Read wanga 1 AKAKHALE 27 Bible Online

1 AKAKHALE 27 - wanga bible

1 AKAKHALE 27

¹Kano niko ameera kahandikwa kabemilisi abetsinzu tsia Abaisiraeli, abemilisi aba abebilibwa nende abakhongo babwe abasinjililanga obukholi bwemilimo chie lihanga. Buli omwesi mumwika, omukanda mulala kwabasaatsa ebikhumila amakhumi kabili nende bane (24,000) bakhalabananga nibemililwe nomukhongo wabelihe ouba nasinjilile omwesi okwo.

²Yashobeamu omusiani wa Zabudieli niye owasinjilila omukanda kweimbeli mumwesi kweimbeli. Omukanda okwo kwali abasaatsa ekhumila amakhumi kabili nende bine (24,000).

³Yali mulala khubeshilibwa shia Perezi, eshia khuboluyia lwa Yuda, khandi niye owali omukhongo wabakhongo bandi babelihe mumwesi kwa imbeli.

⁴Dodai owa mulwibulo lwa Ahohi niye owasinjilila omukanda kwakhabili mumwesi kwakhabili. Mikilotsi yali omulondeleliwe mukhusinjilila omukanda okwo. Omukanda okwo kwali abasaatsa ebikhumila amakhumi kabili nende bane (24,000).

⁵Benaya omusiani womwisaaliisi Yehoyada niye owasinjilila omukanda kwakhataru mumwesi kwakhataru. Yali omukhongo owa boosi ne omukandakwe kwali nabasaatsa ebikhumila amakhumi kabili nende bane (24,000).

⁶Beneya uno niye owali omusaatsa wamani mubandu amakhumi kataru khandi niye owali omukhongo wabwe. Omusianiwe oweliira mbu Amizabadi yakalukha mushilenjeshie okhuuba omukhongo wabelihe bomukanda okwo.

⁷Asaheli omusiani wabwe Yoabu niye owasinjilila omukanda okwa khane mumwesi okwa khane. Omusianiwe oweliiva mbu Zebacha niye owakalukha mushilenjeshie okhuba omusinjilili omukanda okwo kwali abasaatsa ebikhumila amakhumi kabili nende bane (26,000).

⁸Shamuhutsi omukhongo wabelihe womulwibulo lwa Izihari niye owasinjilila omukanda kwa kharano mumwesi kwa kharano. Omukanda okwo kwali abasaatsa ebikhumila amakhumi kabili nende bane (24,000).

⁹Ira omusiani wa Ikeshi okhurula Tekoa niye owasinjilila omukanda kwa khasasaba mumwesi kwa khasasaba. Omukanda okwo kwali abasaatsa ebikhumila amakhumi kabili nende bane (24,000).

¹⁰Helezi owomulwibulo lwa Efuraimu okhurula mushialo shia Peloni niye owasinjilila omukanda kwa musafu mumwesi okwa musafu. Omukanda okwo kwali abasaatsa ebikhumila amakhumi kabili nende bine (24,000).

¹¹Sibekai okhurula mushialo shia Husha owa mubeshilibwa shia Zerahi niye owasinjilila omukanda kwa munane, mumwesi kwa munane. Omukanda okwo kwali abasaatsa ebikhumila amakhumi kabili nende bane (24,000).

¹²Abiezeri okhurula Anatsotsi mushialo shioluyia lwa Benjamini niye owasinjilila omukanda kwa shienda. Omukanda okwo kwali abasaatsa ebikhumila amakhumi kabili nende bine (24,000).

¹³Maharai okhurula Netofa yali mulala khubeshilibwa shia Zera niye owasinjilila omukanda kwekhumi mumwesi kwekhumi. Omukanda okwo kwali abasaatsa ebikhumila amakhumi kabili nende bane (24,000).

¹⁴Beneya okhurula Piratsoni mushialo shioluyia lwa Efuraimu niye owasinjilila omukanda kwekhumi nende ndala mumwesi kwekhumi nende mulala. Omukanda okwo kwali abasaatsa ebikhumila amakhumi kabili nende bane (24,000).

