Read wanga 1 AKAKHALE 26 Bible Online

1 AKAKHALE 26 - wanga bible

1 AKAKHALE 26

¹Buno nibwo obukabulwi bwemilimo khu Abalawi khuba abalindi ba Ihekalu. Okhurula mubeshilibwa Kora, yali Meshelemia omusiani wa Kore, owomunzu ya Asafu.

²Meshelemia yali nabasiani musafu bano nibalondokhananga mubukhulundu bwabwe; Zecharia, Yediayeli, Zebadia, Yatsinieli

³Elamu, Yehohanani nende Ehehoenayi.

⁴Yaliho khandi Obedi Edomu, owa Nyasaye yahelesia ikhabi yokhwibula abasiani munane bano, nibalondokhananga mubukhulundu bwabwe; Shemayia, Yehozabadi, Yoa, Saka, Natsaneli,

⁵Amieli, Isakari, nende Peuletsai.

⁶Omusiani wa Obedi Edomu mbu Shemayia yebula abasiani basasaba, abali abemilisi mubebilibwa biabwe, shichila buli abandu baheela obwimilisi.

⁷Abasiani bano bali Otsini, Rafaeli, Obedi, Elizabadi, Elihu nende Semakia. Bali abemilisi mubeshilibwa babwe shichila bali abandu abanyala okhushilakhwo eshihaanwa shiobwimilisi.

⁸Abo boosi bali abomulwibulo lwa Obedi Edomu. Abenabo halala nende abasiani babwe, nende abekho babwe bali abandu abanyala obwimilisi, abali namani kokhukhalabana. Abolwibulo abo boosi bali amakhumi kasasaba nende babili.

⁹Mesheumayo yali nabasiani nende abekho abahela ekhumi nende munane abanyala okhukhola omulimo okwo.

¹⁰Hosa okhurula mubeshilibwa shia Merari yali nabasiani bane bano mbu, Shimiri, owa samwana yamukhola okhuba omwimilisi ne kata nalali omukhulundu tawe;

¹¹Owakhabili yali Hilikia, owakhataru yali Tabalia ne owakhane yali Zakaria. Abasiani halala nabekho ba Hosa boosi bali ekhumi nende bataru, abali abalindi ba Ihekalu.

¹²Abalindi ba Ihekalu bakabulwa mumikanda okhulondana nende abetsinzu ne bakabwa okhukhola emilimo Muhekalu shinga Abalawi bandi bakabwa.

¹³Bali abeinzu nibalachelasinjia khubunji bwabwe tawe, bakhupanga ikha khulwa okhumanya eshilibwa shia Ihekalu shia bakhoyele okhulinda.

¹⁴Ikha yokhulinda eshilibwa shiebukwe yakwila Shelemia nayo yokhulinda eshiemasaba yakwila omusianiwe oulangwa mbu Zekaria, omundu owachelanga amachelo amalayi buli lwosi.

¹⁵Ikha yokhulinda eshilibwa eshia Emulambo yakwila Obedi Edomu, nayo ikha yokhulinda tsinzu tsiamabikho niyikwila abasianibe.

¹⁶Tsikha tsiakwila Shupimu nende Hosa okhulinda Eshilibwa shie Mumbo nende eshia Shaleketsi eshili khumuhanda kwemukulu. Omulimo okwobulindi kwakabulwa mutsinyanga tsiahukhane nibalondananga.

¹⁷Abalindi basasaba balindanga buli khunyanga eshilibwa shia Ebukwe, ne bane balindanga eshia Emasaba, khandi bane eshia Emulambo. Abalindi bane barebwa okhulindanga tsinzu tsiamabikho buli nyanga; babili khubuli inzu ndala eyamabikho.

¹⁸Ne enanzu indayi yali elubeka lwomumbo, baliho abalindi bane abamulwanyi lwa abokhulinda omuhanda, nabo babili abokhulinda inzu yene.

¹⁹Kuno nikwo omulimo kwobulindi bwebilibwa okwakabwa abeshilibwa shia Kora nende eshia Merari.

²⁰Abalawi bashiabwe bandi shinga Ayeya bali nomulimo kwokhusinjilila amabiikho komuhekalu ya Nyasaye nende tsinzu tsiamabiikho kebihaanwa biahuliilwe Nyasaye.

²¹Ladani owali mulala khubasiani ba Gerishoni, yali kuukanyene abemikanda chietsinzu abanji, halala nende abeinzu ya Yehieli omusianiwe.

²²Abasiani babili mbu Zetsamu nende Yoeli aba Ladani, bali abasinjilili bamabikho nende tsinzu tsiamabikho ka Ihekalu.

²³Emilimo chakabwa khandi khubolwibulo lwa Amuramu, Izihari, Heburoni nende Uzieli.

²⁴Shebueli omusiani wa Gerishomu owa eshilibwa shia Musa niye owa omusinjilili omukhongo wamabikho ka Ihekalu.

²⁵Yali omwikho wa Shelomitsi okhubirila mumusiani wabwe Gerishomu mbu Eleazari. Eleazari yali samwana Rehabia, owali samwana Yeshia. Yeshia yali samwana Yoramu, naye Yosamu naba samwana Zikiri, naye naba samwana Shelomitsi.

²⁶Shelomitsi nende abandu beinzuye bali abasinjilili ba ebihaanwa biosi biomuruchi Daudi yaahulila Nyasaye, abemilisi babetsinzu, abemilisi bemikanda chia abebilibwa nende abakhongo babelihe.

²⁷Bayila bilala khubindu biabayaaya nibatiila mwihe mana nibabiahula okhwikhoonyelwa Muhekalu.

²⁸Shelomitsi nende abeinzuye bali abasinjilili ba buli shindu eshiali nishiahuulwe okhwikhoonyelwa Muhekalu, halala nende ebihaanwa biomulakusi Samweli, omuruchi Saulo, Abuneri omusiani wa Neri nende Yoabu omusiani wa Zeruya bareera.

²⁹Kenania nende abasianibe abomulwibulo lwa Izihari, bali nemiilimo chia obwimilisi shinga okhubikhanga amakhuwa kahandikwa nende okhuyaasinjia nibareera omulembe khulwa Abaisiraeli.

³⁰Mubolwibulo lwa Heburoni, Hashabia nende abekhobe eshikhumila nende ebikhumi musafu (1,700), abandu boosi abeitswoni, bali abasinjilili bobwimilisi bwa tsidini tsiosi nende obukhalabani bwoburuchi Muisiraeli Mumbo womwalo kwa Yorodani.

³¹Yeria niye owali omwimilisi wabolwibulo lwa Heburoni. Mumwika kwamakhumi kane, okwa Daudi yali narukanga, bakhabilisia obutsiilili bwabeinzu eya abolwibulo lwa Heburoni, nende abelihe beitswoni beinzu eyo, banyoolekha nibamenyanga Yazeri mushialo shia Giliadi.

³²Omuruchi Daudi nalobola abandu beitswoni ebikhumila bibili nende ebikhumi musafu (2,700) abemilisi abetsinzu okhurula mubekho ba Yeria mana nabakhola abasinjilili bobwimilisi bwa tsidini tsiosi nende obukhalabani bwoburuchi Muisiraeli ebukwe womwalo kwa Yorodani; mubialo ebia Rubeni, Gadi nende inusu yoluyia lwa Manase olwa Ebukwe.