Read wanga 1 AKAKHALE 4 Bible Online

1 AKAKHALE 4 - wanga bible

1 AKAKHALE 4

¹Bano nibo abetsinzibulo tsia Yuda; Perezi, Hezironi, Karimi, Huri nende Shobali.

²Shobali yali samwana Reaya owali samwana Yahatsi samwana Ahumai nende Lahadi; abali bakuukanyene abandu abamenyanga Muzora.

³Bano nibo abasiani ba Etamu; Yezerili, Ishima, nende Idubashi, ne omukhaana wabwe yalangungwa mbu Hazeleliponi,

⁴naye Penueli yachachia litookho lia Gedori naye Ezeri nachachia litookho lia Husha: Bano nibo abali abasiani ba Huri, owali omusiani omukhulundu wa Efuratsa owachachia litookho lia Betselehemu.

⁵Ashuri owachachia litaala lia Tekoa yali niyateeshia abakhasi babili abalangwa mbu Hela nende Naara.

⁶Yebula nende Naara abasiani bane mbu Ahuzamu, Hefari, Temeni nende Haahashitari.

⁷Ne niyebula nende Hela abasiani bataru mbu Zeretsi, Izuhari nende Etsinani.

⁸Kozi yali samwana Anubu nende Zobeba khandi kuukanyene abebilibwa biarula mu Ahariheli omusiani wa Harumi.

⁹Yaliho omusaatsa wundi mbu Yabezi, owali niyahebwa oluyali muno, mubo munzuye. Mamawe yali niyamukulikha eliira mbu Yabezi[2], shichila okhwibulwakhwe khwali okhululu muno.

¹⁰Nebutswa Yabezi yasaba OMWAMI Nyasaye wa Isiraeli naboola ari, “Nyasaye umbelesie ikhabi nende omukunda omukhongo, obetsenje ninasi mana wundetse okhurula khububi bwosi obunyala okhuusaalisia.” Mana Nyasaye namuhelesia aka yali nasabile.

¹¹Kalebu ouli omusiani wabwe Shuha yali nomwana omusiani mbu Mehiri. Mehiri yali samwana Eshitoni

¹²owali samwana abasiani bataru mbu Betsirafa, Pesea nende Tehina. Tehina niye owachachia litookho lia Nahashi. Abolwibulo lwabandu bano, bamenyanga mu Reka.

¹³Kenazi yali nabasiani babili mbu Otsinieli nende Serayia. Otsinieli yesi yali nabasiani babili mbu Hatsatsi nende Meonotsai.

¹⁴Meonotsai yali samwana Ofura. Serayia yali samwana Yoabu, owachachia Libanda lia Obubatsi ewa abandu boosi bali nibamanya obulayi obubatsi.

¹⁵Kalebu owali omusiani wa Yefune yali nabasiani bataru mbu, Iru, Ela nende Naamu. Naye Ela yali samwana Kenazi.

¹⁶Yehaleleli yali nabasiani bane mbu; Zifu, Zifa, Tiria nende Asareli.

¹⁷Ezira yesi yali nabasiani bane mbu; Yatseri, Meredi, Eferi nende Yolani. Meredi yateshia Bitsia, omukhaana wa omuruchi wa Misiri. Bitsia yebulila Meredi abaana bataru. Omukhaana mbu Miriamu nende abasiani babili mbu Shamai nende Ishiba. Ishiba yali samwana Eshitemoa.

¹⁸Meredi yateeshia omukhasi wundi womuluya lwa Yuda, ne niyebula naye abasiani bataru mbu; Yeredi owachaachia litookho lia Gedori, Heberi owachaachia litookho lia Soko nende Yekutseli owachaachia litookho lia Zanoa.

¹⁹Hodia yateeshia omukhaana wabwe owalangwa mbu, Nahamu. Abolwibulo lwabwe nibo abachaachia oluyia lwa Garimi, abamenya mwitookho lia Keila nende aboluyia lwa Makatsi abamenya mwitookho lia Eshitemoa.

