Read wanga 1 AKAKHALE 29 Bible Online

1 AKAKHALE 29 - wanga bible

1 AKAKHALE 29

¹Mana omuruchi Daudi naboolela abomukhung'ano kwosi ari, “Omwana wanje Solomoni, owa Nyasaye yalobola, nomuraka khandi ashili okhuchesihala; ne omulimo okwo nomukhongo ne inzu eya alombakha shineyomundu tawe habula ni Ihekalu eya OMWAMI Nyasaye.

²Endeemile koosi aka enyala khulwa okhurechekha ebindu biokhumbashila Ihekalu; shinga itsahabu khulwa okhwiranya ebindu bia itsahabu, ebibia okhwiranya ebindu bia ebibia, tsimbao khulwa okhubatsa ebindu bia tsimbao, khandi nende amachina kobukusi, amachina amang'inang'inu, amachina aka obukondo obwahukhane nende amachina amanji aka marimari.

³Okhumeeta khandi okhushilasia biosi ebia ehaanile emalile okhuhaana ifetsa nende itsahabu okhurula khubianje omwene khulwa okhubeela obuheeli bwanje khu Ihekalu ya Nyasaye.

⁴Ehaanile tsitani etsishila ebikhumi (100) etsia itsahabu inyushe nende hembi tsitani ebikhumi bibili (200) etsia ifetsa inzeleleshe khulwa okhusiaya amasiisi ka Ihekalu.

⁵Niwiina bulano ouchamile okhuhaana ebihaanwa khu OMWAMI Nyasaye?”

⁶Mana abemilisi babebilibwa, abakhongo abetsimbia, abakhongo babelihe abemilisi bemiandu chioburuchi nibeyinia okhuhaana

⁷ebindu bilondakhwo bino, khulwa omulimo kwa Ihekalu. Tsitani tsinyinji tsieitsahabu okhushila eshikhumi amakhumi musafu (170), ifetsa okhushila tsitani ebikhumi bitaru nende amakhumi kane (340), hambi tsitani ebikhumi bisasaba nende amakhumi kabili (620) tsiomukasa; khandi okhushila tsitani ebikhumila nebikhumi bine bieshibia (3,400).

⁸Abo abali namachina kobukusi bakahaana mwibishilo lia Ihekalu; elia Yahieli Omulawi wabeshilibwa shia Gerishoni yalinji omulindi.

⁹Abandi bali nibahaanilenje khu OMWAMI Nyasaye khulwa okhuchama ne bali nibasangalile muno mbu ebindu ebinji biali nibihaanilwe. Omuruchi Daudi yesi yasaangaala muno.

¹⁰Omuruchi Daudi yetsoomia OMWAI habwene yaho imbeli womukanda kwosi. Yaboola ari, “OMWAMI Nyasaye wakuuka wefwe Yakobo, witsoomibwe inziayo!

¹¹Oli omukhongo khandi owamani, owoluyali, omuhuli nende omukhulundu. Buli shindu eshili mwikulu nende khushialo neshishio nawe niwe omuruchi, owobunyali okhushila abaruchi bandi boosi.

¹²Ebindu nende emiandu chiosi birulanga khwiwe. Orukanga buli shindu shiosi khulwa amaaniko nende obunyalibwo khandi onyala okhukhola omundu yesi okhuba omukhongo khandi owamaani.

¹³Bulano Nyasaye wefwe, khukhupila orio khandi khwitsoomia eliiralio lioluyali.

¹⁴“Habula isie nende abandu banje shikhunyala toto okhukhuhelesia eshindu shiosi tawe shichila buli shindu shiahanwa okhurula khwiwe, ne khukalusiye butswa ebili ebibio.

¹⁵Iwe OMWAMI Nyasaye, omanyile mbu khumenyanga mubulamu shinga abelukhasibwa khandi abacheni, shinga abakuuka befwe bamenyanga. Tsinyanga tsiobulamu bwefwe tsibiranga shinga eshiinikha ne shikhunyala okhwifisa okhufwa tawe.

¹⁶E OMWAMI Nyasaye wefwe, khureerire halala obuyinda bwefwe bwosi khulwa okhumbakha Ihekalu, okhuhelesia eliiralio Litakatifu oluyali, nebutswa biosi biarula khwiwe khandi biosi nebibio.

¹⁷Emanyile mbu oteemanga omwoyo kwa buli mundu ne osangasibungwa nabandu beshilongoole. Mubwatoto nende mubusubilwa ehaanile buhaana khwiwe bino biosi. Khandi endutsi shinga abandubo abakhung'anile hano basangalile okhureerera iwe ebihaanwa.

¹⁸OMWAMI Nyasaye wa bakuuka befwe Aburahamu, Isaka nende Yakobo biikha obwihaani obwo mumioyo chiabandubo inziayo, mana obakhole buli lwosi okhuba abesiikwa khwiwe.

¹⁹Helesia omusiani wanje Solomoni omwoyo kwobunaayi bwokhulonda buli koosi aka olaka khandi yombashe Ihekalu yerechesheele ebindu bino.”

²⁰Mana Daudi naboolela abandu nomwoyo omukhongo ari, “Yitsoomie OMWAMI Nyasaye wenywe!” Mana abomukhung'ano kwosi nibetsoomia OMWAMI Nyasaye, Nyasaye wabakuuka babwe khandi nibenama nibahaana oluyali khu OMWAMI Nyasaye nende khandi khumuruchi.

²¹Inyanga yalondakhwo, bakholela OMWAMI Nyasaye emisango nibamuhaanila emisango emisambe tsisurusi ebikhumila (1,000), halala nende emisango chiabwe chieidivai nende ebihaanwa bindi ebinji ebiahebwa Abaisiraeli boosi.

²²Abandu abo balia khandi nibanywa nomwikhoyo omukhongo imbeli ewa OMWAMI Nyasaye inyanga eyo. Mana nibarumbula Solomoni omusiani wa Daudi okhuba omuruchi olwakhabili, nibamutsushililakhwo amafura nibamukhola okhuba omuruchi naye Zadoki okhuba Omwisaaliisi.

²³Kho Solomoni nakalukha mushilenje shia Daudi papawe khuburuchi obwa OMWAMI Nyasaye yali niyasimukha. Yali omuruchi omulayi muno mana abelihanga lia Abaisiraeli boosi nibalonda amalakoke.

²⁴Abakhongo boosi nende abelihe nende kata abasiani bandi boosi aba Daudi basuubisia okhuba abaholo khu Solomoni shinga omuruchi.

²⁵OMWAMI Nyasaye nakhongoyia muno Solomoni imbeli wa Abaisiraeli boosi, namuhelesia obukhulundu bweshiami bwomuruchi undi owamuranjilila ashili okhubakhwo ninabwo.

²⁶Daudi omusiani wa Yese yaruka Isiraeli yosi

²⁷khulwemiyika amakhumi kane (40). Yaruka Muheburoni emiyika musafu ne mu Yerusalemu emiyika amakhumi kataru nende chitaru.

²⁸Yafwa nayindiile mumiyika, nali nobuyinda khandi niyahebwa oluyali, naye Solomoni omusianiwe nakalukha mushilenjeshie okhuba omuruchi.

²⁹Akobulamu bwakhale obwa Omuruchi Daudi, okhurula mukhuchaaka okhuula okhumala kahandikwa mubitabu bia balakusi bataru bano mbu Samweli, Natsani nende Gadi.

³⁰Amahandiko ako kalolosinjia shinga yarukanga, shinga yalinji owobunyali nende ebindu biosi ebiamwikholekhakho, khu Isiraeli nende amahanga kandi akali hambi khu Isiraeli.