Read wanga 1 AKAKHALE 24 Bible Online

1 AKAKHALE 24 - wanga bible

1 AKAKHALE 24

¹Chino nichio emikanda chiabolwibulo lwa Haroni. Haroni yebula abasiani bane bano mbu Nadabu, Abihu, Eleazari nende Itsamari.

²Nadabu nende Abihu baranjilila okhufwa samwana wabwe nashili, ne nibalalekhakhwo abaana tawe, kho Eleazari nende Itsamari abali abasiani babwe nibaba abesaaliisi.

³Omuruchi Daudi nakabula abolwibulo lwa Haroni mumikanda okhulondana nende emilimo chiabwe. Zadoki owa mulwibulo lwa Eleazari nende Alimelechi owomulwibulo lwa Itsamari bamukhoonya okhubarechekha ario.

⁴Abolwibulo lwa Eleazari bakabulwa mumikanda ekhumi nende chisasaba; ne abolwibulo lwa Itsamari bakabulwa mumikanda munane. Bakabula bario shichila baliho abasaatsa abemilisi abetsinzu abanji mubolwibulo lwa Eliazari.

⁵Khulwa okhubela mbu baliho abemilisi ba Ihekalu nende aba eshiroho mubetsinzibulo tsiosi tsibili tsia Eleazari nende Itsamari, bakabwa emilimo khulwa okhukhupa ikha.

⁶Abolwibulo lwa Eleazari nende Itsamari bakalukhasaninjia khulwa okhukhupa ikha. Ne Shemayia, owali omuhandichi omusiani wa Natsaneli Omuhandichi Omulawi yahandikanga ameera kabwe imbeli wa Omuruchi Daudi nende abemilisi, omwisaaliisi Zadoki nende Ahimeleki omusiani wa Abiatsari, abemilisi abetsinzu tsiabesaaliisi nende Abalawi. Abeinzu ndala babukulungwa okhurula muba Eleazari mana olunyuma babukula oundi okhurula mubeinzu ya Itsamari.

⁷Ikha yakhupwa khubetsinzu etsio amakhumi kabili nende tsine nibalondananga bari nanwa; Eya yimbeli yakwiila Yehoyaribu, ne eyakhabili yakwila Yedaya.

⁸Eyakhataru yakwila Hiramu, eyakhane niyikwila Sehorimu,

⁹eyakharano yakwila Malikiya, eyakhasasaba niyikwila Miyamini;

¹⁰eya musafu niyikwila Hakozi, eyamunane niyikwila Abiya,

¹¹eya shienda yakwila Yeshwa, eya ekhumi niyikwila Shekania,

¹²eyekhumi nende ndala niyikwila Eliashibu, eyekhumi nakhabili niyikwila Yakimu;

¹³eyekhumi nende tsitaru niyikwila Hufa; eyekhumi nende tsine niyikwila Yeshebeabu;

¹⁴eyekhumi nende tsirano niyikwila Biliga; eya ekhumi nende tsisasaba niyikwila Imeri;

¹⁵eyekhumi nende musafu niyikwila Heziri, eya ekhumi nende munane niyikwila Hapizezi;

¹⁶eyekhumi nende shienda niyikwila Petsahia; eya amakhumi kabili niyikwila Yehezikeli;

¹⁷eyamakhumi kabili nende ndala niyikwila Yakini; eyamakhumi kabili nende tsibili niyikwila Gamuli;

¹⁸eyamakhumi kabili nende tsitaru niyikwila Delayia; eyamakhumi kabili nende tsine niyikwila Maazia.

¹⁹Abasaatsa abo bahandikwa ameera okhulondana nemilimo chiabwe chiokhutsia Muhekalu nende okhukhola emilimo chia kuuka wabwe Haroni yasimukha khulwa okhulonda amalako aka OMWAMI Nyasaye wa Isiraeli.

²⁰Bano nibo abemilisi betsinzu bandi abomulwibulo lwa Lawi. Shebueli yali womulwibulo olwa Amuramu, naye Yehideyia yali womulwibulo lwa Shebueli.

²¹Ishia yali owolwibulo lwa Rehabia.

²²Shelomitsi yali owolwibulo olwa Izihari, ne Yahatsani yali owolwibulo lwa Shelomitsi.

²³Abasiani ba Heburoni okhulondana nobukhulundu bwabwe bali Yeria, Amaria, Yehazi nende Yekameamu.

²⁴Shamiri yali owolwibulo lwa Mika owali owolwibulo lwa Uzieli.

²⁵Zekaria yali owolwibulo lwa Ishia omusiani wabwe Mika; naye Ishia oyo yali owolwibulo lwa Uzieli.

²⁶Abolwibulo lwa Merari bali Mahili, Mushi nende Yaazia.

²⁷Yaazia yebula abasiani bano bataru mbu Shohemu, Zakuri nende Iburi.

²⁸Abasiani ba Mahila bali Eleazari oulayebulakhwo omwana tawe;

²⁹nende Kishi owebula omwana mulala oweliira mbu Yerameeli.

³⁰Mushi yebula abasiani bataru bano mbu Mahila, Ederi nende Yeremotsi. Abo nibo abetsinzu tsia Abalawi.

³¹Omukhulundu wa mubuli abeinzu nende mulala omushe owakhubasiani babwe, bakhupanga tsikha khulwa okhumanya emilimo chiabwe, shinga butswa abekho babwe, abesaaliisi abolwibulo lwa Haroni bakholanga. Omuruchi Daudi, omwisaaliisi Zadoki, Ahimeleki nende abemilisi ba abetsinzu tsiabesaaliisi nende etsia Abalawi nibalinjiho okhulola.