHALE 21 Bible Online

1 AKAKHALE 21 - wanga bible

1 AKAKHALE 21

¹Setani yenyanga okhureerira abandu ba Isiraeli amatinyu, kho nachila Daudi nalola mbu abale abandu.

²Daudi nalachilisia Yoabu nende abemilisi bandi ari, “Tsie mushialo shiosi eshia Isiraeli, okhuchaachila khundulo okhuula khundulo khundi mana mubale abandu. Ndenyile okhumanya mbu bali baanga.”

³Yoabu nakalusia ari, “OMWAMI Nyasaye akhoya yenjiyia abandu ba Isiraeli okhuula eshikhumi achushila olwa bali bulano! OMWAMI Nyasaye owobunyali, boosi nabakhalabanibo. Eshichila nishiina niwenya okhubabala mana okhole abandu boosi babe neshikha?”

⁴Nebutswa omuruchi nakhola Yoabu okhukhola aka yalachilisia. Yoabu narula natsia nachenda mushialo shia Isiraeli shiosi, mana nakalukha Yerusalemu.

⁵Mana naboolela Omuruchi Daudi obubali bwabasaatsa banyala okhulwana mwihe. Muisiraeli bali abasaatsa eshikhumila shieshikhumila shilala nende shikhumila eshikhumi (1,100,000) ne Muyuda bali ebikhumila ebikhumi bine nende musafu (470,000).

⁶Nebutswa Yoabu shiyabalilamwo aboluyia lwa Lawi nende Benjamini tawe, shichila yaloba okhulonda lilako liomuruchi.

⁷Nyasaye shiyachamisibwa nende akali nikekholeeshe ako tawe, kho nahelesia Isiraeli eshinyasio.

⁸Mana Daudi naboolela Nyasaye ari, “Ndonoonile eshionoono shiamakana olwa ekholile kano! Chama umbeele. Ekholile amakhuwa keshiyingwa.”

⁹Kho OMWAMI Nyasaye naboolela Gadi omulakusi wa Daudi ari,

¹⁰“Tsia oboolele Daudi mbu emuhelesinjia ebindu bitaru okhwahulakhwo eshia akhola. Ndalakhola shiosi eshia yaahula.”

¹¹Kho omulakusi Gadi niyetsa khu Daudi namuboolela ari, “OMWAMI Nyasaye aboola mbu, wahule liosi elia wenya;

¹²Emiyika chitaru echiokhuba inzala; noho emiesi chitaru niwilukhanga okhurula khubelihe ba abasukubo noho tsinyanga tsitaru OMWAMI Nyasaye nakhuseeranga nolukangalwe khandi nakhurumilanga amakhupache khushialoshio niyekhoonyelanga omumalaika okhureera lifwa Muisiraeli mwosi. Bulano yahula elitsiokhukalusia ourumile.”

¹³Daudi nakalusia Gadi ari, “Endi mubunyakhani obutinyu! Nebutswa shindenya abandu okhuuhelesia eshinyasio tawe. Lekha OMWAMI Nyasaye omwene abe ye ouhelesia eshinyasio, shichila nowetsimbabasi.”

¹⁴Kho OMWAMI Nyasaye naruma amakhupache khubandu ba Isiraeli mana nibafwa ebikhumila amakhumi musafu (70,000).

¹⁵Mana OMWAMI Nyasaye naruma omumalaika okhusasia litookho lia Yerusalemu, ne nakalukhasia amapaaroke, naboolela omumalaika oyo ari, “Lekha! Ako kahelile!” Omumalaika oyo yali nasinjiile habundu ha baseselanga yimele ewa Omuyebusi wulangwa mbu Arauna.

¹⁶Daudi nahenga ikulu nalola Omumalaika oyo nasinjiile mumuya hakari, natiilile olukangalwe mumukhono niyerecheeshe okhusasia Yerusalemu. Mana Daudi nende abemilisi ba abandube, nibefwalile boosi amakunia, benama hasi obweni bwabwe nibuula khwiloba.

¹⁷Daudi nalaama naboola ari, “E! Nyasaye, nisie owonoonile. Nisie owalaka mbu abandu babalwe. Nishiina eshiabandu abamanani bano bakholile? OMWAMI Nyasaye wanje, ohelesie isie nende abeinzu yanje eshinyasio nebutswa obabeele abandubo.”

¹⁸Mana omumalaika owa OMWAMI Nyasaye nalachilisia Gadi okhutsia okhuboolela Daudi mbu atsie yombashile OMWAMI Nyasaye eshimalilo shiemisango halwanyi wa Arauna Omuyebusi aseselanga yimele.

¹⁹Kho Daudi nalonda lilachilisio elia OMWAMI Nyasaye, mana natsia nakhola shinga yali namuboolele.

²⁰Arauna nende abasianibe bane bali nibasesanga yingano habundu tsana aho ewa okhusesela yimele, ne olwa balola omumalaika oyo, abasianibe belukha nibebisa.

²¹Bwangu bwene olwa Arauna yalola Omuruchi Daudi niyetsanga, yarula habundu hokhusesela, mana niyenama obwenibwe nibuula hasi.

²²Daudi yaboolela Arunani ari, “Ngusia halutse hano. Ndenya okhumbashila OMWAMI Nyasaye eshimalilo shiemisango, kho mbu olumbe lumamile abandu luno luweho. Ngusilia khubukusi bwa habwene.”

²³Arunani naboolela Daudi ari, “Bukula habundu aho, omwami wanje khandi omuruchi wanje akhole shinga olwa achama. Lola, ehaana iheyi khulwa omusango omusambe, ebihuulilo okhuba tsikhwi nende yingano okhuba omusango kweimele. Ekhuhelesia bino biosi.”

²⁴Nebutswa omuruchi Daudi nakalusia Arauna ari, “Tawe, ndalakhurunga omurungo kwosi. Shindalahaanakhwo eshindu shiosi eshili eshishio okhuba omusango kwa OMWAMI Nyasaye eshia ndalarunjile tawe.”

²⁵Mana Daudi narunga Arauna ebitonye bieitsahabu ebikhumi bisasaba (600) khulwa habundu ahokhusesela aho.

²⁶Daudi niyombashilaho OMWAMI Nyasaye eshimalilo shiemisango mana nahaana emisango emisambe nende echiokhureera omulembe[12] Nasaayilaho, mana OMWAMI Nyasaye namukalusia khulwa okhureera omulilo okhurula mwikulu okhusamba emisango echio khushimalilo shiemisango.

²⁷Mana OMWAMI Nyasaye naboolela omumalaika mbu akalusie olukangalwe muluula, mana omumalaika oyo nakhola ario.

²⁸Olwa Daudi yalola ebise ebio mbu OMWAMI Nyasaye yali namukalusiye okhusabakhwe nali halwanyi wa Arauna aseselanga yimele, Daudi yahaanilaho emisango.

²⁹Liheema Litakatifu elia OMWAMI Nyasaye lia Musa yali niyakaasia nali mushitsiimi nende eshimalilo shiemisango shia basambilangakhwo emisango, khubise ebio biali nibishili Gibeoni habundu wokhwinamila okhuula.

³⁰Nebutswa Daudi shiyanyalilungwa okhutsiayo okhwinamila Nyasaye tawe, shichila yali niyaria olukanga lwomumalaika owa OMWAMI Nyasaye.