Read wanga 1 AKAKHALE 22 Bible Online

1 AKAKHALE 22 - wanga bible

1 AKAKHALE 22

¹Mana Daudi naboola ari, “Ihekalu eya OMWAMI Nyasaye yilaba hano khandi nende eshimalilo shiemisango shia Abaisiraeli balakholelangakhwo omusango emusambe.”

²Kho Daudi nalaka mbu bakhung'asie halala abarende boosi abamenyanga mu Isiraeli. Mana neyaahula okhurula mubo, ababaatsi bamachina khulwa okhubaatsa amachina kokhumbakha Ihekalu ya Nyasaye.

³Yahaana ebibia ebinji ebia okhwiranya emisumari chiemiliango nende bichabi; nende omukasa omunji okulanyala okhuchelwa tawe.

⁴Khandi yakhola abandu aba Tiro nende Sidoni okhumureerera ebitisi ebinji muno ebiomusaala kwomusiita.

⁵Daudi naboola mumwoyokwe ari, “Omusiani wanje Solomoni nomubukha khandi ashili okhuba nobuchesi obuhela, ne Ihekalu eyikhoyele okhumbashilwa OMWAMI Nyasaye, okhuula yibe oyolukoosi muno, eya ifuma khandi eyoluyali imbeli wabamahanga koosi khushialo. Khulweshio, ndalarechekha ebindu biokhuchumbakha.”

⁶Mana nalanga Solomoni omusianiwe, ne namulaka okhumbashila OMWAMI Nyasaye, Nyasaye owa Isiraeli Ihekalu.

⁷Daudi naboolela Solomoni ari, “Omusiani wanje, ndali nindenya okhumbashila OMWAMI Nyasaye wanje Ihekalu khulwa okhumuhelesia oluyali.

⁸Nebutswa OMWAMI Nyasaye yamboolela mbu ndali nindeera abandu abanji muno khandi nindalwana amahe amanji muno khushialo. Kho khulwa okhubela amatsayi koosi aka ndaraatsia, OMWAMI Nyasaye shiyafuchilila mbu emumbashile Ihekalu tawe.

⁹Yasuubisia naboola ari, ‘Olebula omwana omusiani oularuka nomulembe, shichila ndalamukhola okhuba nomulembe okhurula mubasukube boosi. Eliiralie lilaba Solomoni[13] shichila ndilihelesia Isiraeli omulembe nende obulindwi muburuchibwe.

¹⁰Alanyumbashila Ihekalu. Alaba omwana wanje nasi ndalaba samwana. Abeinzuye bakharuche Isiraeli inziayo.’

¹¹“Bulano mwana wanje, OMWAMI Nyasaye abe ninawe, okhoya watsiililila obulayi mana wombashila OMWAMI Nyasayewo Ihekalu shinga yalaka mbu wakhombashe.

¹²Khandi OMWAMI Nyasayewo akhoya yakhuhelesia obumanyilisi nende obuchesi kho mbu oruche Isiraeli.

¹³Noba nolonda amebaalo nende amalako koosi aka OMWAMI Nyasaye yahelesia Musa, khulwa abandu ba Isiraeli, olaba obulayi mumakhuwa koosi. Obe oweitswoni khandi wume ikholo, ne olariakhwo eshindu shiosi tawe.

¹⁴Mukhunyakhana khwanje khulwa Ihekalu, erecheeshe itsahabu tsitani tsinyinji ebikhumila bitaru nende ebikhumi bine (3,400) nende ifetsa ebikhumila amakhumi kataru nabine (34,000) yokhwikhoonyelwa okhuchiumbakha. Okhumeeta khu ebio, omukasa nende ebibia bireerungwa mubunji. Erecheeshe khandi emisaala nende amachina, nebutswa wesi khandi omeetekhwo.

¹⁵Oli nende abakholi abanji abeshisaatsa. Baliho abokhuyaba amachina, abombashi, ababaatsi betsimbao khandi nende omulimo kwosi abandi abanji abamanya okhukhola omulimo kwosi kwosi,

¹⁶kwokhwiranya itshabu, okweifetsa, omukasa nende kwebibia. Bulano chaaka okhumbakha, ne OMWAMI Nyasaye abe ninawe.”

¹⁷Mana Daudi nalachilisia abemelisi boosi aba Isiraeli okhukhoonya Solomoni omusianiwe.

¹⁸Daudi nababoolela ari, “OMWAMI Nyasaye wenywe ali ninenywe khandi yamuhelesia omulembe okhurula tsimbeka tsiosi. Yanyalila okhuhula abandu boosi abamenyanga mushialo shino, mana bulano bali hasi wobunyali bwenywe nende OMWAMI Nyasaye.

¹⁹Bulano khalabanile OMWAMI Nyasaye wenywe namapaaro kenywe koosi nende emioyo chienywe chiosi. Chaache okhumbakha Ihekalu, kho mbu muremwo Lisanduku lia Indakano eya OMWAMI Nyasaye nende ebindu bindi ebitakatifu ebikhoonyelungwa okhumwinamila.”