Read wanga 1 AKAKHALE 28 Bible Online

1 AKAKHALE 28 - wanga bible

1 AKAKHALE 28

¹Omuruchi Daudi yalachilisia abemilisi boosi aba Isiraeli bakhung'ane mu Yerusalemu. Kho abemilisi boosi aba tsimbia, abasinjililanga emilimo chia lihanga, abemilisi ba abebilibwa, abahenjelisinjia emiandu nende emiruko chiomuruchi nende abasianibe, abemilisi bomunzuye yoburuchi, abakhongo babelihe nende abasaatsa boluyali; boosi bekhung'asia Yerusalemu.

²Daudi yasinjila imbeli wabwe mana nababoolela ari, “Abandu belihanga lianje, murecheresie. Ndenya okhumbashila Lisanduku lia Indakano inzu iralilu eya inziayo, habundu aha OMWAMI Nyasaye wefwe alamenyanga. Ndirecheeshe okhumbakha Ihekalu khulwa okhuhelesia Nyasaye oluyali,

³Nebutswa yakhayile isie okhuchiumbakha shichila endi omusikari ne ndaratsia eshitsayi eshinji.[14]

⁴OMWAMI Nyasaye owa Isiraeli, yalobola isie nende abolwibulo lwanje okhuruka Isiraeli inziayo. Yalobola oluyia lwa Yuda khulwa okhunyoolangamwo abemilisi, ne okhurula muluyia Yuda lwa yalobola abeinzu eya papa wanje. Okhurula mubeinzu yino boosi, omwene yachama okhulobola mana niyakhola okhuba omuruchi khu Isiraeli yosi.

⁵Yambelesia abasiani abanji, ne okhurula mwabo boosi, yalobola Solomoni okhuruka Isiraeli elili lihanga elia OMWAMI Nyasaye.

⁶“OMWAMI Nyasaye yamboolela ari, ‘Omusianiwo Solomoni niye oulinzumbashila Ihekalu. Emuloboole okhuba omusiani wanje nasi ndalaba samwana.

⁷Ndalakhola lihangalie okhubaho inziayo, naba natsiililila okhulonda obulayi bwene amalako kanje nende amalachilisio koosi shinga olwa alondanga bulano.’

⁸“Kho bulano abandu banje, imbeli wa Nyasaye wefwe nende ewa omukhung'ano kuno kwosi kwa Isiraeli abandu ba OMWAMI Nyasaye, emulachilisia okhulonda obulayi bwene buli shindu eshia OMWAMI Nyasaye wefwe yamulachilisia, kho mbu mutsiililile okhumenya mushialo eshilayi shino, ne munyale okhushihaana khulwibulo olwitsa okhukalukha mushilenje shienywe olunyuma inziayo.”

⁹Ne naboolela Solomoni ari, “Musiani wanje, ekhulachilisia mbu ohulile Nyasaye wa papawo khandi omukhalabanile nomwoyo mulala khandi nomwoyo omulekhule. OMWAMI Nyasaye amanyile amapaaro kefwe nende aka khwikombanga koosi. Noba niwakhamutsila alakhuhulila nebutswa niwakhamurulakhwo, aba alakhwibala inziayo.

¹⁰Okhuula omanye mbu OMWAMI Nyasaye akhuloboole mbu omumbashile Ihekalu indakatifu. Bulano chiumbashe ne ochiumbashe neshinani.”

¹¹Kho Daudi nahelesia Solomoni olukaratasi olwachorwakhwo Ihekalu yosi shinga olwa ikhoyele okhumbakhwa, ebikoro biayo ebikhongo, habwinjililo, ebikoro biamabikho, ebia tsikorofa tsie ikulu halala nende etsia hasi nende habundu Hatakatifu Muno wobwonooni bilabelungwa.

¹²Yamuhelesia khandi omuchoro kwosi okwa yali napaarire mumwoyokwe; okwa tsinyanyi nende tsinzu tsiokhutsibotokhana, nende ebikoro biokhubikha ebindu bia Ihekalu nende ebihaanwa ebiahulilwa OMWAMI Nyasaye.

¹³Daudi khandi yamuhelesia amebaalo kokhurechekha abesaaliisi nende Abalawi okhukhola emilimo chiabwe, okhukhola emilimo chia Ihekalu nende okhusinjilila ebikaye biosi ebia Muhekalu.

¹⁴Yamuhelesia amebaalo kokhumanyia obusiro bweifetsa nende Itsahabu bukhoyele okhwiranya ebikaye

¹⁵bia buli itaha nende eshichibi,

¹⁶tsimesa tsiifetsa nende buli imesa ya Itsahabu tsiokhurebwakhwo emikaate echihaanilwa Nyasaye.

¹⁷Yamuhelesia khandi amebaalo kokhumanyia obusiro bweitsahabu yokhwiranya obuma, ebikaye, ebikombe, obusiro bweifetsa nende itsahabu khulwa okhwiranya tsisahani,

¹⁸obusiro bweitsahabu inzeleleshe yokhwiranya eshimalilo shiemisango shiokhusambilakhwo obubane nende okhukaasia likaari liabakerubi babambulakhwo tsimbao tsiabwe khwisanduku lieindakano ya OMWAMI Nyasaye.

¹⁹Omuruchi Daudi naboola ari, “Kano koosi karebwa mubulosie obwahandikwa okhulondana namalachilisio ako OMWAMI Nyasaye omwene yalachilisia okhukakhola.”

²⁰Omuruchi Daudi naboolela omusianiwe Solomoni ari, “Witinyie khandi Wume ikholo. Chaka okhumbakha ne olafuchililakhwo eshindi shiosi okhukhuleshesia tawe. OMWAMI Nyasaye wekhalabanilanga, alabetsanga ninawe. Shialakhulekha tawe ne alaba ninawe okhuula lwomala omulimo kwosi okwokhwikholekha khu Ihekaluye yino.

²¹Abesaaliisi nende Abalawi bahelwe emilimo chiokhukhalabana Muhekalu. Abandu abasaatsa bobuchesi bweimbia yosi berecheeshe okhukhukhoonya, nabo abandubo halala nabemilisi babwe bali hasi wobunyalibwo.”