Read wanga 1 AKAKHALE 23 Bible Online

1 AKAKHALE 23 - wanga bible

1 AKAKHALE 23

¹Olwa Daudi yali nakofuule yakhola Solomoni omusianiwe okhuba omuruchi wa Isiraeli.

²Omuruchi Daudi yakhung'asia halala abemilisi ba Isiraeli, abesaaliisi boosi nende Abalawi.

³Yabala abasaatsa Abalawi boosi okhuchaachila emiyika amakhumi kataru nende okhubisiaho. Boosi bali ebikhumila amakhumi kataru namunane (38,000).

⁴Omuruchi nahelesia Abalawi ebikhumila amakhumi kabili nende bine (24,000) okhusinjile emilimo chia Ihekalu, Abalawi ebikhumila bisasaba (6,000) okhubikha akahandikwa nende okhukhalaka emise.

⁵Abalawi ebikhumila bine (4,000) okhuba abelihe abalindi nende abandi ebikhumila bine (4,000) okhwimba nibetsoomia OMWAMI Nyasaye nibekhoonyelanga ebindu biokhwimba ebia omuruchi ahaanile khulwa okhwimba nibamwitsoomia.

⁶Daudi nabakabulamwo emikanda chitaru okhulondana nebilibwa bioluyia lwa Lawi mbu Gerishoni, Kohatsi nende Merari.

⁷Abasiani ba Gerishomu bali Ladani, nende Shimei.

⁸Abasiani ba Ladani bali Yehieli owali omukhulundu, Zetsamu nende Yoeli.

⁹Abasiani aba Shimei bali Shelomitsi, Hazieli nende Harani. Bano bali abemilisi belilibwa bia Ladani.

¹⁰Nabo abasiani ba Shimei bali Yahatsi, Ziza, Yeushi nende Beria. Boosi bali bane.

¹¹Omukhulundu yali Yahatsi ne owakhabili yali Ziza; nebutswa Yeushi nende Beria shibeebulakhwo abasiani abanji tawe, kho babalilwa halala shinga abeshilibwa shilala.

¹²Abasiani ba Kohatsi bali bane mbu Amuramu, Izihari, Heburoni nende Uzieli.

¹³Omusiani omukhulundu wa Kohatsi yali Amuramu owali samwana Haroni nende Musa. Haroni nende abolwibulolwe batsushililwakhwo amafura nibaahulwa okhuba buli lwosi abasinjilili ba ebindu ebitakatifu, okhusamba obubane khulwa okhwinamila OMWAMI Nyasaye, okhumukhalabanila nende okhuhelesia abandu tsikhabi muliiralie.

¹⁴Nebutswa abasiani ba Musa, owali omundu wa Nyasaye babalilwa halala Mubalawi bandi

¹⁵Musa yali nabasiani babili mbu Gerishomu nende Eleazari.

¹⁶Owambeli mubasiani ba Gerishomu yali Shebueli.

¹⁷Eleazari yali nomusiani mulala mbu Rehabia, nebutswa Rehabia yali nabolwibulo abanji.

¹⁸Izihari omusiani wakhabili owa Kohatsi yali nomusiani oweliira mbu Shelomitsi, owali omwimilisi wa abeshilibwa.

¹⁹Heburoni omusiani wakhataru wa Kohatsi yali nabasiani bane mbu Yeria, Amaria, Yahazieli nende Yekameamu.

²⁰Uzieli omusiani wakhane wa Kohatsi yali nabasiani babili mbu Mika nende Ishia.

²¹Merari yebula abasiani babili bano; Mahili nende Mushi. Mahili yesi yebula abasiani babili mbu Eleazari nende Kishi,

²²nebutswa Eleazari yafwa naleebulakhwo omusiani tawe habula abakhaana. Abakhanabe bateshela abasiani abomusiani wabwe mbu Kishi.

²³Omusiani wakhabili wa Merari mbu Mushi yebula abasiani bataru mbu Mahili, Ederi nende Yeremotsi.

²⁴Bano nibo abolwibulo lwa Lawi okhulondana nebilibwa nende abetsinzu; buli mulala khubo eliiralie liahandikwa. Buli mulala khubolwibulo luno, owemiyika amakhumi kabili noho okhubisiaho, yalinji nomukabo mumulimo kwa Ihekalu eya OMWAMI Nyasaye.

²⁵Daudi naboola ari, “Khulwa okhubeela mbu OMWAMI Nyasaye ahelesiye abandube omulembe khandi yetsile okhumenya Yerusalemu inziayo,

²⁶Abalawi shibenyekha okhuchinganga liheema elia Okhubaho khwa OMWAMI Nyasaye kata okhuchinganga eshindu shiosi eshiikhoonyelungwa okhwinamila tawe.”

²⁷Okhulondana nende aka Daudi yali nalachilisiye lwokhumalilikha, Abalawi boosi babalwa nibahandikwa, abali nemiyika amakhumi kabili nende okhubiraho khulwa okhukhalabana emilimo;

²⁸Ne Abalawi abo bahebwa omulimo kwokhukhoonyelela abesaaliisi bomulwibulo lwa Haroni omulimo kwokhwinamila Muhekalu, okhulinda olwanyi lwa Ihekalu nende ebikoro bindi nende okhulola mbu ebindu biosi ebisiye bileshe okhufwolofibwa, nende okhukhola emilimo chindi chiosi echia Muhekalu.

²⁹Basinjililanga emikaate echiahaanilungwa Nyasaye, obusie bwa yimele yemisango, ebisikuti ebibulamwo limela, emisango chiteshilwe, obusie obutsokasiibwemo namafura kemitsaituni; okhuchela ebihaanwa obulayi bwabio nende obukhongo bwabio.

³⁰Bakhupanga orio nibetsooma OMWAMI Nyasaye buli mutsuli nende khungoloobe, khandi nende

³¹buli olwa emisango emiisambe chihaanwa khu OMWAMI Nyasaye khunyanga ya Sabato, khumasabo aka Omwesi Omuyia, nende amasabo kandi amaahule. Bali bokhukhalabanila OMWAMI Nyasaye buli lwosi nibalondanga amalako kebaalanga mbu bakhoyele okhuba abesaaliisi banga khandi bakhalabana barie.

³²Bahebwa omulimo kwokhulinda Liheema liokhubaho okhwa OMWAMI Nyasaye nende Ihekalu, nende okhukhoonyanga abasiani babwe, abali abesaaliisi bolwibulo lwa Haroni nende chiokhwinamila muhekalu.