²⁰Shimoni yali nabasiani bane mbu; Amoni, Rina, Benihanani nende Tiloni. Ishi naye yali nabasiani babili mbu; Zohetsi nende Benizohetsi.

²¹Shela yali omusiani wa Yuda. Abolwibulolwe bali mbu; Eri owachaachia litookho lia Leka, Lada owachaachia litookho lia Maresha, aboluyia lwanabanga tsingubo tsieikitani, bali nibamenya mwitookho lia Betsi-ashibea.

²²Yokimu nende abandu abamenya mwitookho lia Kozeba, nende Yoashi nende Sarafi bateeshia abakhasi okhurula Moabu mana nibamenya Betselehemu (Amakhuwa kano na akakhale po).

²³Bano nibo abalonji abamenya mwitookho lia Netaimu nende elia Gedera, nibakhalabanila omuruchi.

²⁴Simoni yali nabasiani bataru mbu; Nemueli, Yamini, Yaribu nende Shauli.

²⁵Shauli omusiani wa Shalumu yebula Mibisamu. Mibisamu naye niyebula Mishima.

²⁶Mishima yebula Hamueli, Hamueli yebula Zakari, Zakari naye niyebula Shimei.

²⁷Shimei yali nabasiani ekhumi na basasaba nende abakhaana basasaba. Nebutswa abasiani babwe shibali nabaana abanji shinga ye tawe. Khandi aboluyialwe shibenjiha shinga aboluyia lwa Yuda tawe.

²⁸Bamenyanga mumatookho ka Berisheba, Maloda, Hazarishuali,

²⁹Biliha, Ezemu, Toladi,

³⁰Betsueli, Horima, Zikilagi,

³¹Betsi-marikabothi, Hazari-susimu, Betsi-biri nende Sharaimu.

³²Khandi bamenya mumatookho karano kano mbu; Etamu, Aini, Rimoni, Tokeni nende Ashani,

³³halala nende ebikwenyi babotokhana amatookho ako okhuula Baali. Buno nibwo obuloosie bwa babiikha obwetsimbia tsiabwe nende amatookho ka bamenyamwo.

³⁴Bano nibo abali abemilisi betsimbia tsiabwe. Meshobabu, Yamuleki, Yosha omusiani wa Amazia,

³⁵Yoeli, Yehu omusiani wa Yoshibia, omusiani wa Asieli.

³⁶Elihonai, Yakoba, Yeshohaya, Asaya, Adieli, Yesimieli, Benaya,

³⁷Ziza omusiani wa Shifi, omusiani wa Aloni, omusiani wa Yedaya, Omusiani wa Shimiri nende omusiani wa Shemayia.

³⁸Aboluyia lwabwe batsiililila okhwimeeta muno. Abameera kabwe kahandikwa, bali abemilisi mumataala kabwe ne oluyia lwabwe lwameetekha muno.

³⁹Basalaana niboola habwinjililo bwelitookho lia Gedori, elubeka webukwe welibanda, kho mbu bakhaabile amakondi kabwe obwayilo.

⁴⁰Yaho, banyoola obwayilo obunji, khandi obulayi, ne khandi eshialo eshio shiali eshibambalifu, shiaholeela tsi khandi eshiomulembe, eshichila abali nibamenyangamwo bali abolwibulo lwa Hamu.

⁴¹Mutsinyinga tsiomuruchi Hezekia, omuruchi wa Yuda, abandu baruumbulwe ameera kabwe bano batsia Gedori, nibasasia amaheema netsinzu tsia abandu ba Mueni nibabalonda mushialo shiabwe okhuula olwa leelo. Nabo nibamenya mushialo eshio shichila shiali nobwayilo obulayi bwebiayo biabwe.

⁴²Balala khuboluyia lwa Simoni, abahela abandu ebikhumi birano, batsia khushikulu shia Seiri. Abemilisi babwe bali Palatia, Nearia, Rafaya nende Uzieli abasiani ba Ishi.

⁴³Batsia nibamulula abandu ba Meleki boosi, nabo nibamenyayo okhuula olwa leelo.