¹⁵Helidai okhurula Netofa owa mulwibulo lwa Otsanieli niye owasinjilila omukanda kwekhumi natsibili mumwesi kwekhumi nakhabili. Omukanda okwo kwali abasaatsa ebikhumila amakhumi kane nende bane (24,000).

¹⁶Owasinjilila oluyia lwa Rubeni yali Eleazari omusiani wa Zikiri; ne khuluyia lwa Simeoni yali Shefatia omusiani wa Maaka.

¹⁷Owasinjilila oluyia lwa Lawi yali Hashabia omusiani wa Kemweli; ne khuluyia lwa Haroni yali Zadoki.

¹⁸Owasinjilila oluyia lwa Yuda yali Elihu omusiani wabwe Daudi, ne khuboluyia lwa Isakari yali Omuri omusiani wa Mikaeli.

¹⁹Owasinjilila oluyia lwa Zebuluni yali Ishimaya omusiani wa Obadia; ne khuboluyia lwa Nafutali yali Yerimotsi omusiani wa Azirieli.

²⁰Owasinjilila oluyia lwa Efuraimu yali Hoshea omusiani wa Azazia ne khuboluyi inusu lwa Manase yali Yoeli omusiani wa Pedia.

²¹Owasinjilila inusu yoluyia lwa Manase Mugileadi yali Ido omusiani wa Zekaria ne khuboluyia lwa Benjamini yali Yaasieli omusiani owa Abuneri.

²²Owasinjilila oluyia lwa Dani yali Azareli omusiani wa Yerohamu. Bano nibo abali abasinjilili khutsimbia tsia Isiraeli.

²³Omuruchi Daudi shiyabala abandu abali nibashili okhuusia emiyika amakhumi kabili tawe, shichila OMWAMI Nyasaye yali niyasuubisia okhwinjiyia Abaisiraeli okhuba abanji shinga tsing'ining'ini mwikulu.

²⁴Yoabu owa nyinamwana yali mbu Zeruya yachaaka okhubala abandu nebutswa nalamala boosi tawe. Nyasaye nahelesia Isiraeli eshinyasio khulwa okhubela okhubala okhwo, kho obunji shibahandikwa mubilabo ebikhongo biomuruchi Daudi tawe.

²⁵Kano niko ameera kabandu abasinjilila ebindu bioburuchi. Azimawetsi omusiani owa Adieli yasinjilila tsinzu tsioburuchi tsiamabikho. Yonatsani omusiani wa Uzia yasinjilila tsinzu tsiamabikho akali mutsindalo, mumataala, mubisoma nende mutsingoba.

²⁶Eziri omusiani owa Kelubu yasinjilila abakholi bomumikunda nende abalimanga omukunda.

²⁷Shimeyi omuramotsi yasinjilila emikunda chiemitsabibu. Zabudi okhurula Shefumu yasinjilila emitsabibu chiokhukasibwa idivai.

²⁸Baalihanani okhurula Kederi yasinjilila emisaala chiemiseituni nende chiemikuyu echiali elubeka lwa Mumbo hasi ewebikhulu. Yoashi yasinjilila obukabi bwamafura kemiseituni.

²⁹Shituri okhurula Saharoni yasinjilila tsing'ombe etsiayanga mumuhololokhwe mwa Sharoni. Shafati omusiani wa Adilai yasinjilila tsing'ombe etsiayanga mumabanda.

³⁰Obili okhurula Ishimaeli yasinjilila tsingamia. Yehideyia okhurula Meronotsi yasinjilila tsisishili.

³¹Yazizi okhurula Hagiri yasinjilila ebiayo.

³²Khotsanyene omuruchi Daudi oulangwa mbu Yonatsani yali omuchetsiyi, omundu wobumanyilisi khandi owasoma muno. Yonatsani nende Yehieli omusiani wa Hakimoni basinjilila obusomi bwabasiani ba Omuruchi.

³³Ahitsofeli yali omuchetsiyi womuruchi naye Hushai okhurula Ariki yali omwitsa khandi omuchetseyi owa omuruchi.

³⁴Abiatsari nende Yehoyada omusiani wa Beneya baba abachetsiyi bomuruchi olunyuma lwokhufwa okhwa Ahitsofeli. Yoabu niye owali omukhongo owabelihe boburuchi.